² yéné unwolo mwatu witsè nètsè néwuyika mutu, muédzi kitondo uyitsi, wédza nésaba, udzé bakaka newuya. ² ndili yé uwolo wuhun yaka béwowé dzé Zèzu, yedzi iluma ba Juif békala, ³ né sunhulé angu né wuya Yuma undzandzi wédzi. ⁴ bangu budzanga konè Zézu, yébangu bekisuhu langu békolokolo ne béngo longolo né utanda ati: «wangu afumba nati wèkaba angu yangu. ⁵ wangu atondo ilongo dzé bèbè yé wangu niwé tunga bèbè ndaku yé Nzambi.» ⁶ kuélé wayu Zézu abakdzé péyi yédzi bané bangu. ndili yedzi ibakumé né ndaku, muwolo was luma bembatsi né tanda angu ati : « akumu, dzika kaba singa yé ngolu, mé ndé uvè, ndili yowè idzi sé ndaku yami. ⁷ yéné utsina vami maké tonko né yuya pési yowé. ni wé tanda dzanvu dzotu, yayu undzandzi wami a lungué. ⁸ nami medzi ni mutu, wédzi mbisa mutu wé unéni, né bewolo bidzi mbisa yami, mami manvu, metanda né motu : «''yaka" yedzi kilika.» ⁹ ndili yé Zézu éyuka manvu manu, yedzi idza lunguku nédzi, yedzi kivélé uyikuéné kuélé yé mukuka wé kibaki dzè angu, yédzi kitanda ati: «métanda, né pesi Israel mesande yéné mutu nda yu wédzi né ivukidzé ndayu.» ¹⁰ yé ndiliyé batu bebiluma, béyévutsé ndaku , bangu bakobsé undzandzi wédzi a lungua. ¹¹ sé ndili méné yayu, Zézu atsé sé ngundu yébeki banga naïn, bana bidzi sé ndaku yedzi né unkuka muni ni, batsé nedzi. ¹² ndili yédzi kitsindéné kutsé yé ngundu, yedzi kiyéné babapa mutu wa mwana motu wé dza sé moyi wé mama wé dzi hunkuili , ye mwatu méné adziki né unkuka munéni wé ngundu. ¹³ ndili yébiyéné angu, kuma ayéné angu tsési yedzi kitanda ati: ''dzikalila'' ¹⁴ yé wangu kitsindené kono wala yé bidzindzi yedzi, kikuata wala méné yébéki bapa tsindzi, bidzé né ubapa, badza ndé ulanda yédzi kitanda : «mwana yé baka yu, mé tanda wé telmé.» ¹⁵ tsindzi ya sunda untsitsi yé yangu yé wowe. ye Zézu ivutisé angu né mama. ¹⁶ batu betsi, bayéné bongo, yé bangu bekumisé Nzambi ne utanda ati : «mutu wé unéni wé unéni wé kitanda manvu me Nzambi batumbidsé wangu Tina yébé béné Nzambi asutu timaye unkaka wédzi.» ¹⁷ dzanvu dzadzu sé Zézu dza sé La judée bongo ne bingundu bidzi konedzi. ¹⁸ bana belikoli le Jean batsé banédzi ne manvu mési mamu. ¹⁹ yé Jan kibanga batu bedzi bolé né utsé sungulé kamu: «wé ni wé kiya, ni vavu bésu békuka unsusu?» ²⁰ be undzanga koné Zézu, batu batanda : «Jean baptiste ameluma besu koné nowé unsugulé : "wanguni wé. wékiya nati besu bebuka moko?» ²¹ sudzi yayu, Zézu asaka batu beyitsi mébédzu, mekidambisé gnulu né bidzuwu bibi , dziki dzuvilé misa mébatu besi bidzi misapi. ²² yedzi iyakué né utanda ati: «ndili yebeyi bekitsé, béyi beyi batanda né Jean mebeyi beyéné néyuka, bamisépi baki yéné , bendé landa, bébifima basuaka, béndé méluyi bakiyuka biwa bagnusé, dzanvu dzivé dzétzanga batanda ne bidzi neyila néyotu gnié. ²³ livé lédzi ne wétsita tima yébesiné dzi utina ne manvu mami kipika.» ²⁴ ndili yé batu bé jean bitsé, Zézu a wowé utsina ne jean busu vé unkuka: «ye beyi beme tse yéyé pesi yésétsé yendé mèné ni yi? izonzo dzé kigninginé né ipèpè ? ²⁵ yayu yé beyi bemetsé yéné ni yi? mutu waswa mengoyi mevè ? batu bekisua mengoyi mevè ne bekidza sebibuma bivé békidza sè mandaku ménéni. ²⁶ yébéyi bemetse yéné niyi? mutu wéki wowé né Nzambi? ma mekdzé , angu atakué mutu wéki wowé né Nzambi. ²⁷ yéné yé biténdè nédzi: "yéné méluma busu vowé, tuma wé kitsé yébisè wé péyi" ²⁸ métanda béyi, tima yébè batu, bèbè batu bèdzia, wé kitakué bèbèsi ni jean. vavu wedzi untegéné sé ilongo dzé Nzambi adzi unéni, atakué angu.» ²⁹ ndili yé unkuka wé yuka né bekitolongo mepo, yébangu betanda ati Nzambi adzi télè, ndili ye békaba angu météme me jean. ³⁰ yébé pharisiens ne batu bekiyiba bitsila bié bè Juif bayisa mindili mié Nzambi, babè pika vavu ne bangu bakeboko mètème mé Jean. ³¹ metuka mikisè batu bedzanga ne benza ? bangu betala ni benza? ³² babédzi nda banabétè béki tamba se buma ye batu besi, yeba béki sunda, yeba beki bangéné boko ne utanda ati: besu bawula beyi benvundzu beyi bakébina. besu batsuba beyi unvu lendoko yé beyi bakelil" ³³ ni Jean baptiste aya. wangu a kedza pémbé akegnua melaku, yé beyi betanda:" ati wangu adzi me bidzugu bibi. ³⁴ mwana wé mutu aya, adza, agnu, yé béyi bétanda ati wangu anevumba, ugnua, mélaku, umbatsi wé békitsé né kukisé mépo nongo ne manvu mébi" ³⁵ bayiba bedzi né uyunvu.» ³⁶ uhun Pharisien motu wabangangu angu tsé dza bané dzi. yayu, ndili méné Zézu, agnindzilé sé ndaku yé pharisien, yedzi kidza sé tavulu, ³⁷ ye mwatu kiya ayinga kuélé yé ngundu, wé dza ne manvu mébi, ndili wédzi iyuka ati Zézu adzi sé ndaku ye pharisien. yé mwatu méné aya néva mbasi yé uyombo en albatre. ³⁸ yedzi kibanda né utsuka angu mekulu mé mésanga, yedzi kikagnisé manvu né suyi, apiopé, a singité uyombo. ³⁹ sudzi, yé pharisien wé ibanga Zézu ye vavu, yedzi kitanda sé wangu méné : mutu wayu abikidza si mutu wé Nzambi ki wowé nédzi, abikidza si mutu wé, Nzambi ki wowé nédzi, abikiyiba mwatiyu wé kikuata angu, yedzi ni mwatu wé manvu mébi. ⁴⁰ Zézu awowé ati: simon, medzi ne dzanvu dzami kitanda wé.» yédziki yakué «kumu, wowé» ⁴¹ Zézu atanda: «mutu motu wéki bikisé batu adzé né batu bolé. mutu akika angu mikama iku, moko méku metagne mebefula, ⁴² yé ndili yé Tima, batu babu, bakétuka vutisé angu bedolo babu, yedzi kibo logo babesu bolo. yévavu Tima ye bangu bolé, wédzi ki tondo uyitsi ni dza! ⁴³ simon yédzi kiyakué ne Uganda ati: «metsu miyé wédzi ikaba bédolo béyitsi,» yé Zézu kitanda : wué métsita dzanvu dzadzu uvé.» ⁴⁴ yé Zézu kilengé kuélé yé mwatu, yedzi kitanda, ne simon «wéyé mwatu yu,» me megnindzilé ndaku yowé, wéwa kesuwa me mangu sé mekulu, ni mwati yu wangu atsuka me mekulu ne mesanga médzi, yedzi ikagnisé mé mekulu ne suyi yedzi. ⁴⁵ wa kedzuembé mé mebuka, ni wangu, ulavé, mwatu mé gnidzilé, wangu asandé démbè né ukulaka mé mékulu né udzuembé. ⁴⁶ wéwa kesua mé madzi sé mulu, ni wangu asua me muyombo sé mekulu. ⁴⁷ yami kitanda wé, manvu meyitsi medzi, mabologo, utsina medzi melaka mé itondo dziyitsi. wébékikaba bekoloko bété, bétondo wutè.» yedzi kitanda angu ati : «manvu mébi mowé mé, akaba wé békolokolo.» ⁴⁸ bidza sé tavulu nedzi betanda sé bangu méné: ⁴⁹ «ayu mutu niza wé bibologo manvu?» ⁵⁰ yé Zézu kitanda ne mwatu ati: «ivukidzé dzowé dza lungisé wé, tseké né sayi.»