¹ Deffer adi issewal yaysa d akal en Galilaya, felas wer ira esewel en wa n Yahudeyya , id imuzaran en kel-Elyehud a gammaynen ed tanayay-net. ² As itaggu awen emud en kel-Elyehud was itawannu wa n Tekarbanen ihoz-du. ³ Ennan-as medrayan-net: (Efel da takka akal wa n yahudeyya fel ad eneyan nettulab-nak esseylan win tetagga. ⁴ Awedan as ira fall-as tagu masnat wer iseqqel day essir. Dad zama as tetaggay aratan ogdanen d awa, wedi agu temewit ta fel tan-z-iney awedan kul.) ⁵ As das-gannin medrayan-net awen da wer ser-es ezzegzanan. ⁶ Inn-asan yaysa: (Assayat ta-nin harwa da wer du-tewed. Kawanay amaran wer tezlayam assayaten. ⁷ Wer t-illa eddelil a fel kawan-za-tegzer eddenet. Nak amaran eddenet tegzàr-i felas tegeyya a emosa y arak mazalan win day-as tagginen. ⁸ Akkiwat amud wen kawanay. Nak wer t-ekke felas assayat-in harwa da wer du tewed.) ⁹ As dasan-iyrad tenna n aratan win, iqqim-du day Galilaya ¹⁰ Der iga awen da ya as ekkan medrayan-net amud,ikk-ay yaysa enta da, eges iki wa zun as iga day essir, felas wer issekna iman-net y aytedan. ¹¹ Itaggu emud den da gammayan-tu muzaran en kel-Elyehud gannan: ( Ma iga ales a? ) ¹² As itaggu awen tenkàr temazaq ger aytedan day layla en yaysa. Wiyyad za gannan: ( Ales di olày.) Wiyyad amaran gannan: ( Kalar esexrek fadda a itaggu tamattay.) ¹³ Misan wer t-illa awedan ihalan amagrad dat aytedan day tayla-net, fel tekseda en muzaran en kel-Elyehud. ¹⁴ As isaggaraygaray emud ikka yaysa Ehan wa zewweran n Elyibada a day-as isasayru. ¹⁵ Esesseyri wa iqqan iyafawan en kel-Elyehud wellen har eqqiman gannin:( Wa ak awedan ma t-issosanan aratan win, enta wer iyra? ) ¹⁶ Inn-asan yaysa: (Esesseyri-nin warge nak a d-ifal, kalar wa di-d-izammazalan a d-ifal. ¹⁷ Awedan kul wa iran ad ammazal tara en Messina, wedi ad issen kud esesseyri-nin enta Messina a d-ifal wala dey arat a imos a d-enzama ger-i ed man-in. ¹⁸ Awedan wa issewalan s aratan a d-inzàm gar-es ed man-net, wedi iman-net as igammay tanaya en wa t-id-izammazalan, wedi tidet a immal, wer day-as t-illa a imosan lahan. ¹⁹ Wergey ikf-iwan ennebi Musa Elqanun? Wer kawan-iha za i das-ilkàman. Mafel as teram a di-tanyim? ) ²⁰ Ennan-as aytedan: ( Kay aggesuf a kay-ihan. Ma iran tenayay-nak? ) ²¹ Inn-asan yaysa: ( Nak telmeyjujat iyyada yas a ege day ezel en tesanfawt, misan eqqanan-as yafawan-nawan. ²² Kawanay wergey tesaqqalam ? Amaran wer fall-awan imos awen lahan, falas ennabi Musa a dawan-t-innan- as iga awen imarawan-nana a t-id-essentamen, werge Musa. ²³ Eneyat za, dad imos as itawasamankad barar day ezel en tesanfawt fel lekkum y esseriya wa n ennebi Musa, mafel as kawan-iha alham-in felas egey y awedan ezuzey ikmàlan day ezel en tesanfawt? ²⁴ Ad wer texakkaman awedan s azzahir-net. Kalar xakkamat.) ²⁵ As t-oggan arat day aytedan win yerusalam ad gannin: ( Awak ales wen, wargey enta as eran muzaran-nana tenayay-net? ²⁶ Amaran enta den emeredda issewalan den dat awedan kul, war t-illa i das-igannin wala! Awak immikkan imuzaran-nanay a sallakannen as enta a imosan Elmesix? ²⁷ As iga awen da za ales wa nessàn akal wa d-igmad, Elmesix amaran assaya wa du-z-asu enefilal yas a du-z-agu, wer t-illa awedan a issànan da d-igmad.) ²⁸ Harwa da isasayru yaysa day ahan wa zewweran n Elyibada as idkal emesli-net wellen inna: ( Tezdàyam-i tessànam sas d-ehe! As iga awen da ya wer d-ose ger-i ed man-in, kalar wa imosan tidet a di-d-izammazalan; amaran wer tu-tezdayam. ²⁹ Nak ezdayaq-qu, felas enta ser-wan d-efala, amaran enta di-d-izammazalan.) ³⁰ Den da ad egmayan muzaran en tamattay d abbaz-net michan wer tan-iha i t-iha i t-idasan, felas alwaq-net a du-wer-newed harwa da. ³¹ Aytedan aggotnen a ezzegzannen es yaysa day tamattay en, gannin: (Tordàm as kud d-osa Elmesix ifràg esekni n alyalamaten ogarnen chin issekna ales wa? ) ³² Arat wa simetektikan aytedan day tamattay ta, eslan-tu farisaytan. Enkaran limaman win zawwarnen, ed farisaytan esseglan-du imagazan n Ahan wa zewweran n Elyibada y ad abezan yaysa. ³³ Inn-asan yaysa: ( Nak ad agay arat en tamert eddewa der-wan, deffer adi amaran ad z akka wa di-d-izammazalan. ³⁴ A di-tegmeyam michan wer di-za-tegrewam felas edag wa z akka wer tefregam iki-net. ) ³⁵ Ad tinemesestinan kel- Elyehud, gannin: ( Ma imos za adag wa z akku daq-qu wer za negrew? Meqqal kel-Elyehud win wazawaznen day kallan win tama a z akku iggez-tan ? Mey ak aytedan win wer nemos kel-Elyehud a z isasayru ? ³⁶ Ma imos almayna en batu ta iga da, as inna: ( A di-tegmeyam michan wer di-za-tegrewan, felas tefregam iki n adag wa z akka ?) ³⁷ As d-ewad ezel wa ilkaman n emud wa n Tekarbanen, s enta a imosan ezel wa zewweran day emud en, ibdad yaysa dat tamattay idkal emesli-net inna: ( Awedan kul wa iffudan akkiwet-i-du ad achew. ³⁸ Awedan kul wa ser-i izzegzanan ( ad engeyan gerwan n aman win sidurnen day ewel-net ), s emmek was iktab awen day Elkettaban.) ³⁹ Batu ta iga yaysa den, infas wa zeddigan a ser-es issoka, a z egrewan aytedan win ser-es ezzegzannen. Enta azzaman en infas wa zeddigan wer itawakfa harwa da felas yaysa a wer neggez tanaya-net. ⁴⁰ As isla ades en tamattay en i batuten chin iga yaysa da ennan: ( Illikan as ales wa enta a imosan Ennebi wa ittemalan!) ⁴¹ Ennan wiyyad: ( Elmesix Galilaya ? ⁴² Awak Elkettaban wergey a ennan: Ezzurreyya en Dawed, ed teyremt en betalxam s enta as kala day-as iysar Dawed, a du-z-igmed Elmesix.) ⁴³ Emmek en day as temmezray tamattay day talya en yaysa. ⁴⁴ Wiyyad day-san eràn abbaz-net, michan wer tan-iha is t-idas efus-net. ⁴⁵ Eglan magazan n Ahan wa zewweran n Elyibada eqqalan ilimaman win zawwarnen, ed farisaytan. Osan-in yas ennan-asan: ( Mafel wer t-idu-tewayam ?) ⁴⁶ Ennan-asan magazan : ( Wer kala itawanay awedan igan awal wa iga ales en .) ⁴⁷ Ennan-asan farisaytan : ( Day adi kawanayda toyyam iman-nawan tetawasaxrakam? ⁴⁸ Essenat ill-ay i ser-es izzigzanan day-na ? ⁴⁹ Wer ser-es izzegzan ar tamattay n aljahilan wer nessen wala day awa ihan echeriya n Ettawret, as ketnasan tewàr-tan tulyant.) ⁵⁰ Inn-asan Nikodemos imosan iyyan day farisaytan s enta din-osan yaysa dat awen : ⁵¹ ( Echeriya-nana wer t-iha ad itewexkem awedan iket wer ichewal, itewessen awa day ichokal.) ⁵² Ennan-as : ( Galilaya kay telat kay da ? aknu teyaray n Elkettaban ad teneya kay iman-nak as wer t-illa ennebi a du-z-igmedan Galilaya.)