¹ Kake Sauli egheshijie kuitusha kubhakoma bhaloshwa bhakwe Apa akamwatera mrisha mbaha ² amwinge kitamo atike Damaski hena sinagogi iti bhakabhona bhandu bha Nzia ii bhome kana bhache bhagurwe bhatikwe Jerusalem. ³ Na mari eeho ekitonga emefike hafuhi Damaski turu na turu kiangaji kikamluma kufuma wanga Mbinguni; ⁴ akagwa sii akasikia ngori imbhura, "Sauli, Sauli akatalua niwe ani?" ⁵ Sauli akatalua, "Niwe ani apa?" Naye Mzuri akanghamba, "Ni mi Yesu uoho uniiinyala; ⁶ we kake imuka otonge shombeni amu unebhurwa bhundu uketa." ⁷ Bhala bhandu bheokio bhekitonga na Sauli bhakaimuka na bhahuja chwi bhakasikia ngori kake bhesibhona mudu. ⁸ Sauli akabhukika aho sii meso makwe meokie mesibhona kindu bhakamgura mkono bhakamtika mtano Damaski. ⁹ Ikafika misi mitatu esibhona, esila na esiywa hei. ¹⁰ Heokie na mloswa Damaski izina lakwe ni Anania Mzuri akambhura bhena ndoto, "Ananias.' Akaitikija, "Nioho aha Mzuri." ¹¹ Na Mzuri akambhura, "Imuka utoge hena zia iitangwa Rongeka na hena kaa yakwe Yudas ubhujanye mundu eitangwa Sauli wa Tarso; amu eeho etasa; ¹² naye akabhona mundu izina lakwe ni Ananias bhena ndoto eoho eingia na kumbhikia mkono wanga yakwe iti aidime kubhona wa." ¹³ kake Ananias akamtalua, "Mzuri nasikia mburi ja uu mundu hena bhandu bheengi bhubhibhi bhungi ebhahirie bhandu Yerusalem. ¹⁴ . Naye eingiwe nzinya ni mrisha m;baha kungura bhandu bhose na kubhachunga bhala bheeoho bhe ranga izina lakwe. ¹⁵ Naye Mzuri mkambhura, "Tonga tiki ;amu uu ni mundu esanghurwe hangu alitike izina langu hena isanga na bhafumwa na bhana bha ki Israe; ¹⁶ amu ninembhonya bhindu bhiingi abhio bhine mwinga kubhinywa bhena wanga ya izina langu." ¹⁷ Ananias akatonga jakwe akaingia hena ila nyumba. Akabhikia manghaza akambhura, "M'ndu wetu Sauli, Mzuri Yesu, aniazerija ula ekufumie nzieni mati ukiza uidime kubhona wa.uizujwe Ngoro Msheneneto. ¹⁸ Aho aho bhindu bhikangwa kufuma bhena meso bhekee sa makonde Sauli meso mabhona; akaimuka akabatizwa; ¹⁹ Akala kijo akapata nzinya. Akaikaa uko misi mifungate na bhaloshwa bha Dameski. ²⁰ Akabhoka kuchila bhiteto bhakwe Yesu hena masinagogi, iti ni Mwana wake Izubha. ²¹ Na bhose bhala bhemsikije bhakaitalwa bhakanghamba, "Mundu uu ka'niye ula ekinabhakoma bhala bheokie bhekinatasa hena izina ili kula Yerusalem? Na aha eokie ekiza ebharirie hubhu kubhachunga na kubhatika hena bharisha bhabaha." ²² Sauli akazika kuoka wedi hena kuchila kiteto chake Mzuri hata akaitalisha Bhayahudi bha Damaski mtano bhakadhibitisha iti ni Yesu. ²³ Hata misi miingi imebhetie Bhayahudi bhakaareha njama iti bhamkome. ²⁴ Kake njama yabho ikatisibhwa ni Sauli. Bhakamyema hena mvera kio na hemsi iti bhamkome. ²⁵ Bhaloshwa bhake bhakamtika kio bhamseja hena lusarigho egeriwe hena kikapu. ²⁶ Na Sauli emefike Yerusalem egheshijie kungurana na bhaloshwa nabho bheokie bhekimwituka bhose, bhesimwitimoki iti yee ni mloshwa. ²⁷ Kake Barnaba akamuonja akamtika hena bhandumi. Akabhabhura Sauli bhundu embhonie Mzuri, zieni na ni iti etetie naye na bhundu echilie kiteto cha Mzuri ki long'oni hena Damaski hena izina lakwe Yesu. ²⁸ Naye akaoka hamwezu nabho hena Yerusalem. Ekiingia na kufuma akachila hena izina lakwe Mzuri ²⁹ kilong'oni bheteta na kubhujanyana na Bhayahudi; bha kiyunani nabho bhaghesha kumkoma. ³⁰ Kake bhandu bhawo bhemetisibhe mburi bhakamtika mtano Kaisaria';bhakamtika wa atonge Tarso. ³¹ Aho kanisa likaizirihiwa mno hena Uyahudi, Galilaya na Samaria hose bhearehiwe na kutonga; hena fole ya Mzuri na faraja ya Ngoro Msheneneto, na kanisa likaeha na kuongejika . ³² Na Petro mari eokie ekijunguluka junguluka ;kila handu akabhaselia bhatakatifu bheika Lida. ³³ Akambhona mundu mmwezu uko izina lakwe Ainea, mundu ashinjia bhuini miaka mimane amu eokie ebhiiye. ³⁴ Petro akambhura, "Ainea, Yesu Cristo akundindija. Bhukika ukutandishie akabhuka ere aho. ³⁵ Na bhandu bhose bhenaikaa Lida na Sharoni bhakambhona bhakamgharukia Mzuri. ³⁶ Na mloshwa m;mwezu eokie Yafa izina lakwe Tabitha maana yakwe "Dorkas". Mche uu eokie na miikare yedi na masho ekinangola bhakiwa. ³⁷ Ikaoka misi ila akabhabhiwa akafwa bhekimemuoje bhakambhika orofani. ³⁸ Amu kinghongo cha Lida cheokie hafuhi na Yafa na bhaloshwa bhesikie iti Petro eeho uko bhakatuma bhandu bheeri hakwe kumsemba na kumbhura, "Asisheshe kuza hetu." ³⁹ Petro akafuma akaraterana nabho. Emefike bhakamtika wanga orofani. Bhache bhose bhajane bhakaimuika hafuhi naye bheho bheiya na kumbhonya mala maseto na suke jila ekinabhachumia Dorkasi mari eokie nabho. ⁴⁰ Petro akabhafunya shighati bhose akasomia ngoko akatasa akaatera ula muri akaitanga, "Tabitha bhukika." Aho aho akaabhija. na emembhone Petro akabhukika akaikasi. ⁴¹ Petro akamwinga mkono akambhushija nakubhaitanga bhala bhatakatifu na bhajane akambhika msongorana wabho eeho na moo. ⁴² Iikatisibhikana hena kinghongo chose cha Yafa na bhandu bheengi bhakamwing' idaki Mzuri. ⁴³ Naye Petro akaikaa misi mitare uko Yafa kaa ya mundu m'mwezu izina lakwe Simion mhiri wa ngingo.