¹ Fù jìrɛ̂mun kwɔ́ɔn, Yesu k'á byéen sɛyɛ̀n yé án kɛɛln-bisháɛ̀ŋɛ̂ to, Tiberiyadi nun-kârbrê-sɔ́ɔɔ̂ kpra. Yesu ri fáâ mun to á byéen yɛ̀n, fù rɛn: ² Simɔn Piyɛri, nì Toma mun ni sɛfɛ́ɛŋn dé Ŋmâlbɔ, nì Galile kìyɛŋnî dyɛ Kana jir Natanayɛli, nì Sebede dye-jɛɛ̂ɛ̂ ɛ̀, fù n'àn kɛɛln-bisháɛ̀ŋɛ̂ mɔ jir níin bè tɛ̀ŋnɛ̀n yíse. ³ Simɔn Piyɛri k'à wú à kɛɛln-bisháaŋn búùrî se d'àkun ni dénno yɔ fekɔ́ɔŋn. Fɛ̀ k'à wú à se dé yìkun saaŋ kɔ́ɔŋn à wɔ́se. Yì ki li, yì ki dé à kúrnî mɔ. Fù túun bwàrî nɔ̀nkurn wono yì wo bóló jà bo. ⁴ Fù wóontɛ̂lî mɔ lɛ́ɛ, Yesu bè tɛ̀ŋnɛ̀n à nun kwonî ta, kɛ̀ à kɛɛln-bisháɛ̀ŋɛ̂ w'à shi dé Yesu ɔ ín bo. ⁵ Yesu ki yì du dé: «Bisháɛ̀ŋɛ̂ ɛ̀! Lemɔ́n bóló fɔn yíkun se be a?» Yì k'à mɔli dé owo. ⁶ Yesu k'à wú yì se dé: «Yíi w'án yɔɔ̂ fe à kúrnî kìndíir bén se, yíi bè yɛ́ɛŋn jaa.» Yì k'à yɔɔ̂ feê fù kpɛŋnî ta, àn jà yɛ́ɛ̀ŋɛ̂ tyɛɛ́ŋtɛ̀ŋn nurkwɔ́ se, ki tɛ̀ŋnè yìkun nɔ̀nkurni w'à gbár li hìn ká bo. ⁷ Fù la klɛ̀ híin, Yesu gbɔ mɔnar kɛɛln-bisháaŋnî k'à wú Piyɛri se dé: «Ŋmɛ́ɛn Totɔn ɔ!» Simɔn Piyɛri wo saaŋ fù ná máá dé: «Ŋmɛ́ɛn Totɔn ɔ.» Simɔn k'án wâɛ̀ɛ̂ gbɔ̀n nɛ́n á kpra, bóló ɔ bo à r'á tokwɛ̂l ɔ ín, ki lùn jòè à nunî mɔ. ⁸ À kɛɛln-bisháaŋn búùrî k'à kúrnî ɔ à yɔ mɔ yɛ́ɛŋn tyɛɛ́ŋ sɔ́ɔɔ̂ gbár bɛ, bóló ɔ bo yì fɔŋn bɛl à nun kwon to ín bɔ̀kùr kpíníinkúur (200) kúur. ⁹ Yì mùfɔn bè kyɛl à nun kwon ta, yì ki ninkâr dyàn ŋmɔ́n, yɛ́ɛ̀ŋ bè bɛn bɛnɲɛ̀n fù fléen, fù nì won-myɛ̂l. ¹⁰ Yesu k'à wú yì se dé: «Yíi w'án kyáŋmɔ jà yɛ́ɛ̀ŋɛ̂ má gbɔn bɛ.» ¹¹ Simɔn Piyɛri ki dé à kúrnî mɔ, k'à yɔ lô yɛ́ɛŋn denkɛŋln denkɛŋln sɔ́ɔ kar-kiin àmi fú-tyáarî (153) gbár bɛ ɲáan ta. À yɛ́ɛ̀ŋɛ̂ n'á tyɛɛ́ŋ bra ɔ à yɔɔ̂ wo gbɔ́n bo. ¹² Yesu ki yì fɛ́ŋn dé yì wo bɛ le di. À kɛɛln-bisháɛ̀ŋɛ̂ mɔ dó wo Yesu du gbɔ kpɛ́ hìn tɛ̀ŋn d'àkun ki tɔŋnî mun ɔ bo. Fù bóló ɔ bo yì r'à shi ín dé yìkun Totɔnî ɔ. ¹³ Yesu k'á sukúr bɛ, ki won-myɛ̂l tè yì to, fù nì yɛ́ɛŋn. ¹⁴ Fù ki tɛ̀ŋnè Yesu k'án kɛɛln-bisháɛ̀ŋɛ̂ to á byéen yɛ̀nî ɲáa tyáarɔn, à ɲìnɛ̀n lɛ̀ ɔ à jimin klômɛ́ɛ̀ɛ̂ tyé mɔ. ¹⁵ À kɛɛln-bisháɛ̀ŋɛ̂ ǹ leê dìmun kwɔ́ɔn, Yesu ki Simɔn Piyɛri fɛ́ŋn k'à du dé: «Jonasi dye-jɛn Simɔn, mún gbɔ r'á mɔnar àniìî to a?» Simɔn k'à mɔli dé: «Oo ń Totɔn, á r'à shi d'á gbɔ ri mún mɔnar.» Yesu k'à wú à se dé: «Á kpɛŋnja mún ǹ kɛɛln-bisháɛ̀ŋɛ̂ to árí bɛ́bɛ́ɛ̀ɛ̂ myɛntɔn.» ¹⁶ Yesu k'à ɲáa níintɔn sɛfɛ́ŋn k'à du yé dé: «Jonasi dye-jɛn Simɔn, mún gbɔ r'á mɔnar a?» Piyɛri k'à mɔli dé: «Oo ń Totɔn, á r'à shi d'á gbɔ ri mún mɔnar.» Yesu k'à wú à se dé: «Tɛŋn mún ǹ bɛ́bɛ́ɛ̀ɛ̂ myɛntɔn.» ¹⁷ Yesu k'à ɲáa tyáarɔn sɛfɛ́ŋn k'à du yé dé: «Jonasi dye-jɛn Simɔn, mún gbɔ r'á mɔnar a?» Piyɛri k'á ɲámɔɲànè à ɲáa tyáarɔn sɛdùû rɔ dé: «Mún gbɔ r'á mɔnar a?» Fù se kwó k'à mɔli dé: «Ń Totɔn, ákún ni gbɔ kúur nɔ̀nkurn shi, á r'à shi d'á gbɔ ri mún mɔnar.» Yesu k'à wú à se dé: «Á kpɛŋnja mún ǹ kɛɛln-bisháɛ̀ŋɛ̂ to árí bɛ́bɛ́ɛ̀ɛ̂ myɛntɔn. ¹⁸ Mún n'à lóon á se hlɔ ta, hlɔ ta d'ákún ni gbârî mun ye á mínɛ̂nblebé mɔ ín, ákún nɔ̀nkurni r'án wâɛ̀ nɛ́ɛn ín á byéen á k'á tatìn. Á bè don hìn á tìyà fɔŋn, kɛ̀ klɔ̀bé mùkâr ye bè lo á to, á b'á bɔ̀ tɔŋnkúra, jir má k'á to wâɛ̀ nɛ́n, ki don á nɔ á tìyà kaarn fɔŋn.» ¹⁹ Yesu ri fù gbukɛlî kɛɛ̀ln ín, k'à yɛ̀n Piyɛri to àkun Piyɛri bè kúnî mun kúa fù ki ɲɛflɛ́ɲɛn Jɔnɔsɔ ɲɛn. Fù gbukɛlî kɛlmun kwɔ́ɔn Piyɛri se, k'à wú à se dé: «Kpé ń ta.» ²⁰ Piyɛri k'á tojìr, ki Yesu gbɔ mɔnar kɛɛln-bisháaŋnî kpéɲɛ̀n ŋmɔ́n yìkun ta, fù kɛɛln-bisháaŋnî k'á yɛŋn ɲɛ̀n tɔŋnî ɔ ín à leê lefɔn Yesu tàshɛŋ tɔŋn, k'à du ín dé: «Ń Totɔn, gbò k'ákún jà nɛ́ntɔnî ɔ kpɛŋn mɔ?» ²¹ Piyɛri mùfɔn fù kɛɛln-bisháaŋnî ŋmɔ́n, ki Yesu du dé: «Àni kɛɛln-bisháaŋnî híin, myɛ́n gbɔ bè kwoa à to?» ²² Yesu k'à wú à se dé: «Mún n'à se ki tɛŋn á shi mɔ fóro mún sɛbyɛ̀ ɔ, ákún ǹ myɛ́n fù mɔ? Ákún kwó, ákún wo kpé mún ta.» ²³ Fù gbukɛlî ki tokɛlno loké Yesu ta kpéɲɛ̀n fɛ̀ɛ̂ to dé fù kɛɛln-bisháaŋnî bè kwoa bo. Ta, Yesu w'à klóo kaarn wúɲɛ̀n à se bo, kɛ̀ à r'à ló dé: «Mún n'à se ki tɛŋn á shi mɔ fóro mún sɛbyɛ̀ ɔ ákún ǹ myɛ́n fù mɔ?» ²⁴ Fù kɛɛln-bisháaŋnî mùn ni fù gbɔɛ̀ɛ̂ tokɛl, k'á sɛ k'à ɲúr. Ŋmɛ́ɛn b'à shi d'àn tokɛl gbɔɛ̀ɛ̂ ri kwòɲɛ̀n hlɔ ta. ²⁵ Yesu ri gbɔ tyɛɛ́ŋ sɔ́ɔ máɛ̀ kwòɲɛ̀n. Fù gbɔɛ̀ɛ̂ nɔ̀nkurn ki ɲwár kwó ín sɛ́bɛ̂ mɔ, mún tɛ́l mɔ kwó, dé fɛ̀ ɲɛn fɔŋn wo ŋmɔ́n hìn ín díryɔ́ŋ mɔ bo.