¹ À klɔ́ŋmelî yefyɛ̂l túû lɔɔ̂ mɔ, Makidala jir Mariyamu ki dénno à dùkurî kpra lɛ́ɛ múmúr, butúun bè tɛ̀ŋnɛ̀n (yé); ki b'à ŋmɔ́n à dùkurî mɔkyɛ̂ kàkrɔ̂ɔ̂ bè kùnkóln lìɲɛ̀n à ŋmrɔ. ² Mariyamu Madelɛni k'á sɛtúno Simɔn se, fù nì Yesu gbɔ mɔnar kɛɛln-bisháaŋn máɛ̀, k'à wú yì se dé: «Yì ri ń Totɔn nikyɛ́ɛŋɛ̂ li li à dùkurî mɔ, ŋmɛ́ɛn w'à ɲɛnkɔ̂ŋn fɔŋn hlɔ̀ yì se bo.» ³ Piyɛri nì kɛɛln-bisháaŋn má ki li à dùkurî kpra kɔ́ɔŋn ɔ, ⁴ yì ki túno yíse á jir níin ɔ. Kɛ̀ à kɛɛln-bisháaŋn máâ kyɛ̀ŋl ki túno loké á munân ɔ à dùkurî kpra. ⁵ Fù k'á kurkpé k'á ɲáa ɲɛn, k'à ŋmɔ́n Yesu tokekɛ̂lɲɛ̀n wâ kpɛŋn-byéenî bè tɛ̀ŋnɛ̀n, ta à wo la dɛ́ bo. ⁶ Simɔn Piyɛri mun kpéɲɛ̀n à ta ín, fù ki dénno loké. Fù ki dé à dùkurî wono, k'à ŋmɔ́n à tokekɛ̂lɲɛ̀n wâ kpɛŋn-byéenî mun ni tɛ̀ŋnɛ̀n ín, ki fù mɔjal gbeɲɛ̀n ŋmɔ́n ɲáan ta. ⁷ Yì ri wâ-lɔ̂ɔ̂ mun ɔ Yesu ŋmelî tokekɛ̂lɲɛ̀n ín, yì wo fù ŋmɔ́n à wâ kpɛŋn-byéenî wɔ́se bo, kɛ̀ fù bè mɔjal búrɲɛ̀n á dɔ ɔ tíkɛ́l má mɔ. ⁸ Fù la klɛ̀ híin, à kɛɛln-bisháaŋn máâ mun kyɛ̀ŋl dénno loké à dùkurî kpra, fù ki saaŋ dé, k'à ŋmɔ́n, ki gbɔ hlɔja. ⁹ Fù b'à ŋmɔ́nɲɛ̀n, yìkun w'à tɔ̂ŋn sɛ́bɛ̂ɛ̂ mɔ ɲúrɲɛ̀n gbukɛlî mɔfáhlɔ̀ kɛŋn bo, fù mun ni wúɲɛ̀n dé Yesu ri yanɲɛ̀n ín ki ɲinɛn li jimin klômɛ́ɛ̀ tyé mɔ. ¹⁰ Fù jìrɛ̂mun kwɔ́ɔn, à kɛɛln-bisháɛ̀ŋɛ̂ k'á sɛno á tɛ̀ŋn fɔŋn. ¹¹ Fù wono, Mariyamu líɲɛ̀n wo ín à dùkurî yéen ŋmrɔ à bè hlɛɛ̀n. À hlɛfɔn k'á tutwòn à dùkurî mɔ lɛ klɛ ɔ, ¹² ki Jɔnɔsɔ ǹ tɔ́ŋrɔn jir níin ŋmɔ́n wâ lɔ̂ mɔ, yì bè ɲínɛ́ɛn ɲínɛ́nɲɛ̀n Yesu nikyɛ́ɛŋɛ̂ shîn fɔŋnî mɔ, má b'à ŋmel tɔŋn, má b'à kpaŋl tɔŋn. ¹³ Jɔnɔsɔ ǹ tɔ́ŋrêê ki Mariyamu du dé: «Bi, á ri myɛ́n hlɛɛ̀n?» Mariyamu ki yì ǹ gbukɛlî mɔli dé: «Mún ni hlɛɛ̀n bóló ɔ bo yì mún Totɔnî nikyɛ́ɛŋɛ̂ gbɔ̀n li, mún w'à ɲɛnkɔ̂ŋn fɔŋn shi yì se bo.» ¹⁴ À ri fù gbukɛlî kɛl kɔ́ŋnè híin, k'á tojìr k'á besé yi, ki Yesu líɲɛ̀n ŋmɔ́n, à w'à hlɔ̀ dé Yesu ɔ bo. ¹⁵ Yesu ki Mariyamu du dé: «Bi, á ri myɛ́n hlɛɛ̀n? Á ri gbò ɲɛ́ɛn?» Ki tɛŋn Mariyamu ǹ jɛ́ɛn mɔ d'à táŋnkún-wɔɔ̂ mɔ klɛwɔ klɛtɔnî ɔ, k'à wú à se dé: «Ń Totɔn, ákún n'à nikyɛ́ɛŋɛ̂ gbɔ̀nɲɛ̀n, à ɲɛnkɔ̂ŋn fɔŋn wú ń se, ń ki don à gbɔnké.» ¹⁶ Yesu k'à fɛ́ŋn dé: «Mariyamu!» Mariyamu k'á besé yi, ki kɛl Yesu wɔ́se eburu jɛ́ɛn mɔ dé: «Arabuni!», fù k'à lô ɔ dé kɛlɔn. ¹⁷ Yesu k'à wú à se dé: «Be ń jaɲɛn bo, bóló ɔ bo mún wo dúno kɛŋn jɔ̀nɔ̀ ɲɛ ń Tɔɔ̂ tɔŋnimɔ wà bo. Kɛ̀, don mún srɔ́ɛ̀ɛ̂ tɔŋnimɔ, á k'à wú yì se dé mún fɔn dúkɔ́ɔŋn mún Tɔɔ̂ nì yíkun Tɔɔ̂ nì mún ǹ Jɔnɔsɔɔ̂ nì yíkun ǹ Jɔnɔsɔɔ̂ tɔŋnimɔ.» ¹⁸ Makidala jir Mariyamu ki dénno à wúké à kɛɛln-bisháɛ̀ŋɛ̂ se d'àkun ni yì Totɔn ŋmɔ́n ín, k'àni gbɔɛ̀ɛ̂ nɔ̀nkurn to dèndɛn àkun se. ¹⁹ Fù lɔɔ̂ mɔ núkur gbâr ye, fù mun k'à klɔ́ŋmelî yefyɛ̂l tú ɔ, à kɛɛln-bisháɛ̀ŋɛ̂ tɛ̀ŋnɛ̀n lɔ́ɔ̂ mun mɔ ín, fù yéèê bè sa saɲɛ̀n à Yawutuìî yànbê se; Yesu ki bɛ lí yì tyé mɔ, k'à wú yì se dé: « Ɲámɔgbâl ki tɛŋn yíi se!» ²⁰ À mùfɔn máno à ló híin, k'á kpɛɛ̂ŋɛ̂ n'á kínkáarî yɛ̀n yì to. À kɛɛln-bisháɛ̀ŋɛ̂ ri fù ŋmɔ́n híin yì byéen gbɔ ki yì mɔnukwó. ²¹ Yesu k'à wú yì se yé dé: «Ɲámɔgbâl ki tɛŋn yíi se! Mún Tɔ Jɔnɔsɔɔ̂ ri fáâ mun to mún tɔ́ŋ bɛ, mún saaŋ máno yíkun tɔ́ɔŋn.» ²² Fù gbukɛɛ̀lî kɛlmun kwɔ́ɔn, k'á kɔŋn sɔŋn lú yì fléen, k'à wú dé: «Tɛ́l-Féné ki ɲínɛ́ɛn fɔŋn ŋmɔ́n yíkun mɔ. ²³ Yíkun nì bè jiminî mun nɔkɔŋl ǹ klɛ̀ gbɔjáal (besénar) saŋli, fù jiminî bè saŋlɛɛ ŋmɔ́na, kɛ̀ yíkun wo jiminî mun nɔkɔŋl ǹ klɛ̀ gbɔjáal (besénar) saŋlɛ bo, fù jiminî wo saŋlɛɛ ŋmɔ́na bo.» ²⁴ Yì ri Toma mun sɛfɛ́ɛŋn dé Ŋmal-bɔɛ, fù b'à kɛɛln-bisháaŋn jir fú-níinî má, fù wo tɛ̀ŋnɛ̀n yì wɔ́se Yesu byɛ̀ gbâr ye ín bo. ²⁵ À kɛɛln-bisháaŋn búùrî k'à wú à se fù kpɛŋnî ta dé: «Ŋmɛ́ɛn ni n̂ Totɔn ŋmɔ́n.» Kɛ̀ Toma k'à wú yì se dé: «Mún n'à kpɛŋnî kpɛ́ mwɔ́ɛ̀ɛ̂ fyɛɛ̂ ŋmɔ́n bo, mún wo ń kpɛŋnbin nɛ́n yì kpɛ́ fɔɛ̀ŋɛ̂ mɔ bo, mún wo ń kpɛŋnbin nɛ́n à kínkáar se à sàŋ fɔŋnî mɔ bo, mún w'à gbɔ hlɔjaa fífí bo.» ²⁶ Fù kwɔsé yefyɛ̂l kprɛɛn jìrɛ̂mun kwɔ́ɔn, Yesu ǹ kɛɛln-bisháɛ̀ŋɛ̂ b'á sɛtɛ̀ŋnɛ̀n yé fù lɔ́ mɔ́n byéenî mɔ, Toma bè tɛ̀ŋnɛ̀n yì wɔ́se. À yéèê bè sa saɲɛ̀n, Yesu ki dénno líkúnè yì tyé mɔ, k'à wú yì se dé: «Ɲámɔgbâl ki tɛŋn yíi se!» ²⁷ Fù jìrɛ̂mun kwɔ́ɔn, k'à wú Toma se dé: «Á kpɛŋnbin nɛ́n húnmɔ, á ki mún kpɛɛ̂ŋɛ̂ yi íin, á k'á bɔ̀ mɔtir á k'à ɲɛn mún kínkáarî ta, á ki kár gbɔ hlɔja kaarn to, kɛ̀ á ki gbɔ hlɔja.» ²⁸ Toma k'àn gbukɛlî mɔli dé: «Mún Totɔn, mún Tɔ Jɔnɔsɔ!» ²⁹ Yesu k'à wú à se dé: «Ákún ni mún ŋmɔ́n fù mùn n'à jɛ́l á ki gbɔ hlɔja a? Mɛ̀mun ni gbɔ hlɔjà ta yì wo bóló ŋmɔ́nɲɛ̀n bo, fɛ̀ la á fyâr!» ³⁰ Yesu ri shɔ́gbɔ tyɛɛ́ŋ sɔ́ɔ máɛ̀ klɛ̀ yé án kɛɛln-bisháɛ̀ŋɛ̂ ɲíɲra, mɛ̀mun wo ɲwár àni sɛ́bɛ̂ɛ̂ mɔ bo. ³¹ Kɛ̀, àniìî ri ɲwár nɔkɔ́ŋl yíi ki gbɔ hlɔja dé Yesu ki Krista ɔ, Jɔnɔsɔ Dye-Jɛnî ɛ̀, nɔkɔ́ŋl yíkun ki shi ŋmɔ́n àkun yin ɔ yíi ǹ gbɔ hlɔjaâ se.