¹ Iki mati mala Mfumwa Herode,erongie mkono wake ha bhakristo esa kubhainyala. ² Akamkoma Yakobo mndwabho Yohana na mhandi. ³ Ekimebhone kila ahira chabhaizirija Bhayahudi, akamgura wa Petro. Iyo yeokie ni misi ya mikate isigerwa amira. ⁴ Ekimemgure akamgera jela akabhika mbotu nne ja malong'oni ja kumrinda esa anamfunye mati Pasaka yabhetia/yasia. ⁵ Iki Petro akabhikwa jela kake bhakristo wakamuombea na lunyariki hake Izubha. ⁶ Kabla mfumwa Herode esimemngole, icho kio Petro okie eshinjie ghati ya malong'oni bheri echungiwe minyororo miri; na malong'oni bhengi bhokie bhekirinda lughwi lwa shighati lwa jela. ⁷ Kamtungo, malaika bhake Mzuri bhakamfumia aho aho na kiangaji kikabhonekana ndeni ya jela, kikambigha Petro mbai mmwe kikambhusha akaghamba,"Bhuka ugwangu". Na minyororo hena mikono jikagwa "malaika akambhura "Kudokanye na udoke bhiratu bhyako." Petro akahira hubho. ⁸ Malaika akambhura wa, "Chunga ileleta lako la shighati uniratere". ⁹ Hubho Petro akamratera malaika na kufuma nae. Osokie emaije iti kila kihiriwe ni malaika ne cha kididi, okie eosha iti eteokie ebhona ndoto. ¹⁰ Mati Bhemebhetie askari wa kubhoka na wa keri bhefikie hena lughwi lwa menya lwakubhatika hena kighongo,lukajughuka lujenye.bhefumie shighati na kugura zia, malaika akamshighia aho. ¹¹ Mati Petro ekumanyie, akaghamba, "Iki natwarija kididi iti Mzuri amtuma malaika kunifunya hena mkono wake Herode, na magheshijio ma bhandu bha Kiyahudi." ¹² Ekimetisibhe hubho akatonga hena nyumba yake Mariam mee Yohana eye izina lingi emanyikane sa Marko na bhakristo bhengi bhokie bhatorana aho bhetasa. ¹³ Ekimegonge lughwi la mvere ,mhiri ndima eitangwa Rhoda niye etongie kumchunguia. ¹⁴ Na ekimesikie iezi lake, Petro akaizirihiwa mpaka akaremwa kumchunguia badala yake akahunduka ekimatuka chumbani na kughamba iti Petro eimuke hena lugwi lwa shighati. ¹⁵ Hubho Bhakambhura, "We una luhungu." Kake akabhahakikishia iti neye. Bhakaghamba,"Uo ni malaika wake". ¹⁶ Kake Petro akaendelea kugonga lughwi na bhekimemjughuie bhakabhona iti niye bhakaitalwa mno. ¹⁷ Petro akabhabhonya na mkono bhahuje na akabhabhura bhundu Mzuri emngolie jela.Akaghamba," Mbhureni Yakobo na bhandugu ibhi bhindu."alafu akafuma na kutonga handu hengi. ¹⁸ Iki hekimeche bhala malong'oni bhekaingiwa ni fole mburi yake Petro. ¹⁹ Mati Herode emwendie na kumsobha, ekimechunguze bhala malong'oni akaghamba bhakomwe.Hubho akafuma Yudea akatonga mhaka Kaesarea akaikaa uko. ²⁰ Iki Herode akareghijishwa mno ni bhandu bha Tiro na Sidoni. Bhemtongie bhose handu hamwe. Bhekamsemba Blasto mhiri ndima wa Mfumwa abhaghenje. Aho bhekasemba lubhoro, amu Isanga labho linauhia kijo kufuma ha Isanga labho Mfumwa. ²¹ Ula msi bhebhikiane ukimefike, Herode edokie suke ja mfumwa,akaikaia kichumbi cha kifumwa na kuteta nabho. ²² Bhandu bhakabigha kilozo, "Ii ni ngori ya ngooma esi ya mundu!" ²³ Aho aho malaika wake mzuri akamgusha sii amu osokie amuinga Izubha nguma,akaliwa ni manyongo akafa. ²⁴ Kake kiteto chake Mzuri kikaeha na kuongejika. ²⁵ Mati Barnaba na Sauli bhekimekenje ndima uko Yerusalemu, bhemuonjie Yohana eye izina lingi emanyikane sa Marko bhakahunduka nae.