¹ Măraw iwətyan d-əkkoẓ dəfər a-wen, olăsaɣ agəzzəy s-Yărusălăm, əddewaɣ d-Bărnabas; əsilalăɣ daɣ Tittus. ² Anfilal ad-eweyăn agəzzəy-nin. Safăttăktăkăɣ-asăn elenžil wa săfăsărăɣ i-tăwšeten. măšen əməgrədăɣ daw-šətək i-wi əmoosnen imuzarăn i-ad-əkkəsăɣ ăššăk a-s wər ozălaɣ bănan. ³ (Wăla Tittus iman-nes wa n-ăgg ălyăhun wa dər əddewaɣ, wər fəll-a-s iqqăl tăhaššəlt ad-imaley), ⁴ a-wen kul, iga fəl-tăssăba n-ayətma n-bahu d-anăɣ d-əgăznen s-tăɣdărt i-ad-səffikiyen agăraw n-iman wa nəla dăɣ-Ălmasex, Ɣisa. Ǝran ad-anăɣ dd-suɣălăn əkkulu. ⁵ Wər d-asăn noyya iman-nanăɣ făw, wăla ăssăɣăt iyyăn, i-ad-təṭṭəfăm tidət n-elenžil dăɣ-alăṣṣal-nes. ⁶ Wi s-tizarăt ənteneḍ as imuzarăn, a ămoosăn kul, wər făll-i isəbdăd a-wen elam. Măssinăɣ wər izzănămăẓley aytedem. Dăɣ-wa d-i d-iqqalăn, năkk, ăddutăt a-s imuzarăn wər t-il’a-d- šewădăn dăɣ-a-wa ənnăn. ⁷ Măšen, zămad ənăyan a-s əleɣ turăgăt n-igi n-isălan n-elenžil i-wi wərən əmoley, s-əmmək wa-s ila Bəṭrus turăgăt ɣur wi əmoleynen. ⁸ (Făl-as Măssinăɣ wa ikfăn i-Bəṭrus tumast n-anămmazăl ɣur wi əmoleynen, ənta daɣ ad-i ikfan tumast n-anămmazal ɣur tăwšeten. ⁹ A-s əlmədăn fəl-ănnoɣmăt ta əgrəwăɣ, wi-s ităwăsan a-s ənteneḍ a-s imuzarăn,Yaqub d-Bəṭrus d-Exya, əkfan-anăɣ ăfuss, năkk d-Bărnăbas i-ad-năkku, năkkeneḍ tăwšeten, əkk-in ənteneḍ sa-s wi əmoleynen. ¹⁰ Măšen ənnăn-anăɣ ad-nəla tăhanint i-tilaqqiwen, a-wen əgăɣ-ee. ¹¹ Zămad d-i d-ossa Sefas dăɣ Ăntiyuš, əngăyaɣ-as făll-a-s wər ila tidət. ¹² Hărwa wər d-ossan aytedem iyyăḍ d-əfalnen Yaqub, itaṭṭu Bəṭrus d-wi n-tăwšeten. Mǎšen ăssăɣăt wa d-osan aytedem wi, isəbdəd Bəṭrus a-wen, izənkăz iman-nes făll-aytedem n-tăwšeten, a-wen a iga făl təksəda n-wi əmoleynen. ¹³ Ǝlkăman daɣ kəl-ălyăhud iyyăḍ Bəṭrus dăɣ-tulmunufăɣa-nes, Wăla Bărnăbas iman-net dorrog d-asăn ilkam dăɣ-tulmunufăɣa-năsăn. ¹⁴ Măšen ăssăɣăt wa d-ənăyaɣ as wər əlkemăn tidət ta n-elenžil, ənneɣ i-Sefas dat-săn kul-năsăn: «A-s keyyu iman-nes n-ăgg-ălyăhud, təlkamăɣ ăgna n-tăwšeten, wərgen wi n-kəl-ălyahud, əndek əmmək wa-s təšăhaššalăɣ i-kəl-tăwšeten ad-əlkəman agna n-kəl-ălyăhud?» ¹⁵ Năkkeneḍ n-kəl-ălyăhud n-alăṣṣăl, “wər nəmoos inăsbăkkaḍen n-tăwšeten”, ¹⁶ nəssăn as wər-t-il’awedem igarawăn tidət s-iḍuf n-ăššăreɣa, măšen s-immun s-Ɣisa Ălmasex. Năɣbăl immun s-Ǝlmasex, Ɣisa i-ad-nəgrow tidət s-immun s-Ǝlmasex, wərgen s-iḍuf n-ăššăreɣa, fəl-a-s wər-ti təlla taɣăssa ta za təgrəwăt tidət s-iḍuf n-ăššăreɣa. ¹⁷ Măšen kunta nəgmǎy dăɣ-Măssinăɣ agăra n-tidət dăɣ-Ǝlmasex, năqqăl dăɣ-a-wen năkkeneḍ iman-nes inəsbukaḍ, egen Ǝlmasex imoos akli n-abăkaḍ? Xăram a-wen. ¹⁸ Kud əqqalăɣ, əgăɣ iman-nin akli n-ăššăreɣa, təkkəluwa ta d-in oyyăɣ, a-wen isăknu a-s năkk ămoosăɣ ănəmeezərəy n-ăššăreɣa. ¹⁹ S-ăššăreɣa, năkk ămutaɣ i-ăššăreɣa i-ad-əddărăɣ i-Măssinăɣ. ²⁰ Ǝtəwăṣlabăɣ d-Ǝlmasex. Aba-s iqqăl năkk a əddărăn, măšen Ǝlmasex a dăɣ-i iddăr, təmudre ta əgăɣ ămăra dăɣ-taɣəssa, əgăɣ-tăt s-immun s-rure-s n-Măssinăɣ, wa d-i ga tăra ta dăɣ fəl ikf’iman-nəs dăɣ təssəba-nin. ²¹ Wər təkkəsăɣ ănnuɣmăt n-Măssinăɣ, fəl-a-s əndar iddoobat ăgăraw n-tidət s-iḍuf n-ăššăreɣa, a-di-za Ǝlmasex, imut bănan.