¹ Agippa aakam'bhura Paulo," Uidima kukukania? " Paulo akaronga ighaza lakwe akabhoka kukukania. ² M'fumwa Agrippa, niizirihiwe pada hena ngoro yangu, kukukania m'songorana wako wanga ya ibhio bhose bhayahudi bheghambie; ³ hena kuoka iti wee umaije m'no miikare ya bhayahudi na kubhujanya kwabho. Hena hubho nakusemba unisikije na lugumirio. ⁴ Kididi, bhayahudi bhose bhemaije kueha kwangu too kibwange hena isanga langu na Jerusalemu. ⁵ Bhenitwarije too m'bhoko na bhekakunda bheidima kungola bhushuhuda iti too kae niikae saa mfarisayo , hena kuiatera dini yetu yedi pada. ⁶ Iki naimuka aha nichuiwe mburi amuu nioho niyowa mala matemiano emo Izubha ebhikie na bhapapa bhetu. ⁷ Amuu ama nimo matemiano ma mbare jetu ikumi na mbiri bhem'hirie Izubha nezo kio na hem'si.Ni hena lusiligi ulu, M'fumwa Agirippa, iti Bhayahudi bhanishitaki mii. ⁸ Amu kini kila m'mwe wenyu eitalwa Izubha kurusha bhefuiye? ⁹ Igheri imwe nigheshijie mii mwenye kuhira bhindu bhiingi kulisua izina lakwe Yesu wa Nazareti. ¹⁰ Nihirie ibhi bhiose uko Jersalemu; Nichungie bhala bhaeitikije kiteto bhengi kichungoni, Neokie na zinya kufuma na Bharisha bhabaha kuhira hubho; na bhemekomwe , ni itikije kukomwa kwabho. ¹¹ Na kandu keengi nibhabighie hena Masinagogi mose na nigheshie kubhaketa bhakufuru. Nikabhaketia oro pada na nikabhakinya hena masanga mengi. ¹² Maari neokie nikihira hubhu, nitongie Dameski hena na maazerijo kufuma hena bharisha bhabaha; ¹³ M'fumwa, hem'si maari neokie zieni nibhonie kiangaji kibaha kukela cha Zano na kikanilangara mii nabhala bhome tuokie tukizoka nabho. ¹⁴ Bhose tumegwe sii nisikie ngori ikinitetia hena mbare ya Kiiburania," Saulo, Saulo, nizee woho unireghijisha mii? Kidindie wee kusamba njele izere.' ¹⁵ Nikaghamba, 'uwani wee, M'zuri?' M'zuri akatalua akaghamba, 'Nimi Yesu woho unireghijisha. ¹⁶ Iki bhuka uimuke na maghu mako; amuu hena bhundu ubhu nakuziiya wee, nikusaghure wee uoke m'hiri na mkara wa bhila bhindu umaije wanga yangu iki na bhila ninekubhonya ade; ¹⁷ na ninekukija kufuma hena bhandu na bhayunani emo nioho nikutuma habho, ¹⁸ ubhajughue meso mabho bhafume hena kija m'tano hena kiangaji na kufuma hena jakwe m'keleki m'tano hakwe Izubha, nesa Izubha abhashighie ng'oki jabho na bhauhie bhuhoja bhula nibhaingie bhala ebhoo bhezerijwe na kuoka na luing'idaki ndeni yangu. ¹⁹ Hena hubho, M'fumwa Agirippa nisisuiye mabhono kufuma wanga; kake, ²⁰ kubhoka na bhala bheho Dameski, na Jerusalemu waa, na bhose bha isanga la Kiyahudi, na bha masanga mengi bhose, nibhachilie iti bhachwe m'ti na bham'hundukie Izubha, hena kuhira bhindu bhiedi bhiose bhifumana na kuchua m'ti. ²¹ Hena bhundu ubhu Bhayahudi bhenichungie Hekaluni na bhekaghesha kunikoma. ²² Izubha anighenja mii m'paka iki, hubho niimuka na kushuhudia bhandu bha isanga na bhabaha esizaidi ya bhula bharoti na Musa bheghambie bhine hirika; ²³ Iti Kristo lazima apate bhwasi, na eneoka wakubhoka kurusha hena bhefuiye na kubhonyanya kiangaji hena bhandu bha Kiyahudi na bha Mataifa. ²⁴ Paulo emekenje kukukani, Fesito akateta na ngori, "Paulo, una luhungu; Kukulosha kubaha kwakugera luhungu." ²⁵ Kake Paulo akaghamba, "mii nisina luhungu, chedi m'no Fesito; kake ng'iria niteta bhiteto bhia kididi mwaji. ²⁶ Amuu M'fumwa emaije bhindu ibhi, na niteta mwaji hakwe, amu nitwarije iti bhindu ibhi bhisibhisike hakwe; amu bhindu ibhi bhisihiriwe hebhisike. ²⁷ M'bhaing'idaki bharoti, M'fumwa Agrippa? Nitwarije uing'idaki." ²⁸ Agrippa akam'bhura Paulo, "Hena igheri ifuhi uidima kunikengerija mii nioke M'kristo?" ²⁹ Paulo akaghamba, "Nitasa hakwe Izubha, iti hena igheri ifuhi kana ieza, esiwe tiki, kake hata bhala bhose bhanisikija mii yoo, bheoka saa mii, kake bila luse lwa kichungo. ³⁰ M'fumwa akaimuka, Gavana na Berinisi, na bhala bhoes bheikesi hamwe na bhoo, ³¹ bhemefume na nara bhebhokie kutindiana na kughamba, " Uu mundu asahira kindu kimuinara kufa kana kuchungwa. ³² Agrippa akam'bhura Fesito, "Uu m'ndu ekishighirijwa akicha esechuiye rufaa hakwe Kaisari."