¹ Fù se kwó Pilati k'à wú dé yì wo Yesu ja, dé yì k'à ŋmɛ saŋbwàr ɔ. ² À sùráshîìî ki kìyɛŋntɔn ŋmel to nɛ́n kar blíin kɛ̀ŋmɛ̀ ɔ, yì ki fù nɛ́n Yesu ŋmel to. Yì k'à tonɛ́n tonɛnwâ kpɛ̀ŋl bɛl sɔ́ɔ ɔ, ³ yì k'á sukúrno à to, yì k'à wú à se dé: «Á dɛ́nsɛ Yawutuì ǹ kìyɛŋntɔn!» Yì k'à ŋmɛ à tà mɔ. ⁴ Pilati k'á sɛlì bɛ wo yé fâŋl, k'à wú à Yawutuìî se dé: «Mún k'à nɔ lì bɛ̀mun nɛn wo yíi se, nɔkɔ́ŋl yíi k'à shu dé mún wo kɛŋ fɔŋn bóló ŋmɔ́nɲɛ̀n à jɔɔ̂ to bo.» ⁵ À la máno tɛ̀ŋn híin, Yesu ki lì bɛ wo, à kɛ̀ŋmɛ̀ kar blîŋnmunî bè nɛ́nɲɛ̀n à ŋmel to, fù n'à tonɛnwâ kpɛ̀ŋl bɛl sɔ́ɔɔ̂ ɛ̀. Pilati k'à wú yì se dé: «À jɔɔ̂ rɛn!» ⁶ À flɛ́klɛrê ŋmelêê n'à faŋ fenɛntêê mùfɔn Yesu ŋmɔ́n, yì k'à wú á myɛl tokpâr ɔ dé: «À kpé tá nan gbɛ́ɛ to! À kpé tá nan gbɛ́ɛ to! Pilati k'à wú yì se dé: «Yíkun nɔ̀nkurni w'à kpé tá nan gbɛ́ɛ to, kɛ̀ mún wo kɛŋ fɔŋn bóló ŋmɔ́nɲɛ̀n à jɔɔ̂ to bo.» ⁷ À Yawutuìî ki Pilati ǹ gbukɛlî mɔli dé: «Tɔ̂ŋn gbukɛl dyàn fɔn ŋmɛ́ɛn se, fù tɔ̂ŋnî mɔ gbukɛlî r'à yɛ̀nɲɛ̀n d'à ri yanɲɛ̀n ki kwo, bóló ɔ bo à r'á byéen ɔ Jɔnɔsɔ Dye-Jɛn jìrɲɛ̀n.» ⁸ Pilati ri gbârî mun ye fù gbukɛlî ná, àn yànbêê k'á tosáŋè, ⁹ ki dénno à kítíkár-lɔ́ɔ̂ mɔ, ki Yesu du dé: «Ákún ni lɛɛ̀n fɛ́ɛŋn?» Kɛ̀ Yesu w'à gbukɛlî mɔlɛ bo. ¹⁰ Pilati k'à du dé: «Á r'á sháaŋn mún to a? Ákún w'à shi d'à lo ri mún to ákún ki tobúrê, à lo bè mún to ákún ki kpé tá nan gbɛ́ɛ to be a?» ¹¹ Yesu k'à mɔli dé: «Ákún ki mún to nurkwɔ́ɔ lo bóló w'ákún se bo, Jɔnɔsɔ se jɔ̀nɔ̀kpár mɔ lì bɛ̀ fù ri kwó kɛ̀. Fù r'à jɛ́l tɔŋnî mun ni mún jànɛ́ɛn ákún kpɛŋn, fù ǹ klɛ̀ gbɔjáal (besénarî) ri sɔ́ɔ yé ákún fù ri to.» ¹² Pilati wo saaŋ fù gbukɛlî ná gbârî mun ye, ki jo Yesu mɔ kpɛŋnlɛɛ fá ɲɛ́ɛn to. Kɛ̀ à Yawutuìî k'à wú á myɛl tokpâr ɔ dé: «Á n'á kpɛŋnlɛ àni jɔɔ̂ mɔ á ki Rɔmu kìyɛŋntɔn sɔ́ɔ Sesari jirɛ̂ ɔ bo. Jiminî mun nɔkɔŋl á byéen ɔ kìyɛŋntɔn klɛɛ̀n, fù r'á byéen ɔ à kìyɛŋntɔn jɔɔ̂ kɛ̀ŋlshì jiìrn.» ¹³ Pilati ri fù gbukɛlî ná gbârî mun ye, ki Yesu ɔ lì bɛ wo, ki ɲínɛ́ɛnè àn kítíkáar fɔŋnî mɔ, yì ri mùmun fɛ́ɛŋn dé Tun-bɛn, fù k'à lô ɔ ébúrû jɛ́ɛn mɔ dé Gabata. ¹⁴ Fù wóontɛ̂lî k'à A-Be-Jirea-Fu-Ta wúwɔ́ɔŋɔ̂ rɔ ín, ye kpɛ̀ŋlmun kwɔ́ɔn, Pilati k'à wú à Yawutuìî se dé: «Yíi ǹ kìyɛŋntɔn jɔɔ̂ rɛn yíi se kpɛ́!» ¹⁵ Kɛ̀ yì k'à wú á myɛl tokpâr ɔ dé: « Ki kwo! Ki kwo! À kpé ta nan gbɛ́ɛ to!» Pilati k'à wú yì se dé: «Mún ki yíkun ǹ kìyɛŋntɔn jɔɔ̂ kpé kwo nan gbɛ́ɛ to a?» À flɛ́klɛrê ŋmelêê k'à mɔli dé: «Kìyɛŋntɔn má wo fɔn ŋmɛ́ɛn se Rɔmu kìyɛŋntɔn sɔ́ɔ Sesari kwɔsé bo.» ¹⁶ Fù la klɛ̀ híin, Pilati k'á kpɛŋnliè Yesu mɔ yì se kpé táa ɔ nan gbɛ́ɛ to. Yì ki fù kpɛŋnî ta à ja, [yì ki dénno à nɔ.] ¹⁷ Fù jìrɛ̂mun kwɔ́ɔn Yesu nɔ̀nkurni k'á kpɛ́-nanî gbɔ̀n, ki li à dyɛɛ̂ bur, ki dénno tíkɛ́l dyàn mɔ, yì ri mùmun fɛ́ɛŋn dé Ŋmelkpár, fù bè lóon ébúrû jɛ́ɛn mɔ dé Goligota. ¹⁸ Yesu ki kpé nan gbɛ́ɛ to fù tíkɛ́lî mɔ jir níin wɔ́se, à kínkáar mɔ́n níinî nɔkɔŋl se jir byéen byéen, Yesu bè yì tyé mɔ. ¹⁹ Pilati k'à kwo yì ki klɔ́bin to sɛ́bɛ̂ dyàn ɲwârmun kpé tá à kpɛ́-nanî to. À bè ɲúrɲɛ̀n dé: «Nasarɛti jir Yesu, Yawutuì ǹ kìyɛŋntɔn.» ²⁰ Yawutu tyɛɛ́ŋ sɔ́ɔ ki fù klɔ́bin to sɛ́bɛ̂ ɲwârmunî kɛɛln, bóló ɔ bo Yesu ri kpé tá nan gbɛ́ɛ to tíkɛ́lî mun mɔ, fù ri shùn ín à dyɛɛ̂ to: à sɛ́bɛ̂ɛ̂ bè ɲúrɲɛ̀n ébúrû jɛ́ɛn, nì látɛ̂ŋn jɛ́ɛn, fù nì gìrɛ̀kî jɛ́ɛn mɔ. ²¹ À Yawutuìî ǹ flɛ́klɛrê ŋmelêê k'à wú Pilati se dé: «B'à ɲúr dé Yawutuì ǹ kìyɛŋntɔn bo, à ɲúr d'à r'à ló dé: "Mún ki Yawutuì ǹ kìyɛŋntɔn ɔ".» ²² Pilati k'à wú yì se dé: «Mún ni mùmun ɲwár, mún ni fù ɲwár.» ²³ À sùráshîìî mùfɔn Yesu kpɛ́ nan gbɛ́ɛ to, yì k'àn wâɛ̀ɛ̂ síkár, síkâr ɲɛ̀n fɔŋn mɔ́n yor, sùráshî mun nɔkɔŋl n'á fù nin fɔŋn. (Yì ki saaŋ àn tonɛnwâ-bɛlî gbɔ̀n, fù bè gbɔ̀nɲɛ̀n à níi to fóro à kwàŋlî to, kwɛ̀l fɔŋn w'à se bo.) ²⁴ Yì b'à lóon yíi se dé: «N̂ b'à tyé gbɔ́n bo, kɛ̀ n̂ k'à mɛ̀lbúr fù k'à gbɔntɔnî yɛ̀n. Fù ri klɛ̀ nɔkɔ́ŋl Jɔnɔsɔ ǹ gbukɛlî ɲwâr sɛ́bɛ̂ɛ̂ mɔ ló gbɔɛ̀ɛ̂ ki kwo mɔyîn dé: Yì ri mún ǹ wâɛ̀ɛ̂ síkár yíi to, Yì ki mún ǹ tonɛnwâ-bɛlî mɛ̀lbúr. ²⁵ À sùráshîìî ǹ klɛ̀ fù ri nɛn la. Yesu kpɛ̂ nanî blɛ̀ se à kwɔ̀ŋ nɔɔ̂ n'á srɔ́ɔ-mélî ri tɛ̀ŋnɛ̀n ín, fù nì Kulopasi lu Mariyamu nì Makidala jir Mariyamu. ²⁶ Yesu k'á kwɔ̀ŋ nɔɔ̂ ŋmɔ́n, fù n'à gbɔmɔnar fù kɛɛln-bisháaŋnî bè líɲɛ̀n à blɛ̀ se, k'à wú á nɔɔ̂ dé: «Bi, á Dye-Jɛnî rɛn.» ²⁷ Fù jìrɛ̂mun kwɔ́ɔn, k'à wú fù kɛɛln-bisháaŋnî se dé: «Á nɔɔ̂ rɛn.» Ki la gbɔ̀n fù wóonî to, ki dénno Yesu nɔɔ̂ rɔ á sádi. ²⁸ Fù jìrɛ̂mun kwɔ́ɔn, Yesu k'à hlɔ̀ kpɛŋn ta d'à nɔ̀nkurn n'á mɔyînè, nɔkɔ́ŋl Jɔnɔsɔ ǹ gbukɛlî ɲwâr sɛ́bɛ̂ɛ̂ mɔ gbɔɛ̀ɛ̂ k'á mɔyîn, k'à wú dé: «Nìn ni ń to.» ²⁹ Mɔ́n-kwɛ̂l dyàn mɔ nunɲàn ni tɛ̀ŋnɛ̀n fù tíkɛ́lî mɔ ín. À sùráshîìî ki wíyáa kekɛ̂l isofi tímɔ́n bɔ kɛ́ɛŋl to, yì ki fù ɲíkí à nunɲànî mɔ, yì ki fù ɲɛn Yesu yɛŋn to. ³⁰ Yesu r'à nunɲànî twɔ̀ŋyi gbârî mun ye, k'à wú dé: «À nɔ̀nkurn la á mɔyînè.» (Fù la klɛ̀ híin), k'á tàshínè, k'á káè á shiî se. ³¹ Fù gbɔɔ̂ klɛ̀ɛ̂ se à tarwɔɔ̂ nyânɲɛn klɛwɔɛ̀ɛ̂ klɛ yefyɛ̂lî ta, fù wóontɛ̂lî b'à tarwɔɔ̂ ɛ̀. À Yawutuìî w'à se nikyɛ́ɛŋ dó be kpé dɛ́ê à kpɛ́-naɛ̀ɛ̂ to bo, bóló ɔ bo à tarwɔɔ̂ ki yefyɛ̂l sɔ́ɔ ɔ yì se. Fù r'à jɛ́l yì ki Pilati tonyɛl d'à ki ɲɛ̂l ɔ yìkun kɛ́ŋ, à jimin kpɛ̂mɛ́ɛ̀ɛ̂ kpaâŋlî kútúr kútúr, dé yíi ki kwɔ́ɔn yì kyɛl li à kpɛ́-naɛ̀ɛ̂ to. ³² Fù la klɛ̀ híin, à sùráshîìî ki dénno loké, yì k'à jimin túkyɛ̂ŋlî kpaàŋlî kútúr, yì k'à máâ fù ri kútúr, mùmun ni kpé táɲɛ̀n yì wɔ́se ín. ³³ À ri lò Yesu to, yì ri fù kúunmun ŋmɔ́n híin, yì wo fù kpaàŋlî kútár bo; ³⁴ kɛ̀, à sùráshîìî mɔ jir má ki tònbɔ̂ ɔ à saŋ à kínkáar se, nun nì tɔ́ŋ ki wo li. ³⁵ Jɔɔ̂ mun n'à ŋmɔ́n á ɲáa ɔ fù r'à tokɛl hlɔtabê mɔ. Fù nɔ̀nkurni b'à shi d'án lô fù ri ki hlɔ ɔ, nɔkɔ́ŋl yíkun ki saaŋ à hlɔja. ³⁶ Fù ri klɛ̀ nɔkɔ́ŋl à tɔ̂ŋn sɛ́bɛ̂ɛ̂ mɔ ɲwár gbukɛlî ki kwo mɔyîn, mùmun ni wúɲɛ̀n ín dé: À kpaârî mɔ dó bè kútúra bo. ³⁷ Fù gbukɛlî má saaŋ ɲúrɲɛ̀n à tɔ̂ŋn sɛ́bɛ̂ɛ̂ bén má se ín dé: Yì ri tònbɔ̂ ɔ à jɔɔ̂ sàŋ jimiì bè fù yia. ³⁸ Fù jirɛ̂mun kwɔ́ɔn, Arimate jir Yisufu mun ki Yesu ǹ kɛɛln-bisháaŋn ɔ ín toyâ mɔ, bóló ɔ bo à Yawutuìî yànbê à to. Àkun ki dénno Yesu nikyɛ́ɛŋɛ̂ nyɛlké Pilati se, k'à gbɔnno. Pilati k'à tosɛ́, k'à nikyɛ́ɛŋɛ̂ gbɔn ɲɛ̂l tè à to. ³⁹ Nikodɛmu mun lɔɔndya dénno ín Yesu se túun se, fù ki saaŋ mirɛ nyɛ́ɛl nì aloé nyɛ́ɛl toben nar sɔ́ɔ gbɔ̀n bɛ, yì bè kɛɛŋlɲɛ̀n yíi mɔ, à mɔnurî bè kilô kufú (30) kúur. ⁴⁰ Fù kpɛŋnî ta, yì jir níinî ki Yesu nikyɛ́ɛŋɛ̂ gbɔ̀n, yì k'à tokekɛ̂l wâ kpɛŋn-byéen ɔ, yì ki fù nyɛ́ɛl toben nar sɔ́ɔɔ̂ fûr à gbɛ́ɛ to, árí à ri dɛlɲɛ̀n à bè klɛɛ̀n fáâ mun to. ⁴¹ Ta táŋnkún-wɔ dyàn ni tɛ̀ŋnɛ̀n ín Yesu kpé kwò tíkɛ́lî mɔ, fù wɔɔ̂ mɔ dùkur dyàn ni tìnɲɛ̀n ín nikyɛ́ɛŋ dó wo tokyɛ́ kɛŋ mùmun mɔ bo. ⁴² Yesu nikyɛ́ɛŋɛ̂ ki gbɔ̀nno tokpɛ́ké fù tíkɛ́lî mɔ, bóló ɔ bo fù dùkurî fɔŋn shùn ín, fù wóontɛ̂lî b'à Yawutuìî ǹ tarwɔ yefyɛ̂lî ɛ̀.