¹ Zézu amana mindjuda miedji sè bikundu ne mébuka, nowowe nu tanda badji ive ye tumba ye Nzambi. ² Bé dzandji biku ne bole bè djè ni nédji ne batu bê lunka ne bidjiun bibi nongo ne mebédju. Mari we bibanga Madelène, we bi djiun bibi bè pula se yetsi. ³ Sane, muatsi we Suza, ubati we mébomo mè Erode né Suzane ne batu boko be djè ne yamènè ne mebomo mè bangu. ⁴ Yè batu beyidji bèdjè ne kuka kô nedji, batu bè bingundu biyitsi bèdjè ne uya bokô yédji yedjè tè bangu djika yotu. ⁵ "Unkuni apula nukuna. Yetsè djè nukuna, bala yè bulu ya namuin unkolo muè pèyi, ba djakitè yangu, ye be niotsi bikulu bè dza yangu yesi. ⁶ Bala yoko ya namuine tima yé me manian, yaya lunga mesadji, yeya yè yuma ne ndè mangu. ⁷ Bala yoko ya namuine timayé mésèdulè, yé bangu besi be lunga unzamba yé mèsèdulè mè pinian mbulu. ⁸ Ni bala yoko ye mbulu ya namuine se sendjè unvè yeya yè buta nukaba méku meyitsi: Zézu amane wowe vuvu, yidjiè pusa djuyi ati:"Weni ne méluyi nuyuka dyuka! ⁹ Ye bedjandji bedji be suhulè, wangu utina ve tsika yayu. ¹⁰ Ni beyi:"Ba kaba beyi mè solo mè badji yé Nzambi ni ne batu ba me wowe ne bidjika milivilè, ya vavu ba bè waya. Ndè yèné yula. Ye ba bi djè yuka ni ba nde kuata menvu. ¹¹ Waya udjina ve ulinvilè muamu mbulu ni ye Nzambi. ¹² Mbulu yi namuine unkolo muè peyi, ababu ni batu bi yuka mbatsi yé Nzambi, yé djabele iya temisè yangu se milima miè bangu, nu tanga, yoko baba bomo ivukedjè. ¹³ Ni mbulu yi namuine se mé maniane, ababu ni batu bi mekidjé mbatsi yedji ne litsisa ye babiyuka, ni bangu ndè miganga, bangu bé mbomo ivukidjè si va mèmiku, ni ndili yé menvu yè bangu bi djika. ¹⁴ Mbulu yi namuine tima ye mésèndulè, ababu ni batu biyuka mbatsi ni ye menvu mé ilongo miya piniane bangu ye babaki wa. ¹⁵ Ni mbulu yè namuine se sendjè ivè, ababu ni batu bi yuka abatsi se milima mi vè, nubata yangu nivukidjè yè a bila nu kaba mbulu ye bidja. ¹⁶ Waya ndè mutu wi kambisè ibanvu djè muniane ne udjiba tsangu ne ngungulu tiva niene nu somo tsangu sina ilaka. ¹⁷ Asimba tsangu ni ikulu ya batu bi nidjèlè ba yénè kualala. Ndè yila yidjè djè isolo yè bakayiba, ndè yila ye isolo ye baka yènè se kualala. ¹⁸ Yukaye uvè uvè, bedjè velisè kaba mutu we niné bangu, ni we ndè yila, be tsè temisè wangu biesi bètsi tsiméné bomo." ¹⁹ Yayu, mama wedji, ne bana bé mama wedji abaya boko yedji, ²⁰ ni bangu be kè tuka wè ne batu bè djè uyitsi. Ba tanda wangu:"Mama wowe ne bandji bowe beni badji, be vumba yènè we." ²¹ Zézu ayakuè bangu ati:"Mama wami, ne bandji bami ni batu bi yuka. Batsi ye Nzambi, nupika nda vé yangu yi tonda." Yenayi, vusa votu ²² Yenayi vusa votu, Zézu abita se mbugu ne bedjandji bedji, yedjié tanda bangu ati:"Ntumbayi ngulu mboko ye ndjango." ²³ Ye babedjè ne djuka, Zézu nanga mbula. Ipépé djè nanvé djaya namuine kule djanga ye mbugu yèdje nulunda mangu, babèdjè ni se ubi. ²⁴ Yé bedzandzi bè Zézu be tsindèné ko nedji nuniusulè wongu nu tanda ati:"A nkuhune! A nkuhun! Bèbè baki wa!" Yedjè niusè nu kanvè ni pèpè nonké né tsiba ye mangu ye djadjè siya nu vudjè nda kala. ²⁵ Yedjiè tanda ne bangu ati:"Ivukidjè djè beyi dja wayi?" Baba yènè vongo, baba kwè pami, ye bangu bè wowe tima ye bangu ati:"A yu mutu we ipepe ne mangu mi yuka nisa?" ²⁶ Ye ba bè djanga se tumba ye Ghérasené yeni telè ne Ngalilé. ²⁷ Yedjiè sula se mbungu, mutu we ngundu wè djè ne bi djiune bibi aya kuaniene nedji. Be sudji ne besudji, édjè a ndusua mikanda, nde nanga se ndaku sise mésongo. ²⁸ Yedjié yénè Zézu avulé misima, a namue busu vedji. Apusa djuyi ati:"Djé benu ni djisa mwana we Nzambi we djikulu amènè? Koloko yowe djika yenisè me mébaba." ²⁹ Ne Zézu étanda ne djihune yibi nupula se niulu yedji, bidjiku ne bidjiku yayu yedjè ne kuata wangu. Ne bèku tekè wangu ne ngasi nu bata wangu édjè ne titangasi yè bidjihune bibi bibapa wangu se bibuma biè nde batu. ³⁰ Yé Zézu é suhunlè wangu:"Nguvu yewe nisa?" Yedjiè yakuè:"Biyitsi", ne bidjihune bibi bè djè wangu se niulu. ³¹ Ye bia bè djè ne mbondo angu, yoka luma bangu se muniane. ³² Yénè djinvu djineni djè bingu, djè djê nè dja se kudji. Bidjihune bibi ba bondo wangu nuluma bangu se djinvu djè bingu. Yedjiè luma bangu. ³³ Ye bidjihune bibi biè pula se mutu wayu, ye bia bè rindjèlé se bingu, yé bingu biè yinga se kudji nu namuine se mangu nu wa. ³⁴ Bêdjè ne bata bingu bè yènè vavu, yé ba bè tanga nudjè tangu kunvu se ngundu ne se mè mbuka. Yé batu, bè pula nu ye yènè djanvu djè suta. ³⁵ Ba be djanga ko ne Zézu baba kobesè mutu wayu unsidji sè mè kulu mèdji, mutu we bidjihune bibi biè pula, édjè akobesè métsimi medji mesi ne mi kanda, ye ba bè yénè bongo. ³⁶ Yè bè nda vè dja djè suta bè tanda boko kunvu, yé ndavè mutu wè djè ne bi djihune bibi è lunga. ³⁷ Batu besi bè kundu yè Ghéseraséni batanda ne Zézu nu lawe ne bangu. Ne bangu bè djè ne vanga yinéni yê dja ya kuata bangu. Yedjiè bita se mbungu ne uvudjè. ³⁸ Mutu we bidjihune bibi bè pula se niulu yetsi a mbondo wangu ati:"Djika, mè médje benu Zézu avutsisè wangu ati. ³⁹ "Djèkè ndaku yiwe we tè bangu kunvu y menvu me neni mé Nzambi apika we." Wangu adjè tanda se ngundu yesi menvu mè Zézu épika se niulu yetsi. ⁴⁰ Yé Zézu édjanga, li mutu la ya yamba wangu, ba bè dje ni ne ubaka wangu. ⁴¹ Mutu we ngundu Sairuse aya, wangu edjè ni butu yoko ye ndaku ye Nzambi. ⁴² Anamuine se mé bongo mé Zézu nu mbondo wangu nu tsè pesi yetsi. Ne mwana wedji we idjika wè djè ne bisiyu iku ne limutu be djè ne kambidje wangu. ⁴³ Se limutu lalu, yedjè ne muatu we djè ne kayi bisiyu iku ne bole, wangu edjè kabaka bedolo bedji besi boko yè yumi bé batu ni ndé motu we lunkisè wangu. ⁴⁴ Yangu aya bisa ungongo muè Zézu nutila angu limiku lalu, yé un su wihine siya wangu. ⁴⁵ Zézu asuhunle ati:"We me tilème nisa?" Nda vè ba besi bè dje ne luna, ye Pière étanda angu ati:"Ankuhune, li mutu lekambidje wè." ⁴⁶ Yé Zézu éyakuè ati:"Mutu a me tila mè yami mé yéne singa ye pula me se niulu yami." ⁴⁷ We muatu a yènè ati wangu ndè tuka solimè, aya ne li kuambi nuya vuné mé bongo pesi yèdji. Yedjiè mekidjè mbusu vè batu besinu tanda utina vedjié tila wangu, ne nda ve djè lunga. ⁴⁸ Ye Zézu étanda wangu ati:"Mwana wami, ivukidje djowe dja lunkisè we djèke ne udjusu." ⁴⁹ Yé ba bedjè besa wowe, mutu motu ayinga boko ye ndaku ye kuhune, we ndaku ye Nzambi nuya tanda wangu ati:"Mwana wowe awa tika vèlé uwle nkuhune." ⁵⁰ Zézu ayuka vavu, yetsiè yakuè ati:" We ndè yènè vongo, somo ivukidjè wangu adjè lunga. ⁵¹ Yedje djanga ndaku, wangu a lewe ati; mutu ndè nindjilè, mbisa ye Pière. Za na Zake noneko ne tata ne mama we mwuana. ⁵² Besi be dje ne lila, ne wowe djanvu ne liku lè mwuana. Yedjiè tanda bangu ati:"Djika lilayi asa nde a, ani bebula." ⁵³ Yè ba bedjè nu yambidjè wangu ne ba beyiba ati:"Mwuana a wa." ⁵⁴ Zézu kuata boko ye mwuana nu banga wangu ne djuyi dji neni:"Mwuana na wami niusè." ⁵⁵ Yè fdju yedji ye ya vudjè, yedjiè telimè limiku mene lalu. Zézu atanda bangu nu kaba bila budja. Yali yetsi bakuè pami ye Zézu étanda ne bangu ⁵⁶ ati:"Beyi ndè tanda pati mutu djanvu dje mesuta se ndaku yi."