¹ Ikimechuwe iti bhatonge Italia, bhekamwingija Paulo na bhafungwa bhengi hakwe akida m'mwe, eitangwa Yulio, wa mbotu yakwe Agusto. ² Tukaingia hena Meli ya Drametio eyo yeokie ikizoka hena masnga ma bhijebhu bhia Asia. Aristariko, M'makedonia wa Sesaloniki, eokie hamwe nauswi. ³ M'si wa keri tufikie Isanga la Sidoni; Yulio akam'ghenja pada Paulo akam'ruhusu atonge ha bhambuyae, arererwa. ⁴ Kufuma aho tukabhoka charo tukibhetia hena Ipe la kipro nesa kubalia mbai amu ngungu yeokie mbaha m'no. ⁵ Tukimebhetie Ipe la mbai ya Kilikia na Pam'filia, tukafika mira, isanga la lisia. ⁶ Na uko ula Akida akakicha Meli ya Isikandirea, ikizoka Italia, akatukweja ndeni. ⁷ Tukazoka mbohamboha hena misi mingi, tukafika Nido hena bhwasi; na hena kuoka ngungu yeokie ikitukinda tukaguria kubhetia Ipe la Kirete, Tukakabili Salimoni. ⁸ Tukabhetia hena bhwasi ,bhibhambara na bhibhambara,tukafika handu heitangwa Bandari Yedi na hafuhi na aho hena kighongo kiitangwa Lasea. ⁹ Na igheri limesiie , charo kikaketa bhwasi, amu misi ya kuchunga yeokie yabhetia Paulo akabhaaghanya, ¹⁰ akabhabhura, Bhome, Charo ichi kineketa maghesho na hasara mbaha, esiya miagho na Meli tiki, kake na kuikaa kwetu. ¹¹ kake ula Akida akabhasikija M'rongori na mwenye Meli kukela bhila etetie Paulo. ¹² Amuu Kibhambara chesebhe kuikaa igheri la mbeho, bheingi bhakabhona kiba kufuma uko nesa bhaidime kufika Foinike,kikaidimikana, bhaikae igheri la mbeho; nacho ni kibhambara cha Kirete kugura wanga- kuume na sii-kuume. ¹³ Na ngungu kufuma sii ikimebhoke kuruma hadori, bhakagheshijia iti bhapata kila bheeghshijie kupata, bhakabhoka charo hafuhi na Kirete kibhambara hena kibhambara. ¹⁴ Igheri ifuhi likimebhetie ikaruma ngungu mbaha ya kikulukulu, iitangwa Urakilo, ¹⁵ meli ikagurwa bhekaishigha bhakaza bhekaonjwa. ¹⁶ Bhekimebhetie ngwangu hafuhi na ndibha ndongo iitangwa Kauda bhekaketa luidimo lwa kuikweja ngalawa; kake hena bhwasi. ¹⁷ Bhekimeikweje, bhekaibhetijia zighi kuchunga sii ya meli. Bhekaituka bhekadindika ngaluko ya m'zangazi uko Siritisi, bhekaseja nanga hena Ipe bhekatikwa. ¹⁸ Tukabighwa pada ni makindi ma mbombe, m'si uaterie bhabaharia bhekabhoka kubhirita miagho ndeni ya mbombe. ¹⁹ Igheri la m'si wa katatu bhabaharia bhekabhirita miagho eyo yeokie hena meli na mikono yabho bhenye. ²⁰ Zano na ndondo jisibhonekane hena bhio bhiingi, na makindi ma mbombe makatubigha, tukasobha lusiligi lwa kukia. ²² Ikimeoke bheikee misi miingi na zaa, Sauli akaimuka ghati ya bhabaharia akaghamba," Bhome abha, akicha mwenisikije mii, na kusafuma uko kirete, m'sikipata ibigho ili na ndenga. ²¹ Na iki nibhainga ngiria okeni na lusiligi, amu hesina moo wa m'mwe ghati yenyu,uneteka esitebho meli tiki. ²³ Amuu hena kio cha kuchia yoo malaika wa Izubha, ula mii ni wake eyee nami ninam'tasa-malaika wake eimuke mbai nami ²⁴ na akaghamba, usiituke, Paulo. Lazima uimuke m'songorana wakwe Kaisari, ubhone, bhwedi bhwakwe izubha eyee akwiinga bhandu abha bhose bheho bhezoka nawe. ²⁵ Metake, bhome, keteni ng'iria, amu nimwing'idaki Izubha, sabhundu nibhuriwe. ²⁶ Kake lazima kidara kimwe tuneshiniwa. ²⁷ Kio cha ikumi na kane kimefike, mati tukitikwa kunu na kula m'tano tukafikishwa ipe la Andria, Uko kio ghati bhazoki bhakaosha iti bhasongeria ghati. ²⁸ Bhakabhirita bilidi bhakasikija maizi ma mbombe bhekapata pima Ishirini, bhekasongera wa hadori bhekabigha maizi bhekapata pima ikumi na sano ²⁹ .Bhekaituka iti bhasireze bhekashiniwa handu hena mano mabaha, bhekabhirita nanga nne bhekaimuka bhekahira itasi nesa hatambaruke ngwangu. ³⁰ Bhabaharia bheokie bhekienda bhundu bhematuka bhishighe Meli na bhekaseja bhindu bhia kubhakija ndeni ya mbombe, na bhekakenga iti bheokie bhekiseja nanga kufuma hena upinde wa nanga. ³¹ Kake Paulo akabhabhura Maakida na bharinji, "Esitebho bhandu abha bhaikae ndeni ya meli, hesina m'ndu enekia." ³² Na bharinji bhekachwa zighi ja meli na bhekaishigha itikwe. ³³ Hekimefikie kucha Paulo akabhasemba bhose bhale kijo. Akaghamba yoo ni m'si wa ikumi na kane kuinda na kuchunga m'simele kindu chochose. ³⁴ Hena hubho nim'semba m'le kijo, amu niko kukia kwenyu; na hesikakete hata nyui hena m'twi wa m'mwezu wenyu ineteka. ³⁵ Ekimeidibhe kuteta hubho akabhushija Ibumunda akamwinga Izubha haika m'songorana wabho akaubegha akabhoka kula. ³⁶ Bhose bhekaketa zinya bhakala kijo bhenye. ³⁷ Na bhala bhose tweokie ndeni ya Meli nee bhandu maghana Meri na makumi mafungate na bhatandatu. ³⁸ Bhekimeibhute, bhekabechua miagho ndeni ya meli bhekabhirita Ngano hena Ipe. ³⁹ Hekimeche,bheremiwe kutuanya lila Isanga, kake kibhambara kina Kidara, na bhekaruguma iti ngea hena luidimo lwa kuchighika meli aho. ⁴⁰ Hena hubho bheka halaja jila nanga na bhekajichighika hena kibhambara cha Ipe.Na hena igheri ilo ilo bhakahalaja zighi ja sukani na bhekategha ngungu nesa kukinda ngungu; bhekafika kibhambara. ⁴¹ Kake bhekafika handu mape meri metorane, bhekaichighika meli. Mbai ya m'shushu wa meli ukagurwa, bhusho bhwa meli bhukabhoka kubaika wanga ya makindi mabaha ma mbombe. ⁴² Kilemia cha maasikari ne kukoma maruo nesa hasiketike wowose edindia akadindika. ⁴³ Kake akida ekundie kum'kija Paulo, akaimusha kilemia chabho; akabhabhura bhalabheidima kudindia bhakubhiritie bhaoke bhakubhoka kukwea wanga. ⁴⁴ Na bhandu bhengiwa bhose bhaaterie, bhala bheho wanga ya mbao, na bhala ya bhindu bhia meli, na bheidime kufika handu heomie nezo.