¹ Na uko Anitia hena ikanisa labho, heokie na bharoti na bhalosha. Nabho ne Barinaba na Simioni (ula eitangwa Nigeri), na Lukio ula Mkirene, na Manaeli (mndwabho ndeni mmwe mfumwa Herode),na Sauli. ² Ikaoka iti mari bhetasa na kuchunga Ngoro Mshenete akaghamba, ''Nisabhurieni Barinaba na Sauli, bhanihirie ndima ila nabhaittangia''. ³ Bhekimekenje kuchunga na kutasa, bhakabhabhikia maghaza kubhatasia, ukwade bhakabhaaghanya. ⁴ Barinaba na Saulo bhakamsikija Ngoro Mshenete bhakasea bhakatonga ipe la Seleukia. Aho bhakaonja ngalawa bhakazoka mtano Kipiro. ⁵ Magheri bheokie kighongo cha salami, bhakachila kiteto cha Mzuri hena masinagogi ma Bhayahudi. Bheokie pia na Yohana Mariko ekibhaghenja ndima. ⁶ Bhakaronga bhakabhetia ghati na ghati ya isanga ilo lose mtano bhakafika Pafo. Aho Pafo bhakamkicha mghanga m'mwezu Myahudi, mroti wa maungo, eitangwa Bari-Yesu. ⁷ Mndu uo eokie mbuyae akida m'mwe echee eitanwa Serigio Paulo. Akida uo akabhaitanga Barinaba na Sauli bhaze hakwe ekioka na nyami ya kusikija kiteto cha Mzuri. ⁸ Kake Elima, (kieza cha izina la ula mghanga,) akakunda kubhakinda Barinaba na mghenji wakwe bhasimchilie ula akida ndumi ja Mzuri, na akaghesha kumketa uo akida asioke na luingidaki hakwe Mzuri. ⁹ Kake Sauli, eye eitangwa Paulo, ekioka na Ngoro Mshenete, akamngolia ijiso ¹⁰ ula mghangha akaghamba, ''We mwana wa ula mkeleki, uizue mihiro mibhibhi na bhuring'a, we eye uu mringa wa bhila bhiose bhiinare, amba unereshigha kukoda zia ja Mzuri jirongeke?'' ¹¹ Na too iki, mkono wa Mzuri woho wanga yako, jkmunerebajika meso usibhone zano hena igheri ili. Aho aho meso makwe makagwa narumbe na kija. Elima akabhoka kurima rima aho eenda mndu wa kumgura mkono ambhonye zia. ¹² Ula akida ekimerebhone icho chahirika akaoka na luingidaki hakwe Mzuri amu malosha ma Mzuri memuitalishe. ¹³ Ibhio bhikimesie, Paulo na bhaghenji bhakwe bhakakwea ngalawa bhakazoka bhakatonga Perige ha isanga la Pamtilia. Aho niho Yohana ebhashighie akahunduka Yerusalemu. ¹⁴ Bhakafuma Perige bhakazoka mtano Antokia hena isanga la Pisidia. Msi wa kutasa bhakaingia hena isinagogi bhakaikasi. ¹⁵ Kitamo cha sharia yakwe Musa na bhila bhia bharoti bhikimesomwe, bhala bharongori bha ilo isinagogi bhakatuma muondo habho Paulo bhakabhabhura, ''Bhamndwetu, kaja muhete ndumi yose iinare na yakugera ngoro tubhureni.'' ¹⁶ Niho Paulo akaimuka akabharongia mkonpo akabhabhura, '' Lanye bhome bha Israeli na bhose bhala bhemwanjela Izubha, sikijeni. ¹⁷ Izubha wa bhandu abha Israeli, ebhasabhure bhapapa bhabho na akabhaketa kubaja na kuoka bheingi, igheri bheokie hena isanga la misiri, na hena mkono wake akabhangola uko. ¹⁸ Na hena igheri lidindikia sa miaka makumi mane akabhagumiria uko ha ishighati la ngarange. ¹⁹ Izubha wabho akabhalelia na kunyamara masanga mafungate uko Kanani na kubhainga maoke bhugabhi bhuabho. ²⁰ Ebhahirie ibho bhiose hena igheri la miaka maghana mane na makumi masano. Ukwade Izubha akabhainga bhachili bhakabharongoria mtano igheri lakwe mroti Samweli. ²¹ Ikafika handu bhakamsemba bhaingwe mfumwa, Izubha akabhainga Sauli ara Kisi, wa mbare ya Benjamini. Akabharongoria igheri la miaka makumi mane. ²² Akamngola Sauli ha bhurongori bhua kifumwa chakwe, akamsabhura Daudi aoke mfumwa wabho. Ni uwo Daudi eye Isubha emwanjele akaghamba, ''Nambhona Daudi mwanake Jese, mndu eizihirija ngoro yangu; eye enerehira bhila bhiose nikundie.'' ²³ Kufuma ha ibhee la mndu uu, Izubha abhaetie Israeli mkija, eye ni Yesu, sabhundu eghambie. ²⁴ Kake esa ichi kihirike, Isubha emrongoje ini Yohana abhachilie Bhaisraeli bhashighe ng'oki jabho bhatizwe. ²⁵ Igheri Yohana ekikenja ndima yakwe ebhabhurie bhandu, ''Mohomuosha iti mi niani? Amba mi niyee, kake yoeni amu enereza ukwade, eye nisiinare ata kulegheja mikwa ja bhiratu bhiakwe.'' ²⁶ Bhamndwetu, bhana bha ibhee lakwe Iburahimu, na bhala muoho nabho ebho bhemtasa Izubha, ni hetu bhose kiteto ichi cha lukio chatuziia. ²⁷ Amu abho bheikaa Jerusalem na bharongori bhabho tebhemtisibhe bho, sabhula bhundu bhesiitomoki bhitamo bhia bharoti bhenasomiwa misi jose ja itasi, na hena hubho bhekahira bhila ebhio bharoti bherotie bhakachwa mburi iti Yesu akomwe. ²⁸ Bhakamsemba Pilato achwe mburi iti akomwe, ata bhekimeende bhubhibhi bhuake bhakabhusobha. ²⁹ Bhekimekenje kuhira bhila bhiose bhirotiwe ni bharoti wanga yakwe, bhakamseja sii ya ula mti eng'angiwe bhambhika na mbira. ³⁰ Kake izubha akamketa aruke ha bhefuie. ³¹ Na hena misi miingi akabhonekana ni bhala efumie nabho Galilaya akaza nabho Jerusalemu. Ebho iki nibho bhakara bhakwe ha bhandu. ³² Hena hubho icho nicho chotuketa tubhachilie ndumi jedi jila bhapapa bhetu bhebhuriwe ni bharoti iti jinereoka: ³³ Na Izubha atuinga swi bhana bhabho lusiligi lwa kubhona icho ebhabhurie bhapapa bhetu, hena kuoka iti amketa Yesu aruke. Ichi necho chetamiwe hena luombo lwa keri: 'We niwe Mwana wangu, naoka Bhabheo yoo.' ³⁴ Na hena bhula emketie aruke kufuma ha bhefuie esa mwiri wakwe usishine, itamiwe hubhu, 'Ninebhainga unywi bhishenete bhiakididi, bhila Daudi ebhatasie.' ³⁵ Ichi nicho ehoeghamba hena luombo lungiwa, 'Esikamshighe Mshenete Wakwe anyamarwe ni kifwa.' ³⁶ Amu ata Daudi hena igheri lakwe emerehire bhila Isubha ekundie, esobheke, mwiri wakwe ukanyamarika, na ngoma yakwe ikabhikwa hamwe na ja bhakakaye. ³⁷ Kake uu eye Izubha emketie aruke teshiniwe ye mwiri. ³⁸ Hena hubho bhamndwetu, itisibhikane henyu iti, ni ha uwo eye ndumi ja kushighiwa ngoki tohotujichila. ³⁹ Kubhetia ye, kila eye emwingidaki eneoka einare ha bhila bhindu ebhio sharia yakwe Musa ikinamtara iti teinare yee. ⁴⁰ Ena hubho mukuyoe bhila bhindu bharoti bherotie iti bhineregura bhandu bhisibhazie. ⁴¹ 'Munisikije nywi mna ludao, mnereitalwa msie! Amu hena ndima nohonihira misi ja yoo; Ndima eyo temwikaiingidaki, ata akicha mndu ekubighia lugunda.'" ⁴² Paulo na Barinaba bhakaoka iti bhehobhefuma, bhandu bhakabhasemba bhaze msi wa itasi bhachile bhiteto ibho. ⁴³ Igheri la kutasa likimesie, Bhayahudi bheingi na bhala bhenatasa kuatera zia ya kutasa ya kiyahudi bhakamwatera Paulo na Barinaba, akateta nabho na kubhagera ngoro bhaikae ha mvono wakwe Izubha. ⁴⁴ Uo msi wa itasi umerefike, hafuhi kighongo chose kikatorana aho kusikija kiteto cha Mzuri. ⁴⁵ Bhayahudi bhemerebhone isanga lose ilo la bhandu bhakaketa kiru, bhakabhabhura bhandu iti bhetehobhekengwa na bhakamrigha Paulo. ⁴⁶ Kake Paulo na Barinaba bhakateta na ngiria mbaha bhakabhabhura, ''Cheinare iti kiteto chakwe Izubha kibhaziie ini, na kihirike hubho, kake m'merekisue na kukibhona iti kisina mbucha na iti bhusima bhua ndarasi tebhubhainare nywi, yoeni iki yatuketa kubhagharukia bhandu bhengi. ⁴⁷ Amu ni hubho Mzuri etuaghanye tuhire akatubhura, 'Nakubhika uoke kiangaji cha bhandu bha masanga mengiwa, esa uete lukie masangeni hose.'' ⁴⁸ Abho bhandu bha masangeni bhekimesikie icho echila, bhakaizihiriwa na kukiisisa kiteto cha Mzuri. Na bheingi bhala bhuzima bhua ndarasi bhuebhatarie bhakaoka na luingidaki. ⁴⁹ Na kiteto cha Mzuri kikazarika isanga ilo lose. ⁵⁰ Kake bhala Bhayahudi bhakabhasosoia bhache bhazuri bhala bhekungolie ha ndima ya Mzuri, hamwe na bharongori bhose bha isanga ilo, bhabhasue Paulo na Barinaba nabho bhakabhakinya mtano bhakabhangola shighati ya mihaka jabho. ⁵¹ Paulo na Barinaba bhakagumirian ibho, bhesibhabhurie chochose, bhakatonga jabho. Bhakaronga zia bhakatonga Ikonia. ⁵² Na bhala bhakiristo bhebhashighie aho bhakaizihiriwa, na Ngoro Mshenete akaza wanga yabho.