¹ Eslan farisaytan as itawannu igraw inəttulab ogarnen win Yaxya isalamaq-qan dagh aman. ² (Arat wa imosan tidet Yaysa iman imanet-wer iselmigh awadam waliyyan day aman,inattulab-net a salmaynen aytedan dagh aman.) ³ As isla Yaysa y awa itaqqalam, igmad amadal wa n yahudeyya, iqqal Galilaya. ⁵ Dad t-ilzam imur n amadal wa n samareya, ⁴ issokal har ewad ayrem iyyan en samareya igàn esem sixar, dagma en tawagost ta ikfa yaqub barar-net yusef. ⁶ Edag wen enta a iha eyarus en yaqub. As t-id-ewad yaysa, iddàz esikel, tezzar iqqim fel emi n eyarus, itaggu awen ammasnazal. ⁷ As ekkan nettulab-net ayrem y ad d-azzanzin imensewan, ⁸ tewar-du tentut en kel-Samareya a du-tezràgat anu en. Inn-as yaysa: (Sasw i-du.) ⁹ Tenn-as: (kay temosay iyyan day kel- Elyehud tegammaya day-i aman, nak temosat iyyat day kel-Samareya ?) ¹⁰ Inn-as yaysa: ( Ennar tessànay arat wa ihakku Messina, tessànay dey awa emosa nak wa kam-itansayan aman en tassay, tansiyay-i-tan kam, akfay am-tan dey emosan win sidurnen.) ¹¹ Tenn-as tentut: ( Essex-in,anu izagren amaran kay wer taley aga, day adi meni du-za-tegreway aman win sidurnen di ? ¹² Sigrat a tegey emaraw-nana yaqub a danay-ikfan anu a, iswa aman-net, eswan-tan maddanes d aharay-net ? ) ¹³ Inn-as yaysa: ( I iswan aman di, ad t-iles fad iguz, ¹⁴ misan i iswan aman win tu-z-akfa wedi immizzay ed fad, felas as day-as eqqelan adri ingayan s aman win hakkinen temeddurt ta teylalat.) ¹⁵ Tenn-as tentut: ( Sasw-i-du day aman win di, fel a di-igmed fad, ammazzaya d azarog n anu a.) ¹⁶ (Aglu), inn-as yaysa. ( Ayra-du ales-nam teqqelay-i-du da da.) ¹⁷ Tenn-as: ( wer eles. ) Inn-as yaysa: ( Tidet-nam as tenne wer teley ales, ¹⁸ felas semmos as kala tan-tele, amaranwa yur telley emeredda wergey ales-nam. Tidet a di-tege.) ¹⁹ Tezzar tenn-as: ( Ehannayay as kay ennebi a temosa. ²⁰ Imarwan-nana adyay a da a fel eybadan Messina, misan kawanay kel-Elyehud tennam yerusalam a iha adag wa day itawaybad Messina.) ²¹ ( Tantut ), inn-as yaysa,( Zegzen-i, alwaq izay-du a day wer za teyabbadam abba ger za fel edyay wa, wala dey yerusalam. ²² Kawanay kel-samareya wer tezdayam wa teybadam, nakkanay kel-Elyehud nezdày wa neybad, felas efsan iguz wa n kel-Elyehud a d-egan. ²³ Misan alwaq izay-du-amaran osa-du-was inaybidan win tidet ad eybedan Abba s infas wa Zeddigan ed tidet, felas abba inaybidan win t-eybadnen es temewit tedi, entanay a ira. ²⁴ Messina infas wa zeddigan a imos, amaran inaybidan-net ilzàm-tan ad t-eybedan s Infas wa Zeddigan ed tidet. ) ²⁵ Tenn-as tentut: ( Essànay as Elmesix, itawann-as Kristos, a d-asu. As d-osa a danay-isassagru aratan kul.) ²⁶ Inn-as yaysa: ( Nak a t-imosan, nak wa dam-issewalan da.) ²⁷ Assayat ten da a d-eqqalan nettulab, iqqan-asan eyaf emesiwal wa iga yaysa ed tentut. Misan wer tan-iha i ihalan ad t-issesten, ann-as: ( Ma day-as tare ?) Madey: ( Mas der-es temasawala ?) ²⁸ Tezzar toyya-du tentut etekin-net teqqal ayyrem tanna y aytedan: ²⁹ ( Ayewat ad teneyam awedan a di-imàlan arat kul was kala ad t-ege, ifràg as enta a imosan Elmesix! ) ³⁰ Tezzar egmadan-du aytedan ayrem ekkam yaysa. ³¹ As itaggu awen inettulab gammayan day yaysa ad atsu, gannan-as: ( Essex, atsu arat iyyan.) ³² Inn-asan: ( Imensewan win z atsa wer tan-tezdayam. ³³ Ad tenemennin nettulab gar-essan: ( Engem yas wergey awedan iyyan a das-d-ewayan imensewan? ) ³⁴ Inn-asan yaysa: ( Imensewan-in wer tan-imos ar ad ammazala tara en wa di-d-izammazalan, eyreday esseyel wa day-i iga. ³⁵ Awak kawanay wer tegennim: ( Eqqimnat-in ekkozat telil y ad tagu yarat? ) Nak za enney-awan akniwat ezeggezdi en tewegas ad teneyam as siyayanen ennanat, wer erenat ar emiley. ³⁶ Awedan wa italayan, wedi igraw erruzmatan-net. Siyayanen sin temeddurt ta teylalat a isadaw, fel ad ajjayat wa inabbalan ed wa italayan tedewit. ³⁷ Felas tidet en temajeq ta tennat: ( Ales iyyan inabbal, iyyan italay.) ³⁸ Esseglaq-qawan fel ad taleyam tawagost a day wer tesyelam, aytedan wiyyad a day-as esyalnen, misan tegrawam tenfa day esseyel wa egan den.) ³⁹ Ezzegzanan aytedan aggotnen en kel-Samareya es yaysa felas tantut a dasan-tennat: ( Imàl-i aratan win as kala tan-ege.) ⁴⁰ Awen da a felas osan-t-idu yas egmayan day-as a yur-san aqqam. Iqqim yur-san yaysa har iga essin adan. ⁴¹ Eslan aytedan y awal-net, ezzegzanan ser-es wiyyad ogarnen winad iget. ⁴² Tezzar ennan i tentut: ( Nakkanay seket nekna ezegzan felas estizarat kam yas a danay-igan isalan, emeredda imosan Enessefsi n eddenet. ) ⁴³ As endan essin adan win den, ikka yaysa amadal en Galilaya, ⁴⁴ felas enta iman-net as inna, ennebi wer iteweseymir day ayrem day idwal. ⁴⁵ As din-osa Galilaya eqbalan-tu kel-Galilaya id enayan imazalan kul win iga day yerusalam yur emud wa n Akkay felas entanay da osàn-in amud en. ⁴⁶ Ilas-du yaysa assa en teyremt en kàna ta n Galilaya, ta day isammattay aman ig-en esmad n alyanab. Ill-ay ales imosan amassayal n emenokal day teyremt en Kafarnahum. Ales a ila barar-net irinan. ⁴⁷ As isla as yaysa igmàd-du amadal en Yahudeyya iha Galilaya, os-ay-du onsay-tu ad idawan, a das-izzuzey barar-net ayur tella temattant. ⁴⁸ Inn-as yaysa: ( As wergey ad tenàyam alyalamaten emmittaynen ed telmey jujaten, wer za tezzegzenam fadda.) ⁴⁹ Inn- as amassayal n emenokal: ( Emeli, eres-anay es kafarnahum tarmad harwa ad wer aba barar-in. ) ⁵⁰ Inn-as yaysa: ( Aglu, barar-nak izzay . ) Ales dey izzegzan s awal en yaysa, igla. ⁵¹ Iha tarrayt iqqàl as immenay ed massayalan-net das-d-elkamnen. Ennan-as: ( Barar-nak izzay.) ⁵² Issestan-tan inn-asan: ( Ma imos alwaq wa day igraw iman-net? ) Ennan-as: ( Endazel iggi en tazzar a fall-as tewar tanaday.) ⁵³ Ikta-du ales as alwaq wen da iman-net a day-as inna yaysa:( Barar-nak izzay. ) Izzsgzan ser-es enta d ayaywan-net kul. ⁵⁴ Enta da da telmeyjujat temosat alyalamat ta n sanatat immozal yaysa day day Galilaya deffer agamad-net Yahudeyya.