3 ¹ ಪರಿಸಾಯಲ್ಲ ಅಯುದ್ಯಲಹಿರೀ ಸಭೆವಾಡೈನಾ ನಿಕೊದೆಮುಡನ ಒಕ್ಕ ಮನುಷ್ಯಡುoಡ್ಡೆ. ² ವಾಡು ರಾತ್ರಿಲಾ ಯೇಸು ದೇಗ್ಗರ್ಗಿ ವಚ್ಚಿ ಆತುಡ ಗುರುವೇ ನುವ್ವ ದೇವುಡಕಡ್ನಿಂಕ ವಾಚ್ನ ಬೋಧಕುಡನಿ ತಿಲ್ಚಗನ್ನಾಮು ನುವ್ವ ಸೇಸಟ್ಲಾ ಈ ಸೂಚಕ ಕಾರ್ಯಾಲ್ನಿ ದೇವುಡ ಸಹಾಯo ಲೇಗುಂಡ ಸೇಸೇದಿ ಯವ್ವಲ್ನಿoಕಾನು ಅಯ್ಯಲೆದಾನಿ ಸೋಪ್ನಾಡು. ³ ಅಂದ್ಗೆ ಯೇಸು ನೀನು ನೀಕಿ ನಿಜನಿಜಂಗ ಸೋಪ್ತಾನು. ಒಕ್ಕಡು ಕೊತ್ತಂಗ ಪುಟ್ಗಾಬಾತೆ ವಾಡು ದೇವುಡ ರಾಜ್ಯಮ್ನಿ ಸೂಸೇಟ್ಲೇದು ಅನ್ನಾಡು. ⁴ ನಿಕೊದೇಮುದಡು ಆತುಡ್ನಿ ಮನುಷ್ಯಾಡು ಮುಲ್ಸೋಡು ಆಯ್ನಾ ಪೈನಾ ಪುಟ್ಟೇದಿ ಯಟ್ಟ?ವಾಡು ತನ್ನ ತಲ್ಲಿ ಗರ್ಭಂಲಾ ತಿರ್ಗಿ ಸೇರಿ ಪುಟ್ಟೇದೈನಾದೆ ಅನಿ ಸೋಪ್ನಾಡು. ⁵ ಅಂದ್ಗೆ ಯೇಸು -ನೀನು ನೀಕಿ ನಿಜನಿಜಂಗ ಸೋಪ್ತಾನು ಒಕ್ಕಡು ನೂಳ್ನಿಕಾನು ಆತ್ಮoನ್ನಿಕಾನು ದೇವುಡ ರಾಜ್ಯಾಂಗಿ ಸೇರೆಟ್ಲೇದು. ⁶ ದೆಹಾಮ್ನಿಂಕ ಪುಟ್ಟಿoದಿ ದೇಹಾಮೆ ಆತ್ಮನ್ನಿಂಕ ಪುಟ್ಟಿoದ್ದಿ ಆತ್ಮ ಮೇ. ⁷ ಮೀಳು ಕೊತ್ತಂಗ ಪುಟ್ಟಾಲಾ. ಅನಿ ನೀನು ಸೋಪ್ಪುಂಡದಾನ್ನಿಂಕ ಆಶ್ಚರ್ಯಂಪೊಡದ್ದು. ⁸ ಗಾಲಿ ಮಂಸು ವಚ್ನಾ ಕಡ್ಗಿ ಇಸರ್ತಾದಿ ಡಾನ್ ಸಪ್ಪಳoನೀ ಇನ್ಟಾವು ಆಯ್ತೆ ಅಡಿ ಯಾನ್ನಿಂಕ ವಸ್ತಾದೋ ಯಾನ್ಗಿ ಪಾತದೋ ನೀಕಿ ತಿಲ್ಸೆಲೇದು ಆತ್ಮನ್ನಿಂಕ ಪುಟ್ಟಿನವಾಲಂದ್ರು ದಾನ್ಲಾಗಾನೆ ಅನ್ನಾಡು. ⁹ ದಾನ್ಗೆ ನಿಕೊದೇಮುಡು ಇದಿ ಆಯಾದಿ ಯಟ್ಟ? ¹⁰ ಅನ್ನಪ್ದು ಯೇಸು ವಾಡ್ಗಿ ಸೋಪ್ಪಿಂದೆಮಂಟ್ಟೆ ಭೋದಕುಡೈಯ್ಯಿಉಂಡ್ನಾ ನೀಕಿ ಇದಿ ತಿಳ್ಸೆಲೆದೋ? ¹¹ ನೀಕಿ ನಿಜನಿಜಂಗ ಸೋಪ್ತಾನು,ತಿಳ್ಸುoಡದಾನ್ನಿ ಸೋಪ್ತಾಮು,ಸೂಸೆದಂಗಿ ಸಾಕ್ಷಿಇಸ್ತಾಮು;ಮೀಳು ಮಾ ಸಾಕ್ಷಿನ್ನಿ ಒಪ್ಪೆಲೆದು.- ¹² ನೀನು ಭೂಲೋಕಂಲಾ ನಡ್ಸಾ ಕಾರ್ಯಾಲ್ನಿ ಕುರ್ಚಿ ಮೀಕಿ ಸೋಪ್ಪೆಪ್ದು ಮೀಳು ನಂಬೆಗುಂಡಪಾತೆ ಪರಲೋಕಂನಾ ಕಾರ್ಯಾಲ್ನಿ ಕುರ್ಚಿ ಮೀಕಿ ಸೋಪ್ತೆ ಯಟ್ಟ ನಮ್ಬಂಡ್ಡಿ? ¹³ ಪರಲೋಕಂನ್ನಿಂಕ ದಿಗಿವಚ್ನಾವಾಡೆ ಅಂಟೆ ಮನುಷ್ಯ ಕುಮಾರುಡೆ ಹೊರ್ತು ಮಲಿಯವ್ಳು ಪರಲೋಕನ್ಗಿ ಏರಿ ಪಾಯ್ನಾಡುಕಾದು. ¹⁴ ಇದಿಕಾಗುಂಡ [ಜನಾಲು ಸೂಸಿ ಜೀವಂನ್ನಿಂಕ ದಿಗಲಾನಿ ]ಮೊಶೆಯು ಅಡವಿಲಾ ¹⁵ ಆ ಸರ್ಪಮ್ನಿ ಎತ್ತರಂಲಾ ಪೆಟ್ನಾಟ್ಟ ಅಟ್ಟೆ ಮನುಷ್ಯಾಕುಮಾರುಡು ತನ್ನನ್ನಿ ನಂಬೆವಾಲಂದ್ರು ನಿತ್ಯಾಜೀಮ್ನಿ ಪಡಾಲಾನಿ ಎತ್ತರಂಲಾ ಪೆಟ್ಟಾಲ್ಪಡಲ ¹⁶ ದೇವುಡು ಲೋಕಂಪೈನಾ ಯಂತೋ ಪ್ರೀತಿನ್ನಿ ಪೆಟ್ಟಿ ತನ್ನ ಒಕ್ಕಡೆ ಕೊಡ್ಕುನ್ನಿ ಇಚ್ನಾಡು;ಆತುಡ್ನಿ ನಂಬೆ ಒಕ್ಕಲೈನಾನು ನಾಶಂಕಾಗುಂಡ ಅಂದ್ರೂ ನಿತ್ಯಾ ಜೀವಾಮ್ನಿ ಪಡಾಲನೀ ಆತುಡ್ನಿ ಇಚ್ನಾಡು. ¹⁷ ದೇವುಡು ತನ್ನ ಕೊಡ್ಕ ಮುಖಾತರಂ ಲೋಕಾಂಗಿ ರಕ್ಷಣೆಕಾವಾಲನಿ ಅಮ್ಪಿಚ್ಚಿಚ್ನಾಡೆ ಹೊರ್ತು ತೀರ್ಪು ಸೇಸೆ ದಾನ್ಗೈ ಅಮ್ಪಿಚ್ಲೇದು. ¹⁸ ಆತುಡ್ನಿ ನoಬೆವಾಡ್ಗಿ ತೀರ್ಪು ಆಯೇಲೆದು;ಆಯ್ತೆ ನಂಬೆಗುನ್ನವಾಡ್ಗಿ ದೇವುಡ ಒಕ್ಕಡೆ ಕೊಡ್ಕ ಪೇರ್ನಿ ನಂಬೆಗುನ್ನ ಪೈನಾದ್ಗು ಅಪ್ದೆ ತೀರ್ಪು ಆಯಿಪಾಯೇ. ¹⁹ ಆ ತೀರ್ಪು ಯೆಮಂಟ್ಟೆ-ಎಲ್ಗು ಲೋಕಾಂಗಿ ವಚ್ನಾನು ಮನುಷ್ಯಲ ಕೃತ್ಯಾಲು ಸೇಡ್ಡೆವೈನಾದ್ಗು ವಾಳು ಎಲ್ಗುಗ್ಗಿಂತ ಸೀಗ್ಟಿನೇ ಹೆಚ್ಚಂಗ ಪ್ರೀತಿಚ್ನಾರು. ²⁰ ಸೇಡ್ಡದಾನಿ ಸೇಸವಾಳು ಎಲ್ಗುನ್ನಿ ಸಹಿಚ್ಚೆಲೆದು.,ತಮ್ಮ ಕೃತ್ಯಾಲು ದೃಷ್ಕ್ರುತ್ಯಾಲಾಯಿ ಸೂಪಿಚ್ಚೋಚ್ನಾವು ಎಲ್ಗಿ ವಚ್ಚೆಲೆದು; ²¹ ಆಯ್ತೆ ಸತ್ಯಮ್ನಿ ಅನುಸರಿಚ್ಚಿ ನಡ್ಸಾವಾಡು ತಾನು ದೇವುಡ್ನೀoಕ್ಕ ನಡ್ಪಾಗಾನಿ ತನ್ನ ಕೃತ್ಯಲ್ನಿ ಸೇಸ್ನಾನನಿ ಸೂಪೋಚಾಟ್ಲಾ ಎಲ್ಗಿ ವಸ್ತಾಡು ²² ಆಮಂಕ ಯೇಸು ತನ್ನ ಶಿಷ್ಯಜೊತ್ಲಾಯೂದಾಯ ದೇಶಾಂಗಿ ವಚ್ಚಿ ಆನಾ ವಾಳ ಜೊತ್ಲಾಉಂಡಿ ದೀಕ್ಷಾಸ್ನಾನಂ ಸೇಬಿಸ್ತಾ ವುಂಟಡು. ²³ ಯೋಹಾನಡ್ನಿ ಸಲೀಮೂರ್ನಾ ದೇಗ್ಗರ ಉಂಡ್ನಾ ಐನೋಡನ ಸ್ಥಳಮ್ಲಾಉಂಡಿ ದೀಕ್ಷಾಸ್ನಾನಂ ಸೇಬಿಸ್ತಾವುಂಟಾಡು;ಆನ ನಿಂಡಾನೂಳುoಡ್ಡ;ಜನಲು ವಚ್ಚಿ ಸ್ನಾನಂಸೇಬಿಚ್ಗಟ ಉಂಟಾರು; ²⁴ ಆ ಕಾಲಮ್ಲಾ ಯೋಹಾನುಡು ಇಂಕ ಸೆರೆಲಾ ಎಬಿಚ್ಚಲ್ಪಡುoಡೆಲೇದು. ²⁵ ಇಟ್ಟುoಡಗ ಯೋಹಾನುಡ ಶಿಷ್ಯಾಲು ಕೆಲವುಲ್ಗು ಒಕ್ಕ ಯೆಹೂದ್ಯಾಡ್ಗು ಶುದ್ದಾಚಾರಂನಿ ಕುರ್ಚಿ ವಿಚಾರಂ ನಡ್ಸೆ. ²⁶ ಅಪ್ಡು ವಾಳು ಯೋಹಾನುಡ ದೇಗ್ಗರ್ಗಿ ವಚ್ಚಿ ವಾಡ್ಗಿ ಗುರುವೇ,ಯೋರ್ದಾನ್ ಕಾಲ್ವ ಆತ್ಲಾ ನೀ ದೇಗ್ಗರುಂಡ್ನಾ ಒಕ್ಕಡ ವಿಷಯಂಲಾ ನುವ್ವ ಸಾಕ್ಷಿ ಇಚ್ನಾವುಕದ ವಾಡು ಸ್ನಾನಂ ಸೇಬಿಸ್ತಾಡು,ವಾಡ ದೇಗ್ಗರ್ಗಿ ಅಂದ್ರೂ ಪಾತಾರು ಅನಿ ಸೋಪ್ಪಾಲು ²⁷ ಯೋಹಾನುಡು-ಪರಲೋಕಂನಿಂಕ ಅನುಗ್ರಹಿಚ್ದಾಮನೆದಾನ್ನೇ ಹೊರ್ತು ಮನುಷ್ಯಡು ಹೆಚ್ಚೆಮು ಹೊoದ್ದೆಲೇದು. ²⁸ ನೀನು ಕ್ರೀಸ್ತುಡ್ಕಾದು. ಆತುಡ ಮುಂದ್ರ ಅಂಪ್ಪಿಚ್ಚಲ್ಪಡವಾಡೈನಾನು ಅನಿ ನೀನು ಸೋಪ್ಪಿನ್ದಾಂಗು ಮೀಳೇ ಸಾಕ್ಷಿ. ²⁹ ಮದಲಗಿತ್ತಿಉಳ್ಳವಾಡೆ ಮದಲಿoಗುಡು;ಅಯ್ನಾನು ಮದಲಿಂಗುಡ ಗೆಳೆಯಡು ವಾಡ ದೇಗ್ಗರ ನಿಲ್ಚಾಗಾನಿ ವಾಡ ಮಾಟಲ್ನಿ ಇನಿ ಮದಲಿoಗುಡ ಧ್ವನಿಗಿ ಸಂತೋಷಂಪಡ್ತಾಡುಕದೋ.ದೀನಟ್ಲೇಉಂಡ್ನಾ ಸಂತೋಷಂ;ಅದಿ ನೆರವೇರ್ಯಾ. ³⁰ ಆತುಡು ವೃದ್ದಿಕಾವಾಲ;ನೀನು ಕಡಿಮೆಕಾವಾಲ ಅನ್ನಾಡು. ³¹ ಪೈನ್ನಿಂಕ ವಚ್ಚೆವಾಡು ಅಂದ್ರಾಪೈನಾ ಉಂಡಾಡು;ಭೂಲೋಕಂನ್ನಿಂಕ ಪುಟ್ನಾವಾಡು ಭೂಲೋಕಂವಾಡೈವುoಡ್ಡಿ ಭೂಲೋಕಂನಾ ಮಾಟ್ನೀ ಆಡ್ತಾಡು;ಪರಲೋಕಂನ್ನಿಂಕ ವಚ್ಚೆವಾಡು ಅಂದ್ರ ಪೈನಾ ಉಂಡಾಡು. ³² ತಾನು ಸೂಸಿ ಅಡ್ಗಿನ್ದಾನ್ಗು ಸಾಕ್ಷಿ ಇಸ್ತಾಡು;ಆಯ್ತೆ ಆತುಡ ಸಾಕ್ಷಿನ್ನಿ ಯವ್ಳು ಒಪ್ಪೆಲೆದು. ³³ ಆತುಡು ಸಾಕ್ಷಿನ್ನಿ ಒಪ್ನವಾಡು ದೇವುಡು ಸತ್ಯವಂತಡನೀ ಮಾಟ್ಗಿ ಮುದ್ರಾ ಎಸ್ನಾವಾಡೈನಾಡು. ³⁴ ಯಟ್ಟoಟ್ಟೆ ದೇವುಡು ಯವ್ವಲ್ನು ಅಮ್ಪಿಚಾಡೋ ಆತುಡ್ಗಿ ಆತ್ಮವರಂನ್ನಿ ಅಳತೆಸೇಯ್ಗುoಡ ಅನುಗ್ರಹಿಚ್ಚುoಡ್ಡ ಆತುಡು ದೇವುಡ ಮಾಟಲ್ನೆ ಆಡ್ತಾಡು. ³⁵ ತಂಡ್ರಿಯಾಯ್ನಾ ದೇವುಡು ತನ್ನ ಕೊಡ್ಕ್ನಿ ಪ್ರೀತಿಚ್ಚಿ ಅಂತಾದಾನ್ನಿ ಆತುಡ ಸೈಲಾ ಇಚ್ನಾಡು. ³⁶ ಆತುಡ ಕೊಡ್ಕನ್ನಿ ನಂಬೆವಾಡ್ಗಿ ನಿತ್ಯಜೀಮುಂಟ್ಟು;ಕೊಡ್ಕಿಗಿ ಲೊಗವಾಡೈವಾಡು ಜೀಮ್ನಿ ಸೂಸನೆಲೇದು;ದೇವುಡ ಕೊಪಾಮು ವಾಡ ಪೈನಾ ನೆಲೆಗೊಂಡ್ನಾಡು.