¹ Deffer adi ikka ɣaysa təgadamayt ta hadat n agaraw wa n Galilaya ,itâwann-as dəɣ agaraw wa n Tiberyad. ² Təlkam-as tamattay tagget,fəlas əhannayan aytedan alɣalamaten šin as itamazal əmosnen əmmek was izuzəy imiranan. ³ Iggeəzzay ɣaysa adɣaɣ,tezzar iqqim den da ənta əd nəttulab-net ⁴ As itaggu awen amud wa n Akkay ihoz-du. ⁵ Iswad ɣaysa inay tamattay tagget təzây-du ,inna i Filbus:"Məni du-za-nazzanzu tagəlla ətšan aytedan en kul ?" ⁶ Ǝsəstan wa as t-iga ɣaysa da issân arat was otas igi-net .A ira ɣas ad issən awa das-z-annu Filibus. ⁷ Inna Filibus i ɣaysa :"kud du-nəzzənza tagella ən sanatat təmad ən tafelt,almaɣna alxaq ən sanatat təmad n əzəl n əššəɣəl,da wer dasan-təkna arat". ⁸ Inn-as ənattalib-net igan Andrawəs wa n amadray ən simɣon Butros: ⁹ "Illa barar da ilân səmmosat təgəlwen n əššɣir d əššin kifitan ,mišan ya ma za aknin y aknin y aytedan ogdânen d awa?" ¹⁰ Inna ɣaysa:"Saɣɣamiwat tamattay kul."Təzzar əqqiman aytedan kul daɣ yel aggen illân den.Səmmos gim n ales a əhanen tamattay en. ¹¹ Idkal-du ɣaysa šigəlwən šin den.As iga igodan i Məššina ,izun-tanat i tamattay.Iga awen da i kifitan.Igraw awenda kul awa das-igdan. ¹² As əyyəwanan aytedan inna ɣaysa i nəttulab -net :"Šidəwat-du ikarammutan win du-tawaglaznen ,fel a daɣ-as wər iɣšəd wala." ¹³ Ǝɣradan-du əkəmmi ən karammutan win d-əglazan aytedan daɣ təgəlwen n əššəɣir šinad ən səmmosat a. Maraw əzmaman d əššin a d-ədnayan daɣ gəlzan en. ¹⁴ As ənayan aytedan win alɣalamat tas immozal ɣaysa da,ad gannin:"Igmâd aššak as ales wa ənta a imosan ənnəbi wa du-z-asin əddənet!" ¹⁵ issan ɣaysa as aytedan win abbaz a tu-z-agin šəhhəšəlan-tu tišit n əmənokal ,ilas-tan efel,ikka edag iyyan daɣ ədɣaɣ en da,ɣas net ¹⁶ As təga takəst zagadayan nəttulab-net s agraw, ¹⁷ əggazan aɣlal əssəwəlan agaraw y ad taɣrəmt ta n kafarnahum .Itaggu awen ehad ɣaysa amaran wer tan-in-ewed harwa da. ¹⁸ Igar-du adu issohen ad tanastaban aman n agaraw. ¹⁹ As əgan nettulab ən ɣaysa edag ən səmmos kilawtan madeɣ sədis n əšikel,oggan ɣaysa daɣ ihez ijiwankat-du fəl aman izay-du aɣlal wa han,təzzar təggaz-tan tasa. ²⁰ Mišan inn-asan ɣaysa :"Təgmədet-kawan tasa,nak awa!" ²¹ Gammayan d a t-id-əzzugəzan aɣlal den da,as der-san ewad əɣlal edag wa əkkan. ²² As əzəl wa hadan təgr-in tamattay ta təwarat efay n agaraw wen sen as aɣlal iyyanda ɣas a illan den əndazəl, amaran əssanan as ɣaysa wer inamaggaz aɣlal wa əd nəttulab-net.Ǝssânan ənta da as inəttulab-net ɣas-nassan as əglan. ²³ Ǝnzayan-du wiyyad a d-əfalnen aɣrəm ən Tiberəyad.Osan-du dagma n adag wa daɣ tətša tamattay tagəlla dəffer godan win iga ɣaysa y Ǝməli. ²⁴ As tənay tamattay as ɣaysa wer illa den ənta wala inəttulab-net ,təggaz iɣlanlan win den əgmayan ɣaysa əs Kafarnahum. ²⁵ Osan-t-in fəl afay n agaraw wa hadan,təzzar ənnan-as :"Ya Ǝššex,Ǝmmay du-tose da?" ²⁶ Ig-assan ɣaysa alwajab wa,inna :"Ǝggəyye silakanaɣ-awan as wər di-təsəggədam ar fəl as tətšam tagəlla har daɣ-as təyyəwanam,wergey aššaddat n əgərri n almaɣna n alɣalamaten šin əmmozala a fel di-təlkamam. ²⁷ ayyat əššəɣəl daɣ agamay ən mensewan win ɣaššadnen,gammayat imensewan win wər nəɣəššəd,hakkin təməddurt ta təɣlalat.Imensewan win nak Ag Aggadəm a dawan-tan-z-akfin fəlas nak a issəwar Məššina di n Abba ejwal wa n taɣmar-net ²⁸ Ǝssəstanan-tu ənnan-as :"Məni za arat was danaɣ-iwar a tu-nagu y ad naknu əššəɣlan win ira Məššina?" ²⁹ Ijje/əwwab-asan ɣaysa innasan :"Ǝššəɣel wa daɣ-wan ira Məššina,wer t-imos ar ad təzzəgzənam əs wa d-issəgla." ³⁰ Ǝlasan-tu əsəstan ənnan-as :"Ma təmos za alɣalamat ta dana-za-tammazala fel a sər-ək nəzzəgzən?Macza taga? ³¹ Imaran-nanay ətšan daɣ r'taneray amensay wa n Manna.Ǝnta da awa ənnan Ǝlkəttaban daɣ batu tədi :"Iššətš-en amensay wa d-iflan ijənnawan" ³² Inn-asan ɣaysa :"Ǝggəyyəɣ silakanaɣ-awan as wərge ənnəbi Musa kawan-ikfan amensay wa d-ifalan ijənnawan.Abba-nin ənta kawan-ikfan amensay wa d-ifalan ijinnawan,imos amensay wa n tidət . ³³ Fəlas amensay wa d-ifalan Məššina anta a d-igmadan ijənnawan,amaran ənta a ihakkin təməddurt y əddənət." ³⁴ Ǝnnam-as :"Ǝməli,amensay wedi hakk-anaq-qu faw." ³⁵ Inn-asan ɣaysa :"nak a imosan amensay wa ihakkin təməddurt ta təɣlalat.Wa di-d-ikkan wər das-ilkem ad t-iggaz fad. ³⁶ Mišan anneɣ-awan tənayam-i eges wər təzzəgzanam. ³⁷ Awendan kul wa di-ikfa Abba a di-d-asu,amaran wər za mələlləya fel i di-d-ikkan. ³⁸ Fəlas əzəbbi a d-əge daɣ ijənnawan fəl ad ammazala s arat wa ira wa di-d-issəglan,wergeɣ arat wa əre nak iman-in . ³⁹ Ǝnta wa di-d-izamazalan wər ira ad ixrək awedan waliyyan daɣ win di-ikfa, kalar a ira a tan-d-əssənkera daɣ təmattant əzəl a ilkaman. ⁴⁰ awalla ,ənta da awa ira abba-nin:aytedan kul win di-ənaynen nak barar-net,əzzəgzanan sər-i ,əntanay a z'əgrəwnen təməddurt ta təɣlalat,əssənkəraq-qan-du daɣ təmattant,əzəl wa ilkaman". ⁴¹ Təzzar ad tigətəntinan kəl-Ǝlyahud əhân batu-net fəl as inna :"nak a imosan amensay wa d-igmadan jənnawan. ⁴² Gannin:"Awak awen wərge ɣaysa wa n ag Yusuf,nəkna təməzdeyt n abba-net d anna-net manəmmək as du-z-inker əmərədda ad igannu ijənnawan a d-igmad? ⁴³ Ijjəwwab-asan ɣaysa inn-asan:"ayyiwat əgətəntən gar-ewwan. ⁴⁴ wer t-illa idi-du-z-akkin ar s a t-id-ewây sər-i Abba a di-d-issəglan,nak amaran əssənkəraq-q-idu daɣ təmattant əzəl wa ilkaman. ⁴⁵ Ǝlkəttaban n ənnəbitan ih-en as:"ketnasan a tan-isassayru Məššina"Awedan kul wa islan y Abba, iəbal əsəssəɣri-net wedi a di-dakku ⁴⁶ wər t-illa is kala ad inay Məššina di n Abba ar wa t-id-ifalan.Ǝnta ɣas a t-inayan. ⁴⁷ Ǝggəyyəɣ əsilakanaɣ-awan as i izzəgzanan ad igrew təməddurt ta təɣlalat ⁴⁸ Nak a imosan amensay wa ihakkin təməddurt. ⁴⁹ Imarawannawan ətšan Mann adaɣ taneray mišan wər dasan-igdel awen təmattant ⁵⁰ As iga awen amensay was ganna nak ,ijənnawan a daɣ d-igmad.I t-itšan wer tu-z-iba. ⁵¹ Nak a imossan amensay wa d-igmadan jənnawan ihakku təmədurt.Awendan kul wa itšan amensay wa ad iddər har faw Amaran taɣəssa-nin a təmosat imensewan win z'akfa fel ad təgrew əddənet təməddurt." ⁵² Tənkar tamazaq təssohet ger kəl-Ǝlyəhud ad gannan :"manəmmək as dana-z-akfu awedan wa taɣəssa-net natš-et? ⁵³ Təzzar inn-assan ɣaysa:"Awalla,əggeyyey əsilakanay-awan âs as wər tətšem taɣəssanin nak Ag Aggadəm,tašwim deɣ azni-nin,wər dawan -tu-təlla təməddurt ta təɣlalat ⁵⁴ Awedan wa itšan taɣəssa-nin išwa ənta da azni-nin,wədi igrâw təməddurt ta təɣlalat,əssənkəraq-q-idu deɣ daɣ təmattant əzəl ilkaman. ⁵⁵ Fəlas taɣəssa-nin amensay wa n tidət a təmos, azni-nin dəɣ aman ən tassay win tidət a imos. ⁵⁶ Awedan wa itšan taɣəssa-nin,išwa deɣ azni-nin, wedi irtay dər-i,nak deɣ əheɣ əwəl-net. ⁵⁷ Abba wa di-d-izammazalan ənta ɣur təlla təmədurt amaran ənta a di-tat-ikfan,daɣ adi wa itšan taɣəssa-nin ad t-əssudera nak da. ⁵⁸ Ǝnta əddi da amensay wa d-igmadan ijənnawan.wər ol a əd wa ətšan marawan fəlas wər dasan-igdel adi təmattant awedan wa t-itšan,wedi ad igrew təməddurt ta təɣlalat. ⁵⁹ Arat da da wa inna ɣaysa daɣ ahan n əlɣibada ən kel-Ǝlyəhud daɣ əɣrem wa n kafarnahum ⁶⁰ As əslan nəttulab-net aggotnen y arat wa inna da,ənnan :Batu ta ši labasat,izzəwat əzəgzan-net.Ma ifragan əlqəbulat-net?". ⁶¹ Issan ɣaysa day man-net as gitantanan nəttulab-net gar-essan daɣ talɣa ten,inn-asan:"Ǝngəm əzəgzan-nawan a tədas batu di? ⁶² Ma za tagim za as di-toggam nak Ag Aggadəm tagazzaya s adag wa əheɣ əstizarat? ⁶³ Infas wa Zəddigan a ihakkin təmədurt.awedan əs təɣəssa-net,wər imos wala.Awalan win dawan-əgəy,infasa mosan, hakkin deɣ təməddurt. ⁶⁴ Mišan əhân-kawan aytedan wer nəzzəgzan.ɣaysa harwa ɣur tizarat da isšan win nezzegzan ,issân deɣ wa tu-z-agin daɣ fassan. ⁶⁵ Ilas inn-asan:"Adi da a fel dawan -ənne:wartila ifragan a di-d-akku ar s ad t-ikfa Abba fərregat n adi." ⁶⁶ Den da dəffər-əs ifal a əggen daɣ nəttulab-net ,əɣradan əd tidawtnet. ⁶⁷ Təzzar inna ɣaysa i nəttulab win maraw d əššin :"Meqqal kawanay da təram teklay ? ⁶⁸ Inn-as simɣon Butros :"Ǝmeli,ma imos wa za nakku?kay a ittaggan awalan win əhakkanen təməddurt ta təɣlalat. ⁶⁹ Nakkanay nəzzigzan sər-ek ,nessân as kay Ǝmizdag a d-ifâlan Məššina. ⁷⁰ Inn-assan ɣaysa :"ak wergeɣ əsənnəfrən a kawanəge ketnawan,fel marawewwan d əššin,kuddeɣ âs iyyan daɣ-wan iblis." ⁷¹ Batu ta Yahuza wa n ag simɣon Isxaəyuti a fel tat-iga ɣaysa fəlas Yahuza a tu-z-agin daɣ fassan kuddeɣ âs iyyan daɣ nəttulab win maraw d əššin a imos.