¹ Hena igheri la saa kenda maari ma kutasa Petiro hamwe na Yohana bheokie bhekitonga Hekaluni. ² Na m'ndu m'mwe eyee ebhiiye maghu too kubhoneka kwake ekinatikwa abhikwe mbengeni hena lughwi lwa Hekalu luitangwa lwedi nesa aombe masho na bhandu ebho bheokie bheingia Hekaluni. ³ ekimebhabhone Petiro Na Yohana bhehobheingia Hekaluni, akabhaomba masho. ⁴ Petiro na Yohana bhakam'duduiya meso na Petiro akam'bhura tuyoe uswi ⁵ akabhayoa ekigheshijia kuoshola kindu habho kake ⁶ Petiro akam'bhura nisina pesa kana zahabu kake nikuinga kila nihete .Hena izina lakwe Yesu Krisito wa Nazareti,Bhata. ⁷ Petiro akam'gura m'kono wakuume akamwimusha ahoaho maghu makwe makaketa zinya ⁸ akaimuka akabhoka kubhata akaingia hamwe nabho Hekaluni ekitorokatoroka na kumwisisa Izubha. ⁹ Bhandu bhose bhem'mbonie ekibhata na ekimwisisa Izubha. ¹⁰ Bhekimetisibhe iti niye ekinaikasi mbengeni hena lughwi Lwedi lwa Hekalu euhia masho; bhakaitalwa pada ni bhila bhindu bhim'patie. ¹¹ Maari ebhagurie Petiro na Yohana bhandu bhose bhakabhajunguluka na ngondi yakwe Selemani bhakaitalwa m'no. ¹² Petiro emebhone hubho akabhatalua abho bhandu, unywi Bhaisirael nize muoho muitalishwa ni bhindu ibhi? kana nize mtududuiya meso, sa uswi twam'keta uu abhate hena zinya jetu kana bhushenete bhetu uswi. ¹³ Izubha wakwe Iburahimu, Isaka na Yakobo, Izubha wa bhapapa bhetu am'kweja m'hiri wakwe Yesu eye unywi mumuingije na kum'sua m'songorana wakwe pilato, echuie iti ajughuiwe. ¹⁴ Kake unywi m'kamsua ula M'shenete eye Ehirie Bhedi , m'kakunda muingwe m'komi. ¹⁵ M'kamkoma M'baha wa lukio eye Izubha em'rushie kufuma hena bhefuiye, na uswi tu bhakara bhia ibhio . ¹⁶ Iki hena luing'idaki hena izina lakwe, nilo lam'gera zinya m'ndu uu mum'yoiye na kum'manya unywi bhose; na luing'idaki ehete kubhetia hakwe Yesu lwamwinga kudinda kwa kijenye m'songorana wenyu unywi bhose. ¹⁷ nananaIki bham'ndwetu natisibha iti unywi na bharongori bhenyu m'hirie hubho hena kutotisibha kwenyu. ¹⁸ Kake bhila Izubha etetie kubhetia ha bharoti bhakwe bhose bhiaringania iti Kristo wakwe erishwa bhwasi. Na ibhi bhiose bhiafumiria. ¹⁹ Chueni mti muhunduke mngoliwel ngoki,nesa M'zuri abhainge magheri ma kushenetijwa ngoro jenyu ²⁰ abhatumie ula Kristo Yesu ula emsaghurie. ²¹ Yee niye wanga lazima imuuhie m'tano igheri linefika la bhindu bhiose kuoshwa bhisha, sabhundu Izubha etetie kae kubhetia hena momo wa bharoti bhakwe bhashenete. ²² Musa eghambie, 'M'zuri Izubha eghambie enesaghura saa mii kufumia m'mwe wa bham'nduenyu. M'nesikija ibhio bhose ene bhabhura unywi. ²³ Ineoka iti m'ndu wowose eye esikam'sikije uo mroti enenyamarwa pia ghati ya bhandu.' ²⁴ Ee, na bharoti bhose kufumia Samweli na bhala bhemwaterie, bhetetie na kuchila wanga ya mburi ja misi ii ya yoo. ²⁵ Unywi ni bhana bha bhuroti na bha maaghanyo mala Izubha ehirie na bhakaka bhenyu saa bhundu em'bhurie Iburahimu, 'Kufuma hena ibhee lako mbare jose ja isanga jinetasiwa. ²⁶ 'Izubha ekimeidibhe kum'rusha m'hiri wakwe, Yesu, em'tumie henyu ini, nesa abhatasie hena kubhagharusha kila m'mwe wenyu kushigha bhubhibhi bhwakwe.