¹ Hena m'ndu mwezu izina lake eitangwa Anania, na mche wakwe ni Safira; ye na mche wakwe bhetaghie kisaka. ² Bheka bhika kimbiso kibaje cha maiho, na mche wahakwe itisibwe mbiso iyo. Bhekaete ihacha na kulibhika maghuni ha bhaondo. ³ Petro akambhujanya, "Anania, amu kini mkeleki akuizua na ngoro, na kumkenga ngoro mshenete. Na kubhisa ihancha la maiho ma kisaka? ⁴ Kisaka ichomari kisimetaghwa kari chookie ni chako? Mari chookie hako see cha hako? Wakitagha wesena luidimo lwa kukiitora amkini wagheshija kiteto icho na ngoro yako? Wasimkenga m'ndu kake wamkenga Izubha." ⁵ Anania ekimesike bhiteto ibho ekagwa na kuchika ngoro. Bhandu fwanda bheka gurwa ni fole; bhekimesikie ibho bha mfumia Anania. ⁶ Bhabwange bhekamfinikira na ngingo bhekare mjika. ⁷ Ikimebhetie masaa matatu, mche wakwe ekaza, hekaluni; kake esimaije cha mfumia mghosi wakwe. ⁸ Petro akam'wujanya, "iti kisaka mwatagha maiho ni mo ama?" Ekaitikija, "hena maiho amo." ⁹ Petro ekabhujanya, "mwaokaze mwasikijanya kumghesha ngoro ya Apa? Yua mabhato ma bhala bhamjika mghosi wako aho mbengeni, nawe bheza kukuonja." ¹⁰ Ekimebhurwe hubho ekangwa mahweni hakwe na kuchika ngoro. Wabwange bhakaingia bhekakicha achika ngoro, bhekambheka bhekamtika shighati na kumjika hamwe na mghosi wake. ¹¹ Fole ikabhafolia bhandu bhala bhisikie na Ikanisa lose. ¹² Maitalisho na ishara fwanda bhikahirika hena maghaza ma bhaondo na bhose bhooikie hena ngondi yakwe Selemani. ¹³ Hesina mwezu egheshie kugurana nabho isitebho bhala bhe ingiwe nganyi ni bhandu. ¹⁴ Bheka ongejika bhome na bhache bhala bhaingidaki, ¹⁵ bheka ala ngingo hena irira na kuyaja bhwawaji. Hesa Petro akabhetia kivuri chakwe kibhaguiye. Bhuwaji bhwabho. ¹⁶ Bhandu bheho mbaai mbaai ya Yerusalemu, bheka torana na kuete bhawaji hesa bhakijwe. Na bhala bhena m'bepo bhekakijwa jikafuma. ¹⁷ Hekafumia mrisha mbhaha (kibajiko) na bhala bhose bhooikie hamwe naye, Masadukayo; bhwena luso lubaha ¹⁸ wakagura bhaondo bheka bha bhika na kichugo. ¹⁹ Kioo Malaika wakwe Mzuri Apa akachungua malughwi ekabhang'ola hena kichungo. Ekabhabhura, ²⁰ "bhatonge hena hekalu bhare losha bhandu kiteto cha lukio." ²¹ Bhekimesikie bhekatonga marekero hekaluni kulosha. Ekaza mrisha mbaha ekatoranisha bhandu bhose, na iwang'i bhaghosi na bhana Israeli. Ekang'ola bhandu bharebhaonja bhaondo kufuma na kichungo. ²⁴ Iki mrongoriwa hekalu na bharisha bhabaha bhekimesikie hubho, bhekakusaara wanga yabho iti kineokaze. ²⁵ Mndummwe ekaza ekabhabhura,''bhala bhandu mwebhachungie bheho hekaluni bhelosha bhandu.'' ²⁶ Niho ula mrongori ekatonga na bhahiri ndima kubhahundua , hena lubhoro, amu bheondoke bhasirebighwe manoo. ²⁷ Bhekimebhaete bhekabhabhika na lutimi. Mrisha m'baha ekabhabhujanya, ²⁸ ekighamba, ''Tubhatamanye kulosha hena izina ili, kake mwaizuja yerualemu malosho amo, namukundie sakame ya mundu uu iyoke wanga yetu.'' ²⁹ Petro na bhandumi bhekatalua, ''iinare kumwinga Izubha nganyi kukela mundu ³⁰ . Izubha wa bha Apa bhetu emrukie Yesu hena kifwa,eye unywi mumkomie mkambhanika hena mti. ³¹ Mundu uo Izubha amkweja kiringo hena ighaza lakwe la kuume aoke mfumwa mbaha na mkija, abhasarie bha israeli na kubhaoja ng'oki jabho. ³² Na uswi tubhakara bha bhindu ibhi na Ngoro Mshenete, eye Izubha abhainga bhala bhemgurie nganyi,'' ³³ Bhekimetisibhe hubho bheka bhabhiwa ngoro bheka hira mbiso ya kubhakoma bhandumi. ³⁴ Mfarisayo mmwezu eitangwa Gamaleli, mloshi wa Sharia na eingiwe nganyi ni bhandu bhose, ekamuka ghati ya lutimi aka ghamba abha bhandumi bhabhikwe shighati hadongo. ³⁵ Akabhabhura, "unywi bhome bha isanga la Israeli, yueni bhundu mnehiria abha bhandu. ³⁶ He fumirie m'ndu eitangwa Theuda ekaoka na bhandu maghana maane ekime komwe bhose bheka zarika. ³⁷ Igheri la kutara bhandu heka fumia ungi eitangwa Yuda wa Galilaya. Ekahundua bhandu kisindesinde bhala bha mwing'idaki. ³⁸ Na bhabhura shigheni bhandu abha mtalamane nabho akicha kiteto chafuma ha bhandu kigwa. ³⁹ Kake kaicha chafuma hakwe Izubha, msika idime kukigusha. Msize mkabhonwa iti mwoho mbighana na Izubha." ⁴⁰ Bheka bhaitanga bhamondo bhaka bha tabasha bhasirange izina lakwe Yesu. Bheka bhadabha na kubhashighiria bhatonge jabho. ⁴¹ Na bhekafuma hena lutimi na luizihiro lubaha amu bhaoka bhame hena bhakara bhala bhagerwa soni wanga ya izina ilo. ⁴² Na kila msi hena hekalu na kaa jabho bhekalosha kiteto chakwe Yesu. Iti niye Kristo mkija.