¹ Ya kəl-gălasya n-inəfərəša, ma təmoos šăṭṭ ta lăbasăt kăwăn tăhiyăgăt? Wərgen dat šăṭṭawen-năwăn a nəssăfăsăr əmmək wa-s ităwăṣlab Ɣisa Ǝlmasex? ² A ăreɣ ɣas ad-əsleɣ a-wen ɣur wăn. Egen kăwaneḍ təgăm afərəšəy ogdăn d-a-wa dăɣ? ³ Egen kăwaneḍ təsəntam s-unfas i-ad-təməndəm ămăra s-taɣəssa? Egen tənăyam erhănay wa-dăɣ bănan? ⁴ Egen a-wen wər d-awăn ikna ărăt? ⁵ A-wen-za wa kăwăn ihak-in Unfas, ităgu tikunawen gere-wăn, egen s-iḍuf n-ăššăreɣa a-s-tăn itagu meɣ s-immun? ⁶ S-əmmə wa-s Ibrahim “oman s-Măssinăɣ, igrăw ɣur-s tidət”, ⁷ dăɣ-a-wen əfhəm a-s wi omanăn, umoosăn arătăn n-Ibrahim. ⁸ Imal Ǝlkətab a-s əgrowăn tăšeten tidət dat Măssinăɣ s-immun. Imal elenžil dat a-wa i-Ibrahim – “key a ɣur z’əgrăwnăt tăwšeten kul ălbărakăt”. ⁹ A-wen dăɣ-afəl immumănăn kul əgrəwăn ălbărakăt d-Ibrahim, wa n-ămmumăn. ¹⁰ Wi əgərăn ăṭṭăma-năsăn fəll-iḍuf n-ăššăreɣa, təwar-tăn ăllăɣanăt, fəl-a-s iktab a-s təwar ăllăɣanăt ăwedăm kul wa wərən ilkem əššərədan wi əktăbnen dăɣ-Ǝlkətab n-ăššăreɣa i-ad-ăg a-wen kul. ¹¹ Ămăra iddităt a-s Măssinăɣ wər ɣur-s igərəw ăwedăm tidət s-alkum n-ăššăreɣa, fəl-a-s «ăwedăm wa oɣadăn ad-iddăr s-immun». ¹² Ăššăreɣa wər təmoos immun. Ăwedăm wa ilkamăn i-ăššăreɣa, a săr-s iddər. ¹³ Ikkăs făl-anăɣ Ǝlmasex ăllăɣanăt n-ăššăreɣa, fəl tăssăba-nănăɣ iqqăl ăllăɣanăt, fəl-a-s təwar tilɣan ăwedăm kul ităwăṣlăban fəll-ašək». ¹⁴ A-wen iga i-ad-ăttawəḍ ălbărakăt n-Ibrahim tăwšeten dăɣ-Ǝlmasex, Ɣisa i-ad-nəgrəw Unfas wa-s d-anăɣ ităwătkăl ărkăwăl-nes s-immun. ¹⁵ Ayətma, tamăgrădăɣ zund ăgg-ădəm. Da-d ərdăn aytedem fəl-ărkăwăl əktabăn, wər t-illa ăwedem iddoobăn a-t ikkəs wăla išəwəd-t. ¹⁶ Ămăra ărkăwăl ităwătkăl i-Ibrahim d-ahăya-nes. Wər ităwănna i-ihăyawăn-nes (zund i-oggotnen, măšen iyyăn dăɣ ɣas) ăhăya-nes, imoosăn Ǝlmasex! ¹⁷ Ămăra ənneɣ: ărkăwăl wa iḍkăl Măssinăɣ eru, wər təddoobăt a t- ikkəs ăššăreɣa ta dd-toosăt 430 n-ăwatay dəfər a-wen. ¹⁸ Kunta təkasit tətawăgrow s-ălkum n-ăššăreɣa, a-di-za abas tăqqăl ărkăwăl, măšen Măssinăɣ, ikf’i-Ibrahim təkasit bănan s-aḍăkal n-ărkăwăl. ¹⁹ A-di-za, ma tənfa ăššăreɣa? Fəl-tăssăba n-abăkaḍ, ităwănna daɣ: ahăya n-Ibrahim ad-asu ənta as ităwătkăl ărkăwăl. Ăššăreɣa, titəwəkfa s-ăngălosăn, s-ănabdid. ²⁰ Zămaḍ Măssinăɣ iyyăn, ănabdid daɣ iyyăn. ²¹ Egen ăššăreɣa tənimăzrey d-ărkăwălăn n-Măssinăɣ? Făw! Ǝndar ăššăreɣa ta tətăwăkfăt, təddoobăt ad-tăsudăr, a-di-za, ad-itiwăgrăw tidət s-ălkum n-ăššăreɣa. ²² Măšen Ǝlkətab, iga ărăt kul daw-abăkaḍ. Ămăra itiwăkfa i-immumănăn ărkăwăl n-Măssinăɣ i-ad-ănăɣ iɣles dăɣ-Ɣisa Ǝlmasex s-immun. ²³ Măšen dat ass a n-immun s-Ǝlmasex, təwikkəl-anăɣ ăššăreɣa har ănifilil n-immun. ²⁴ A-di-za ăššăreɣa tăqqăl-anăɣ zund tăɣlift i-ad-anăɣ tăwi s-ăzzăman wa n-Ǝlmasex, i-ad-nəgrəw udəm dat Măssinăɣ s-immun. ²⁵ Ămăra d-ossa immun abas nəddărăr s-tăɣlift n-ăššăreɣa. ²⁶ Fəl-a-s tămoosăm kul-năwăn arătăn n-Măssinăɣ s-immun s-Ǝlmasex, Ɣisa. ²⁷ Kul-năwăn, wi ităwăsălmăɣăn dăɣ-Ǝlmasex, ămăra təlsam Ǝlmasex. ²⁸ Abas t-illa ăgg-ălyăhud,wăla ăgg-ălyunan,wăla akli, wăla ililli wăla aləs, wăla tantut, fəl-a-s, kul-năwăn, təmoosăm ărăt iyyăn dăɣ-Ǝlmasex, Ɣisa. ²⁹ Ămər kăwăn ila Ǝlmasex, a-di-za təmoosăm ahăya n-Ibrahim, imukkusa s-əmmək wa-s-tăn inna ărkăwăl.