¹ Wilini d'ewinsah wilini moromah isani kesa eesah d'upteh? Lola wiliini wulwoldeah teesanu suh k'ajeelah teesani hamtuh kasah hind'umneh? ² Wunih isaani hink'amne afi wilik'ajeelatani . Hinijeeptanih amaleh wilik'ajeetani wunih isaani dendeechani hind'ak'amne afi. Hinloltanih amaleh wulmoromtani amoh dendeechani hind'ak'abdanuh malyenani Waak'a hingafatanuh. ³ Hink'ad'atani amaleh hind'ak'abdanuh, malyenani wunih hamtuh k'adatani duuni moma kesaani hama suni mid'aafatani. ⁴ D'aimtuh! himbeechuh jala d'uniah itatini nyaapa guduyuh Waak'a ati suniifi anamah t'uu'tuma kah jaala d'uniah ufa tochuh hah nyaapa Waak'a ufa taache. ⁵ Malsuh isaani wunih d'aara isheetani aka k'itaawa dubatuh suni aka Hara iniini nutih kana suni gudah hiinafah nuh ara k'abduu? ⁶ Amoh Waak'a ini gudah ona dada kane, suniifi k'itaawih ni wah inini yed'e, ''Waak'a ini anamah ufa olfuud'uh dideh amoh dada itikane dega ufa labusituh suh.'' ⁷ Suniifi, Waak'a ini ufa kana. Ekerah dapsad'ah amaleh isaani birah kaatah. ⁸ Waak'a ati diyaad'ah iniileh isaantih diyaatah. D'ik'ad'aa harka keesani namseh ona teesani ufa K'uk'uulomsah, isaani kah ona lamalaamani. ⁹ Yuula, amaleh booya! Kolfa keesani galgaachah yuula tochah amaleh gamaadah keesani ufa moma toocha. ¹⁰ Ufa laabusah Waak'a dura, iniileh isaani olfuudah. ¹¹ Anamah wiliini hihamatini abeleesa, anamah abeleesa isaatih hamatuh amaleh abeleesa adaawa amaleh seera suunti hamaata amaleh seera Waak'a sunih adaawa. Amoh odooh amaleh atih seera adawituh atih anamah seera mid'aasumuh amoh hin adaawitah. ¹² Tokotuyuh kah seera gidibaase amaleh adaaweh Waak'a, kah dendee anamah jiraachise amaleh yayak'uh atih oni kah olah tenteh adaawituh? ¹³ Ch'akaasah isaani kah dubatuh, ''Guyah kana yoh boruh gara k'ara suni yaana amaleh gana teenye kesa amaleh huji mid'aasine tah itid'altuh d'akamna . ¹⁴ Oni kah wunih boruh midaamfatuh beek'uh amaleh jireena kenkeh mamaalih? Amoh isani aka d'aamfah isa dergani wogah d'ikiyoh amaleh eagiah berebedani. ¹⁵ Silaateh aka dubatani, ''Wah ishiini dendeeche Waak'a itaate, hinteteenye amaleh ishitana afi ishinsuh mid'afaana'' ¹⁶ Amoh tentah isani ufa olfutaani wunih tetesanifih ufa olfuud'ah t'uut'uma kah akakana kuuni hamaa. ¹⁷ Suniifi kah d'ugah mid'aasah beek'u amoh himid'aasine gara abah suni namseh.