¹ Iki mitume na bhala bhandugu bhokie Judea bhekasikia eti bhandu esibhayahudi bhauhia kiteto chake Izubha. ² Petro ekimeze Jerusalem, bhala bheaminie hena kitabhani bhakam'bohia; ³ Bhakambhura, "Nize ukurunganye nakula na bhandume bhesitabhanwe!" ⁴ Kake Petro ekabhatindia iyo mburi mwaji;akaghamba, ⁵ Nookie niomba hena kighongo cha Joppa, na nikabhona hena maono kibhunge kisea, kibhunge kioho ndeni ya iseto kisea kufuma wanga lila iseto liguriwe hena mala malucholo mane. Liniseiya. ⁶ Nikiyoiye na kukigheshijia. Nikabhona jila nyamao ja maghu mane ja isanga, nyamao ja kititoni, matete menyangaluka na ndeghe ja wanga. ⁷ Hadongo nikasikia iezi linibhura, '' Petro imuka,koma ule!" ⁸ Nikaghamba,''Hai Mzuri, kindu kisiinare na kichafu kisimeingia hena momo wangu." ⁹ Kake iezi kufuma wanga likanibhura wa,''Bhindu Izubha aghamba bhizerie usi bhiitange bhichafu''. ¹⁰ Icho kinifumie kandu katatu, ade bhindu bhyose bhikahunduka wanga wa. ¹¹ Kamtungo, bhandume bhatatu bhekaimuka msongorana wa nyumba hala handu tweoho; bhatumwa hangu kufuma Kaisaria. ¹² Ngoro Mshenete akaniguria nitonge nabho na nisibhabhelue. Abha bhandugu bhatandatu bhekatonga nami mhaka na ila kaa ya ula mndume. ¹³ Akatutindia bhula mbhundu ebhonie malaika eimuke ndeni ya nyumba yake na kughamba, ''Tuma bhandu Joppa bhamuitange Simion, eye izina lingi eitangwa Petro. ¹⁴ Enekutindia mburi inekuinga kuokoka - we na bhandu bhako bhose." ¹⁵ Mati nibhokie kuteta nabho, Ngoro Mshenete akaza wanga yabho, sa bhundu ezie hetu kubhoka ¹⁶ Nikakumbuka bhiteto bhya mzuri eghambie, ''Yohana ebhabatize na mbombe, kake mnebatizwa na Ngoro Mshenete.'' ¹⁷ Iki kacha Izubha amua kubhainga tona ilaila sa ila etuingie uswi mati tukimemwiing'idakie Mzuri Yesu Kristo, mi neani, nimsuiye Izubha?" ¹⁸ Bhekimesikie ibho bhindu, bhesitetie kindu kutalua kake bhekamwisisa Izubha na bhekaghamba, ''Kabhe Izubha abhainga maisha ma kuokoka bhala esibhayahudi nabho.'' ¹⁹ Hubho bhla bhemwamini ebho bhala bheteseke mati ma kifa chake Stephano bhezarike kufuma Yerusalem - bhala bheamini bhekatonga Foineke, Kipro na Antokia. Bhetikie ndumi yake Yesu ha Bhayahudi tiki, na esihabhandu bhengi. ²⁰ Kake ghati yabho, ha bhala bhakiume bhekafuma Kipro na Ukirene, bhekaza Antokia na bhakateta na kuhubiri ndumi yake Mzuri Yesu Kristo ha bhayunani nabho. ²¹ Na mkono wake Mzuri wokie nabho; bhandu bheengi bhekaamini na bhekamgharukia Mzuri. ²² Mburi jabho jikafika ha masikio ma ikanisa la Yerusalem: bhekamtuma Barnabasi hae mpaka Antokia. ²³ Emefike akabhona tona yake Izubha, bhundu iyoho akaizirihiwa na akabhasosoiya bhose bhaikae ndeni yake Mzuri na ngoro jabho jose. ²⁴ Amu ye mwenye eokie mundu wedi eizue Ngoro Msheneto na imani, na bhandu bhengi bhekaengejeka hake Mzuri. ²⁵ Ade Barnabasi akatonga Tarso kumuyoa Sauli. ²⁶ Ekimem'bhone ekam'ete Antokia. Ikafumia eti hena, mwaka mzima bhetorane handu hamwe na kanisa bhelosha bhandu bhengi. Bhaloshwa bhekaitangwa cha kubhoka bhakristo uko Antokia. ²⁷ Iki hena iyo misi bharoti bheseiye kufuma Yerusalem mhaka Antokia. ²⁸ Na mwezu wabho, eitwanga Agabo, akaimuka na kubhetia hena Ngoro Mshenete akabhonyesha eti zaa mbaha inefumia Isanga lose. Iki kifumie hena misi yake Klaudia. ²⁹ Kwa hubho, bhaloshwa, kila m'mwezu kuringana na luidimo lwake, bhekaamua kutuma lughenjo habhandugu bha Judea. ³⁰ Bheketie hubhu; bheingije bhibala ha bhaghosi kubhetia ha mkono wake Barinabas na Sauli.