¹ Igheri Petiro na Yohana bheokie bhekiteta na bhandu. Bharisha, bhabaha bha Hekalu na bhasadukayo bhekabhazia bhena oro. ² Amuu bhandumi bheokie bhekilosha na kubhatindia bhandu iti hakwe Yesu hena kuruka . ³ Bhekabhagura Petiro na Yohana bhekabhagera kichungoni m'tano yabho yakwe amu yeokie chamagheri. ⁴ Kake bheingi bhesikije kila kiteto bhekaing'idaki, ebho ni bhome bhiku bhisano. ⁵ M'si uaterie bharongori ,bhaghosi na bhatami bha sharia bhakatorana Yeruselemu. ⁶ Bheoeokie M'risha m'baha anasi, Kayafa, Yohana, Isikanda na bheengi bha kaa yakwe M,risha m'baha. ⁷ Bhekabhaimusha Petiro na Yohana ghati na ghati yabho, bhakabhabhujanya,"Ni he OKna luidimo ani kana hena izina lakwe animwahira kindu ichi?" ⁸ Petiro kubhetia hena Ngoro M'shenete akatalua,"Unywi bhaitori na bharongori bha bhandu, ⁹ akicha yoo tukanyingiriswa hena ndumi ya bhindu bhiedi ehiriwe ula m'ndu ebhiiye maghu na kubhujanywa bhundu edindijwe? ¹⁰ Imanyikane henyu bhose na hena bhandu bhose bha Isirael, iti ni hena izina lakqwe Yesu kristo wa Nazareti, eye mu'mrishie bhwasi, kake Izubha akam'rusha hena bhefuiye, hena luidimo lwake Yesu, iti m'ndu uu aimuka m'songorana wenyu ehoo moo. ¹¹ Yesu Kristo ni m'kola ewo unywi bhaaria muusuie ewo waoka wa mbucha pada. ¹² Hesina lukio hena m'ndu uowose:amuu hesina izina lingi aha sii, eloo liingiwe bhandu, eloo liinare kubhakija. ¹³ Bhekimebhone bhundu bhaketa ng'iria Petiro na Yohana, na bheetisibhe iti ni bhandu bha kawaida, bhesitomode, bhetalwe kubhabhona bheho na Yesu. ¹⁴ Amuu bhem'mboni m'ndu ula edindijwe eimuke hamwe na bhoo, bhekasobha kindu kibhibhi cha chakuteta wanga ya icho. ¹⁵ Bhekime bhasingirije bhala bhandumi kufuma hena lutimi lwa bharongori, bhetetie bhenye na bhenye. ¹⁶ Bhakaghamba," Tubhahirie kini abha bhanduu? amu ra kididi maitalisho mahirika kubhetia ha abha bhandu chatisibhikana ni bhandu bhose bhenaikaa Yerusalemu; na tusiidima kukana. ¹⁷ Kake nesa kisirume pada hena bhandu bhengi nichedi tubhakinde bhasiendelee kubhura bhandu wanga ya izina iloo." ¹⁸ Bhebhaitange Petiro na Yohana nyumbeni na kubhaaghanya bhasitete kana kulosha hena izina lakwe Yesu. ¹⁹ Kake Petiro na Yohana bhekabhatalua na bhakabhabhura," Ioke iti nichedi m'songorana wakwe Izubha kubhainga nganyi unywi kum'kela yee, unywi chueni. ²⁰ amuu tusiidima kughenja kutinda bhindu ebho twabhibhona na kubhisikia." ²¹ Bhekime bhaaghanye pada Petiro na Yohana, bhakabhashigha bhatonge. Amuu bheremiwe kubhona kindu kubhabigha, amu bhandu bhose bheokie bhekimwisisa Izubha hena bhiose bhihirike. ²² M'ndu ula ebhetie maitalisho ma kudinda ebhetije miaka makumi mane. ²³ Bhekimechunguwe, Petiro na Yohana bhekabhziia bhandu bhabho, bhekabhatindia ndumi ila bhetindiwe ni bharisha na bhaghosi. ²⁴ Na bhemesikie ndumi iyoo bhekarunganyika hamwe bhekamwisisa M'zuri bhekighamba M,zuri we ni M'lunga wa wanga nasii, ipee na bhila bhioho, ²⁵ niwe um'ketie m'hiri wako Papa wetu Daudi atete na kubhetia na Ngoro M'shenete.Nize bhandu bhaloziana, na kuhira bhindu bhesho. ²⁶ Bhafumwa bha isanga bhekaoka kindu kimwe, na bharongori bhakatorana hamwe wanga yakwe M,zuri, na wanga ya Kristo wakwe. ²⁷ Amuu ni kididi Herode na Pontio Pilato hamwe na bhaisanga bha Isiraeli bhetorane hena Isanga wanga yakwe M'hiri wako ezerieYesu, eyee um'tamie ngorino. ²⁸ Bhetorane hamwe nesa bhahire bhiose bhila ebho mkono wako na magheshijio mako wekundie mafumirie too ndarasi. ²⁹ Iki M'zuri yoa kuitusha kwabho ubhainge bhazoro bhako kiteto cha ng'iria. ³⁰ Nesa ukaronga ighaza lako la kukija maitalisho mako mahirike hena izina la m'hiri wako Yesu Kristo. ³¹ Bhekimekurije kutasa hala handu bheokie hekadedema, bhekaseiwa ni Ngoro M'shenete, bhekateta kiteto chakwe Izubha na kong'iria pada. ³² Bhandu bhose bhala bheing'idakie bheokie na ngoro m'mwe na hesina m'ndu eghambie kila kindu ehete iti ni chakwe mwenye kake bhindu bhiose nebhibho hamwe. ³³ Hena zinya mbaha bhandumi bhakatinda bhushuhuda kuruka kwakwe M'zuri Yesu , loopna m'vono m'baha ukaoka wanga yabho bhose. ³⁴ Heseena m'ndu wowose eduikiwe ni kindu, amu bhala bhe'hete miteme na nyumba bhetaghije ³⁵ na kubhainga bhandumi ijo pesa, kila m'mwe akaghabhiwa kuringana na mahitaji makwe. ³⁶ Na Yusufu wa mbare ya Kilawi m'ndu wa Saipurasi eye eitangwe Barinaba ni bhandumi (eyee ni mwana wa faraja). ³⁷ Eehete m'teme wakwe,akautaghija akaete maiho akabhainga bhandumi.