¹ Bhala bharisha bharongori, hamwe na bharongori bha isanga, na bhalosha bha sharia, na bhaghosi bha njama, bhakaroka bhatorane. Bhakamchunga Yesu mikono bhakamtika kaa hakwe Pilato. ² Pilato akambhujanya Yesu, ''Ai wohoughamba iti niwe mfumwa wa bhayahudi?'' Yesu akamtalua, ''Ni sabhula waghamba.'' ³ Ade wa bhala bharisha bharongori iti ehirie bhindu bhiingi bhibhibhi. ⁴ Ibhio bhikamketa Pilato kumbhujanya wa, ''Amba ubhatalua abha bhaghosi? Warebhasikia bharanga iti wahira bhindu bhiingi bhibhibhi?'' ⁵ Kake Yesu akahuja chui, asiretete wa. Icho kikamwitalisha muno Pilato. ⁶ Ikaoka iti yeokie niyo miikare yakwe uo mrongori kumshighiria mndu m'mwe echungiwe hena sukukuu ya pasaka. Ekinamshighiria ula mndu bhandu bhekundie ashighiriwe. ⁷ Igheri ilo heokie na mndu m'mwezu eitangwa Baraba eye echungiwe na bhaghenji bhakwe amu eketie matekwa ma kughesha kugharusha bhurongori bhua Kiroma na igheri ekiketa hubho akakoma. ⁸ Mbotu ya bhandu ikamuatera Pilato ikambhura amshighirie m'ndu mmwezu echungiwe sabhundu enaketa msi sa uo. ⁹ Pilato akabhabhujanya, ''Nimshighirie uu mfumwa wa bhayahudi?" ¹⁰ Amu emaije iti bharongori bha bharisha bheokie bhamlinganya Yesu hakwe amu bhehobhembhonia lung'wara iti bhandu bheingi bhehobheoka bhalloshwa bhake. ¹¹ Hena hubho abho bharongori bha bharisha bhakabhasosoia bhandu bhambhure Pilato amshighirie Baraba badala yakwe Yesu. ¹² Pilato akabhabhujanya wa, ''Mukundie nimhirie kini uu eye ni mfumwa wenyu?'' ¹³ Bhakabigha kilozo bhakambhura, ''Ang'angwe.'' ¹⁴ Pilato akabhabhujanya, ''Ni kihi kibhibhi ahira?'' Kake bhakabigha kilozo ndekero fanda bheghamba, ''Ang'angwe.'' ¹⁵ Pilato ekundie abhaizihirije ila mbotu ya bhandu, hena hubho akamshighiria Baraba. Akambigha Yesu misenge na ukwade akamwingija habho bharemng'anga. ¹⁶ Bhala maasikari bhakamwonja bhakamtika hena wang'i yabho, bhakabhaitanga bhaghenji bhabho bhose. ¹⁷ Bhakamdoka iseto la zambarua. Bhakakoda ngata ya miva bhakamdoka ioke nicho kitunga chakwe. ¹⁸ Bhakabhoka kumkezia bhembhura, ''Twakukezia mfumwa wa bhayahudi.'' ¹⁹ Bhakambigha mnjungu wa mtwi na kumtufia mate. Bhakadunguta bhemsola iti bhehobhemwinga heshima. ²⁰ Bhekimekenje kumtamaiya, bhakamngola lila iseto la zambarau na kumdoka lila leokie lakwe, bhakamfunya shighati esa bharemng'anga. ²¹ Bhakamgura mndu m'mwe afuma mtemeni eitangwa Simioni, ula Kerene, bhabhe Iskanda na Rufo, bhakamguria autike msalaba wakwe Yesu. ²² Bhakamtika Yesu mtano handu heitangwa Golgota, eho bhekinahaitangwa handu ha ngoma. ²³ Bhakamwinga divai irunganywe na nyongo kake tenyuie ye. ²⁴ Bhakamng'anga na kulighabhanya iseto lakwe bhibarandu bhibarandu. Bhakagera zaro nesa kutwarija iti niani eonja kibarandu kihi. ²⁵ Na yeokie saa ndatu igheri bhemng'angie. ²⁶ Hena kibao bhetamie lila itekwa bhemchungie, ''Mfumwa wa Bhayahudi.'' ²⁷ Hamwe naye bhakabhang'anga bhasoki bheri, m'mwe mkono wa kuume na ungiwa wa kumoso. ²⁸ Ichi kihirike esa kioke kila kitamiwe iti, ''Etariwe hamwe na bhasoki.'' ²⁹ Na bhala bheokie bhebhetia zieni bhakamrigha bhakamng'ong'a bhakambhura, ''We eye ughambie iti uidima kubaa ikanisa na kulijenga hena misi mitatu, ³⁰ haya! seya ha uo msalaba ukije ngoro yako.'' ³¹ Bharongori bha bharisha nabho bhakam'momocha hamwe na bhalosha bha sharia bhakabhurana, ''Ekijie bhengiwa, kake teidima kukukija yee, ³² shigha tumyoe kiristo, mfumwa wa bhaisiraeli, ekutambalatua asee hauo msalaba, esa tuingidaki iti niye mfumwa.'' Ata bhala eng'angiwe nabho bhakamhalela. ³³ Na imerefike saa sita kilungulungu, hakagwa kija isanga lose mtano saa kenda. ³⁴ Imerefike saa kenda akaia na ngori mbaha akaghamba, "Eloi, Eloi, lama sabakitani?", ni kughamba, ''Izubha wangu, Izubha wangu, nize wanishigha?'' ³⁵ Na bhala bheimuke aho hafuhi bhakaghamba, ''Myoeni, ehoemwitanga Eliya.'' ³⁶ M'ndu mmwe akamdindikia, akatobheja isambo elo lechungiwe ha mto wa mjungu, ha mawa mechikie, mashina, metechwa uteosha ni nyongo, akamuronga akamkwejia na ula mjungu akamwinga anywe. Uo m'ndu akaghamba, ''Shigheni tubhone iti Eliya enereza kumseja.'' ³⁷ Bhemerekenje kuhira ibhio, Yesu akaia na ngori mbaha akachwa ngoro. ³⁸ Suke ila inachwa hekalu ghati ikabajika bhibarandu bhiri kufuma wanga mtano sii. ³⁹ Ikaoka iti m'baha m'mwezu wa bhaasikari eye eimuke msongorana emyoa Yesu emerebhone bhila bhiose bhiahirika mtano akachwa ngoro, akaghamba, ''Kididi uu mndu ni Mwana wakwe Izubha." ⁴⁰ Bheokie pia bhache bhekiyoa ena hae. Hena abho bheokie Mariamu Makidalena, Mariamu (iya wakwe Yakobo mdori na Yose), na Salome. ⁴¹ Abho nibho igheri eokie Galilaya bhekinamuatera na kumghenja. Bhache bhengiwa bheingi pia bhemuatere mtano Yerusalemu. ⁴² Yeokie ni msi wa kukuarehia, ewo ukinaoka ibhuo ya msi wa itasi, ikafika chamagheri na ⁴³ Yusufu wa Arimathea akaza aho. Eokie mndu mzuri hena bhala bhaghosi bha njama, eye eindie kifumwa chakwe Izubha kize. Akamwatera Pilato, akamchilia na ng'iria mbaha embhura amwinge mwiri wakwe Jesu. ⁴⁴ Pilato akaitalwa kusikia iti Yesu afwa, akamwitanga ula akida akambhujanya, ''Ni kididi iti Yesu afwa?'' ⁴⁵ Ekimebhurwe ni ula akida iti afwa, akamuinga Yusufu ula mwiri. ⁴⁶ Yusufu eokie azora sanda. Akamseja wanga ya uo msalaba, akamlingilia ila sanda, akamgera ha mbira eyo yesongowe kufuma ha inoo. Akabingilisha ino likajibha momo wa ila mbira. ⁴⁷ Mariamu Makidalena na Mariamu iya wakwe Yose bhebhonie hala handu Yesu ejikiwe.