¹ Ebeleeni kinkih, abdih Aaboh keena Yeesuh Kristoh ah Aaboh gudina, garaani kana feetanih amaleh hinjibinah. ² Amoh woh anamah ani wili woldeh teesani isheenu amaleh wayah afi k'uweh k'aalima kaayatu, deewieeh kah deegah wayah t'uriatini isheenu, ³ duuni kaateh nama wayah daansah hid'atu suniini yetu, "Rhaaleh fed'ed'ih fed'ed'ih beenih d'ek'ih bereh daansah tana taai,'' amoh kah deegah suniini, "Bereh suni ijed'i," yoh, "Miila kinkih kana jala taau yetunu,'' ⁴ atini adaawa mid'aasah harkah k'abdih isani kesa, amaleh isani hah mooguh moam hamah itaatani? ⁵ beleeni kinkih kah fed'iah, Waak'a ini deegah d'uniah tah fook'eh, kee halak'ah abdih kesah hintochineyuh amaleh d'aalmeh hayuh iniini d'aame dega isa feetu gula? ⁶ Amoh isani deegah balfitani! Halak'ah muyuh kah isani shakaweh, amaleh isaanimuh kah mooguh isani muh kah gara mooguah isani geesu? ⁷ Halak'amuh kah mak'ah daansaani isaniini waamanu abaaru? ⁸ Akumsuleh, woh isani seera k'it'eesitanu, aka baruh Waak'a ah kasaati bareesani, "Olah keesani fed'ah akuma isani ufa feetanu," wunih daansah mid'aasitani. ⁹ Amoh woh anamah d'iwih ara feetanu hah namseh, seerini isani k'awata, aka ch'apsituh seera. ¹⁰ Malyenani woh isani seera t'uut'umah k'awatanu, amaleh gufatanu urga tokochani hah t'uut'umah ch'apsitani. ¹¹ Malyenani Waak'a kah "Hindaaimini yed'e, sunumaati anamah hiinjeesinah,' yed'e. Amoh woh isani hindaaimini amoh anamah ijeeptanu hah sera Waak'a ah ch'apsitani. ¹² Suniifi dubad'ih amaleh k'awad'i aka dega seera nageah adaawinsah fed'u. ¹³ Malyenani adaaawini isah kah naasuh hink'amne d'ufa dega naasuh hind'egersiisiniti. Naasuh ni adaaawa dapsati! ¹⁴ Wunih daansu aka atamiiti, ebeleeni kinkih, woh anamah ani ana abdih k'awah amaoh tochih hink'amne, abdih suni isa jiraachipti? ¹⁵ Woh ebeleesini wayah afi segeleh guyah t'uut'umah hink'amne, ¹⁶ amaleh tokochi wah iniini yed'uuni, " beenih nageani idemi yed'uuni, amaleh aka daansah nyaad'i," amoh wunih nafa ani iti hinkanine daansuma maalih k'abdi? ¹⁷ Akumsuni abdih ni k'ofah ishiah woh hujih hink'amne, hah duute. ¹⁸ Amoh anamah d'iwiini wah iniini yed'u, " Atini abdih k'abdah, amaleh ana hujih k'awa." Abdih tenteh tah hujih hink'amne ana d'egersiisi, amaleh aaleni abdih tintih sih d'egersiisa hujih tiyaani. ¹⁹ Atini hiabdata aka Waak'a ini tokochah; atini d'ugah k'abda. Amoh babadah leni ishih suni hiabdateh amaleh hoholati. ²⁰ Atini baranoh feetah, nama rhaatuh, aka abdih ni k'ofa ishiah bachoah? ²¹ Abramuh ni kah abdatuh keenah hind'goomsinefiyuh hujiani mala iniini gurbah isah d'akaacha baasih ah araati baase? ²² Atini hind'egertah aka abdih ni hujih ani tochih mid'aasite, amaleh hujih ani tah ishiini feetu k'it'eesite. ²³ Baruh hah k'it'eesani tah wah ishiini yete, "Ibrahimuh ni Waak'a abdate, suniini dendeechah d'ugaa iti kanani."Suniifi Ibrahimuh jaala Waak'a ah yed'anih waamani. ²⁴ Atini hind'egerta aka anamah hujih ani d'ugoomsanih, amaleh abdih araani ch'alaamuh. ²⁵ Akumsuni amaleh Rahabuh ni tah daaimtuah hujih ishiah araani d'ugah d'ak'abde, mala ishiini ergatuh suni d'iyesifateh amaleh dirbuh d'iwiini galchite? ²⁶ Malyenani akuma nafa ini yoh hara hink'amne hah due suuleh yoh abdih ni hujih hinjire hah ddute.