¹ Ǝzel wa n karad təmal-tu təkrəst day əyrəm ən kâna day amadal ən Galilaya, tah-et anna ən Yaysa, ² təzzar itawayra-du yaysa ənta da, iddew-du əd nəttulab-net əs təkrəst en. ³ As ab'as d-iqqim wala day esmad n alyanab, tənna anna ən yaysa y as: «Esmad n alyanab iyrad.» ⁴ Inn-as yaysa: «Anna, tədi a kam-wər-tədgəz. Alwaq-in wər d-ewed.» ⁵ Tənna anna-net i machchayalan: «Agat awas dawan-inna kul.» ⁶ Ǝskâran den sədis təkan taggazan aman as taggin kəl-Ǝlyəhud əzəzdəg imosan alyadat-nasan. Ǝkkulluk n iyyan itaggaz-tu əddukad ən temeday ən litər. ⁷ Inna yaysa i machchayalan en: «Ǝdnəyat itəkan di aman.» Ǝntanay dey ədnayan-tan har fayyan. ⁸ Inn-asan amaran: «Ǝlkəwat day-san əmərədda y əmaway ən saksas.» Ǝgan awen da. ⁹ As iram əmaway ən saksas aman win əmməttaynen da, əqqalan esmad n alyanab as wər issen iguz wa d-iga, michan imachchayalan win tan-d-əlkawnen da əssânan, iyra amazlay, ¹⁰ inn-as: «Iməssəksas kul esmad n alyanab wa izodan a garrawan, amaran dəffər as filawasan ad garrawan wa isammakkanan. Eges kay təybara wa izodan har əmərədda!» ¹¹ Ǝnta əddi təlməyjujat təmosat alyalamat ta tazzarat immozal yaysa. Ig-et day əyrəm ən kâna ta n Galilaya. Isannafalal sər-əs tanaya-net, təzzar əzzəgzanan sər-əs nəttulab-net. ¹² Dəffər awen izagaday yaysa, ikka tayrəmt ən kafarnahum, ənta d anna-net, əd mədrayan-net, əd nəttulab-net. Wər day-as əgen ar arat n adan. ¹³ As d-ihoz əmud wa n Akkay imosan amud maqqaran ən kəl-Ǝlyəhud, iggezzay yaysa ikka Yerusalam. ¹⁴ Ogaz-in yaysa day ayalla wa iylayan Ehan wa zəwwəran n Ǝlyibada, imassatagan ən zəgran, d ayfəd, əd tədəbren, əd təyimiten ən kəl sanji. ¹⁵ Iga ələkkud əs yunan istaq-qan day afarag en ketnasan, əntanay d ayfed, əd zəgran, infaz day amadal izərfan ən kəl sanji, isabbanbay tebəren-nassan. ¹⁶ Imassatagan ən tədəbren əntanay inn-asan: < Ǝkkəsat awa day adag a, ad wər tagim ehan n Abba-nin əssuk. ¹⁷ Ǝktan-du nəttulab akatab n ənnəbi Dawəd wa innan: «Tara-nin ehan-nak tərya day-i chilat ən təmsay.» ¹⁸ Ǝssestanan-tu muzaran ən kel-Ǝlyehud ənnan-as: «Ma təmos təlməyjujat tas təfragay igi-net təmosat alyalamat, təsitaddat as təley tarrayt n igi n adi ? ¹⁹ Ijjəwwab-asan yaysa inn-asan: «Jəbbərəjjətat Ehan wa Zəwwəran n Ǝlyibada di, ad t-əssəbdəda day karad adan. ²⁰ Ǝnnan-as: «Ehan wa Zəwwəran n Ǝlyibada di əkkozat təmərwen n awatay əd sədis a fəl itawakras. Kay mas tu-za-təssəbdəda day karad adan?» ²¹ Ehan wa Zəwwəran n Ǝlyibada wa immal yaysa da, tayəssa-net a sər-əs issoka. ²² As d-inkar day təmattant əktan-du nəttulab-net tənna ta iga adi. Ǝzzegzanan s Awal ən Məchchina, d awal wa iga yaysa da. ²³ Aytedan aggotnen əzzigzanan əs yaysa yur anay ən təlməyjujaten chin immozal əmosnen alyalamaten, day adan win iga day Yerusalam yur əmud wa n Akkay. ²⁴ Michan ya yaysa wər tan-ifles fəlas izdây-tan ketnasan, ənta. ²⁵ wər iddərar s i das-igan isalan n awedan id wər das-iyber awa ihan əwəl-net.