¹ Ebeleeni kinkih, akuma isani magaanih keesani barsiisituh itaatanumuh, aka nuti beenyu suni aka nutini adaawa guduyuh d'ak'amna. ² Malyenani nuh t'uut'umah dirbuh gudaani gufana. Woh anamah ani dubih isaatini hingufane abaani sunin k'it'a jiru, kah dendee nafa isah t'uut'umah ara ijetu. ³ Teemtana woh nutini farda keena gabangabeh afaaanih nenyu iniileni nuh ch'akasa, deewineh nafa isaanih t'uut'umah galgalchina. ⁴ Hoboloh leh barad'ah, woh ishiini gugurdah itaatehamaleh bubeesa guduyuh ni ishih d'iiu, ishiini himich'iirani eegatih dik'iyoh kah geesuh suni garuma iniini fed'u gula gorsa. ⁵ Akumsuleh arawa ini hunyih tokocha tah nafa ati, akuma aadah wunih magaada ani ufa olfuud'a. Akumsuleh badaani guduyuh amoh k'aank'atih ti guwa. ⁶ suniifi arawa ilene abida, d'uniah namseh magaadah hah hunyeeni nafa keenah kasaati mid'aasani, suniini nafa t'uut'uma yake deewieh abida iti kaaye uumama dirbuh t'uut'umah, yoh isa nafa abida naanah tini guwani. ⁷ Bineesa lagah kah aka t'uut'umah, shimbireh ah yoh tah garaani sich'u, deewieh tah maanya kasaati uumamte hihoratani amaleh anamah ani baiyah horate, ⁸ amoh tokocha kah anamah kasah kah dendee arawa horate hinjiruh; iniini wunih hamtuh tah ufa hingosine, had'ah hamtuh duwaati is a imeek'e. ⁹ Nutini arawa ani Aaboh faarsina amaleh Aaabah, amaleh isaani anamah abaara kah ama gaandido Waak'a atini mid'aasani. Afaanuma suni kasah eebuma afi abaarsuh dubatane. ¹⁰ Ebeleeni kiyah, wunih ni tuni hiinteini. ¹¹ Madini dendee bisaani miyaa afi had'ah gidi yaasah? Ebeleeni kiyah, muka t'iinih ah dendee zab'iib'uh hind'alah, yoh muka zab'iib'uh ah dendee t'iinih hind'alah? ¹² Akumsuuleh mada bisaani kuraa dendee bisaani miyaa himbaasu. ¹³ Oono kah isani kesa k'aroah yoh wih beeku? Abaani suni wah hujih isah kasaani teesoh daansah d'egersiisuh omsah k'aruma kasah d'uptuuni. ¹⁴ Amoh yoh isani hinaaafah d'ukuduh k'abdanih amaleh donyuma ona kasah k'abdanu, ufa olhimfuud'inah amaleh d'ara d'ugah gula hindubatinah. ¹⁵ Ishiini tuni k'aruma gara aranah lafa gula d'upteemuh, urgi ishiah tah d'uniah ati yoh tah haraatimuh, babaduma. Malyen ¹⁶ ani bereh hinaafah afi donyumtiini jirtu, bereh suni wili d'egeechani hinjirtuh amaleh tochih hamtuh t'uut'umash bereh suni jirti. ¹⁷ Amoh k'aruma gara aranah dursah k'uk'uloh duuni nageh daansah laana iti ideemah, ona adih, namsah magaadaafi mid'aani muka daansah, iniini dega d'iwih ara hinch'iisuh, deewieh d'uguma. ¹⁸ Amaleh mid'aani muka d'ugaa himbuusani gara dega nageh mid'aasitu.