¹ Băwlus, ănămmazăl (a-wen wərgen igin-ăgg-ădəm, mǎšen igi n-Ɣisa Ǝlmasex d-Abba, Măssinăɣ wa t-d-isənkărăn dăɣ-tămăttănt) ² năkk d-ayətma-ɣ kul wi dər ărtayăɣ, nəktab i-ălkănisaten ti əhanen Gălasiya; ³ əkfăn-kăwăn Măssinăɣ Ăbba-nănăɣ d-Imili Ɣisa Ǝlmasex, ănnuɣmăt d-ălɣafiyăt. ⁴ ikf’iman-nes i-ibăkaḍen-nănăɣ i-ad-ănăɣ isăbsu dăɣ-ăzzamăn wa dăɣ-lăbasăn s-tăra n-Măssinăɣ, Abba, ⁵ ənta a ilan ălxurmăt hărkuk! Amin. ⁶ Iqqăn eɣaf-in əmmək wa-s təstǎɣăm žik s-elenžil iyyăn, kăwăn istaɣăn făll-wa kăwăn iɣra s-ănnuɣmăt n-Ălmasex. ⁷ Wăr-t-ill’elenžil iyyăn, mǎšen əllăn-t iyyăḍ aytedem kăwăn dalămnen, əranen ad-səməttəyăn elenžil wa n-Ălmasex. ⁸ Măšen kud năkăneḍ imăn-nes, meɣ angălos d-ifalăn ižənnawan d-awăn igan isălan n-elenžil iyyăn wərən imoos a-wa kăwăn nəsəsăɣra, ad-ilɣan. ⁹ Ǝmmək wa-s-ti nənna s-tizarăt , ămăra, ənneɣ-tăn tolăs: «Amər d-awăn iga ăwadəm isălan n-elenžil izlayăn d-wa tăɣbălăm, ad-ilɣan». ¹⁰ Ămăra egen a ăṣṣofeɣ ad-əgrəzăɣ i-ăytedem meɣ i-Măssinăɣ? Egen agămăy a tagăɣ ad-əgrəzaɣ i-aytedem? Ǝndar əgamăyaɣ hărwa ad-əgrəzaɣ i-aytedem wər z’əqqălaɣ akli n-Ălmasex. ¹¹ Ayətma, əsəlmədăɣ-kăwăn a-s elenžil wa kăwăn əsəslaɣ wər d-ifel ăgg-adəm. ¹² Fəl-a-s năkk-iman-nin, wər-t əgrəwaɣ ɣur ăgg-adəm, wər-t əlmədăɣ ɣur ăgg-ădəm, măšen tănəfilalt ad-i-ti d-‘iga Ɣisa Ălmasex. ¹³ Təslam i-timuzal-in dat-a-wa a-s ăheɣ əddin wa n-kəl-ălyahud, zaɣəzabaɣ s-əmmək okayăn ălkănisat n-Măssinăɣ sibišəšaɣ-tăt, ¹⁴ ogărăɣ imižiha-nin wi n-tawšet-nănăɣ ăggootnen dăɣ-ălkum okayăn əmmək n-əddin wa n-kəl-ălyăhud. Ogărăɣ-tăn gəlluyăt dăɣ-iḍuf n-alaṣṣăl n-abbatăn n-nănăɣ. ¹⁵ Măšen Măssinăɣ wa d-i isănăfranăn, zămad a-s igrăz a-wen iɣr-i-du s-ănnoɣmăt-nes hărwa a ăheɣ tadis n-ănna-nin, ¹⁶ i-ad-i dd- isənnəfilil rure-s i-ad- t-əməlaɣ i-tăwšeten. Wər ăqqălăɣ i-ad-əssəstănăɣ tăra n-taɣəssa wăla azni, ¹⁷ wər əkkeɣ daɣ Yărusălăm i-ad-ənyaɣ wi d-i ăzzarnen dăɣ-tumast n-ănəmmazal, mǎšen ărabi a əkkeɣ, dəfər a-wen ăqqălaɣ Dăxmas. ¹⁸ Kăraḍ iwətiyan dəfər a-wen,əkkeɣ Yărusălăm i-ad-ənyaɣ Sefas, əzdăɣăɣ ɣur-s măraw ižilan d-səmoos. ¹⁹ A-wa wərən imoos Yaqub wa n-aŋŋa n-Imili,wər-t illa anămmazăl ənayăɣ. ²⁰ Dăɣ-awa d-awăn əktəbăɣ, ənta da dat Măssinăɣ wər gənneɣ bahu. ²¹ Dəfər a-wen əkkeɣ ikallăn wi n-Suriya d-Silisiya. ²² A-s ig’a-wen ălkănisaten n-Ălmasex ti əhanen Ălyăhudəyat, wər ənăynăt idəm-in hărwa ²³ măšen salənăt ɣas as: « ăwedem wa-s kăla d-anăɣ izăɣăzab, ămăra itag isălan n-immun wa-s kăla t-izəngăt»; ²⁴ ad-t əmuyenăt Măssinăɣ fəl-tăăssăba-nin.