¹ Na yeokie iti magheri Paulo na Barinaba bheokie Ikonia, bheingie ha isinagogi la Bhayahudi, bhakachila ndumi ejo jiketie mbotu mbaha ya Bhayahudi na Bhayunani kumuuhia Mzuri. ² Kake Bhayahudi bhala bheokie bhesina lusiligi na ndumi ijo bhakabhasosoiya Bhayunani bhabhasue abho bhamndwabho bha kingoro. ³ Bhakaikaa aho Ikonia igheri ieza, bhechila ndumi ja Mzuri bhesina fole amu zinya ja Mzuri jeokie wanga yabho. Izubha mwenye akabhajughuia na kubhainga bhandu mvono wake ula unaza kubhetia kiteto chakwe, akabhaketa Paulo na Barnaba bhahire maitalisho. ⁴ Ila mbotu ya bhandu hena kighongo icho ikaghabhanyika, bhengi bhakaoka bhewaho mbai ya bhandumi na bhengiwa mbai ya bhala Bhayahudi. ⁵ Ikafika igheri Bhayahudi na Bhayunani bhakagheshijia kubhasosoia bharongori bhabho bhabhahirie bhibhibhi na kubhabigha manoo Paulo na Barinaba. ⁶ Bhemeremanye icho, bhakadindika bhakatonga Likonia, Lisira na Deribe na masanga ma hafuhi, ⁷ na aho bhakachila kiteto chakwe Mzuri. ⁸ Aho Lisira heokie na mndu m'mwezu ebhiie maghu too kubhoneka, eokie esiidima kubhata. ⁹ Uo mundu emsikie Paulo echila. Paulo akamyoa meso na kubhona lula luingidaki eokie nalo lwa kukijwa. ¹⁰ Akamtetia na ngori mbaha akambhura, ''Imuka.'' Ula mndu akapehuka, akabhoka kujunguluka junguluka aho. ¹¹ Ila mbotu ya bhandu ikimebhone kila Paulo ahira, bhakakweja ngori bhakateta hena lumi lwa Kilokonia bhakaghamba, "Ngoma jatuziia hena fana ja bhandu." ¹² Bhakamwitanga Barnaba ''Zeu'' na Paulo ''Harime'' amu bhebhonie iti nie eokie mchili. ¹³ Mrisha wa ila ngoma iitangwa Zeu eye kisiko chakwe cheokie shighati ya kighongo icho, akaete zao na bharo ha mvera wa kighongo icho, esa ye hamwe na mbotu iyo ya bhandu bhangole itasi. ¹⁴ Kake Barinaba na Paulo bhekimesikie kila bhekundie kuhira, bhakagura mtwi bhakabh adindikia ¹⁵ na kubhabhura, ''Bhaisanga, nize mkundie kuhira bhindu ibhi? Uswi ni bhandu sanywi. Twaza kubhaetie ndumi jedi iti msitase ngoma iji ejo jisina lughenjo, kake mubhike luing'idaki lwenyu hakwe Izubha eikaa ndarasi, ula eye elungie wanga na sii, na mape, na kila kindu chose bhihete. ¹⁶ Aho kae Izubha ebhashighirie bhandu bhahire kihabho, ¹⁷ Kake ehirie bhindu esa akubhonyanye iti ewaho, ehirie bhiedi kuete vua na kijo hena magheri makwe,akabhaibhusha na kubhaizihirija.'' ¹⁸ Lumolesha ulo lwabho Paulo na Barinaba lusejie luing'idaki lwabho kungola itasi ilo, kake bherinake hena ngoro jabho bhekundie kungola itasi ilo. ¹⁹ Kake Bhayahudi kufuma Antonia na Ikonio bhakaza na kubhasosoia bhandu bhambighe mano Paulo. Bhakambigha na kumbulula shighati ya kighongo bhekiosha iti afwa. ²⁰ Bhandumi bhakaza bhakaimuka kumjunguluka. Akaimuka na kuhunduka ndeni ya kighongo. Heabho lake akatonga Derbe hamwe na Barnaba. ²¹ Bhakachila ndumi jedi ja kiteto cha Mzuri hena kighongo icho mtano bhandu bheingi bhakagharuka bhakaoka bhandumi bha Mzuri. Ibhi bhiose bhimehirike bhakahunduka Lista, bhekabhetia Ikonia mtano bhakafika Antiochi. ²² Hena bhighongo bhiose ibhio bhebhihundukie, Paulo na Barinaba bhebhagerie ngoro bhala bhaloshwa bhasha na kubhagera lumolesha bhagurie luingidaki ulo. Bhakabhabhura iti esa mndu aingie ha kifumwa cha Izubha, enebhetia bhuasi bhuingi. ²³ Hena kila mbotu ya bhandumi abho bhasha bhakabhasabhuria bharongori, bhakachunga na kutasa hamwe nabho ,na bhekimekenje kuhira ibhi bhiose, bhakabhabhika msongorana ha Mzuri, eye bhebhikie luingidakilwabho hakwe. ²⁴ Bhakafuma aho bhakabhetia kighongo cha Pisidia mtano bhakafika Pamfilia. ²⁵ Bhemerefike Periga bhakachila kiteto cha Mzuri na bhakaronga kutonga Atalia. ²⁶ Kufumia aho bhakakwea ngalawa na kutonga Antiochi, hala eho bhetasiwe bhauhie lubhoro lwa Izubha hena ila ndima eyo bhafikija tiricho. ²⁷ Aho Antiochi bhebhaetie bhandu bhose hamwe, bhakabhabhura bhindu bhiose bhila Izubha abhaghenja kuhira na bhula Mzuri mwenye abhajughuia lughwi bhandu bha masanga mengiwa bhaingie bhaoke na luingidaki hakwe. ²⁸ Bhakaikaa aho hamwe na abho bhandumi bhengiwa igheri ieza.