¹ Astizarat as d-ixlak Massina əddənet da Awal ill-ay. Awal illa ghur Massina,amaran Awal wa imos Massina. ² Awal əstizarat illa ghur Massina. ³ Ixlak-du sər-əs Massina arat kul; wər t-illa arat dagh addənet wa ser-əs du-wər-nəxlek fəlas Awal wa ənta a ihakkin təməddurt ta təmosat ənnur y aytedan. ⁴ Imilawlaw dagh shiyyay ⁵ mishan wər t-əqbelnat. ⁶ Osadu aləs iyyan igâ əsam Yaxya, a d-izimazal Massina; ⁷ imos tegeyya fəlad ammagrad s ennur wa, əzzəgzənən aytedan kul s arantan win igannu. ⁸ Ənta iman-net wər imos annur, ətəwasəgla ghas a d-iga imos təgəyya fəl ad ammagrad s ənnur wa. ⁹ Awal wa ənta a imosan ənnur wa n tidet, wa d-ikkan əddənet isimələwləw aytedan kul. ¹⁰ Ənta a ihan addenat, ixlak-katdu sər-əs Massina , michan wər tu-təqbel əddənət. ¹¹ Osa-du akal-net eges wər t-əqbelan aytedan -net. ¹² Amaran aytedan kul win t-əqbalnen, əzzəgzanan sər-əs, win di ikf-en almaqam ən tischit ən bararan ən Maschina. ¹³ Bararan en əlâsan təhəwt. Mishan təhəwt en wər tola əd ta tətawazdayat. Wər taga əs ləkkum i deran n aggadam, wala tanat-net. Kala kalar Mashina imannet as tan-iga bararan-net. ¹⁴ Wa imosan Awal, iqqal awedam ixsar ghur-na, ikna təla n əlxurma, imos məshis ən tidət. Nəsinagra tanaya-net, tanaya ta igarraw Barar a n iyyanda ghur Abba-net. ¹⁵ Iggəyyat-as Yaxya, issewal s afalla ad igannu : Wa dagh as əhe batu-net, assagha wa dawan-ganna : " A d-asu dəffər-i mishan ogar-i,fəlas dat-i da ill-ay." ¹⁶ Awalla ketnana nəgraw albaraka wər nəla əddukad s əlxurma-net ikm̂alan. ¹⁷ Fəlas Məshina ikf-anagh əshərigha dagh əfus ən Musa, əlxurma əd tidət amaran osa-du dər-san ghaysa Əlməsix. ¹⁸ Wər t-illa awedan inâyan Məshina, mishan Barar a n iyyanda imosan Məshina, illa ghur Abba, ənta a danaq-q-issosanan. ¹⁹ Ənta da təgəyya ta iga Əlməsix y arat dagh limaman əd kəl-Lebi win d-əfalnen Yerusalam assagha wa tan-du-zammazalan muzaran ən kəl-Əlyəhud y ad t-əssəstənan d awa imos. ²⁰ wer ugay s a dassan-ajjawwab.kala kalar idkal əməsli-net s afalla inn-asan:nak wer əmosaɣ əlməsix. ²¹ Ǝnnan-as:"ma təmosa za? Ilyas a təmosa ? inn-assan ; "war təmosa.>Ǝnnəbi wa itteəmalan a təmosa ? ²² Təzzar ənnan-as: "Day adi ma təmosa? Ihor a din-nasu aytedan win dana-d-əssəglanen newây-asan aljawab n awa təmosa. Day adi əməl-anaq-qu." ²³ Inn-asan arat wa inna ənnəbi Isayas irew, as inna: "Nak, a imosan wa isayaren day əsuf igannu: "Səssiyədat abaraqqa y Eməli." ²⁴ Aytedan win d-əmmozalnen əs yaƏlməsixya da, əhân-tan kəl taggayt ta n Farisaytan. ²⁵ Ǝlasan-tu əsəstan ənnan-as: " Ma fel təsalmayay aytedan day aman, kay tənne wer tənne wər təmosay Ǝlməsix, wər təmosay dey ənnəbi wa ittəmalan?" ²⁶ Inn-asan : " Nak, aman a day salmayan, michan illa gar-ewwan awedan wər tezdayam, ²⁷ s ənta a du-z-asin dəffər-i, amaran awa di-iga day chigrat, wər eweda wala arra ən suyan ən yateman-net." ²⁸ Aratan win kul amadal ən Betanəy a day taggan fel tagadamayt ta hadat n agarew wa n Yordan s ənta a day isalmay yaxya aytedan. ²⁹ As iga əzəl wa hadan ogga yaysa izay-t-idu, təzzar inna: "Ǝnta den ajayol ən Mechchina wa itakkasan ibakkadan day əddənet. ³⁰ Ǝnta as əhe batu-net as dawan-ganna: " Aləs iyyan a d-asu dəffər-i, michan ogar-i fəlas dat-i dat-ill-ay." ³¹ Nak iman-in wər t-əzdaya michan ose-du ad salmayay aytedan day aman, fəl a d-inəfiləl i kəl-Ǝlyəhud. ³² Ilas Yaxya Yaysa təgəyya inna: «Ǝswâda day Infas wa Zəddigan as d-igmad jənnawan, iha chachchelan ən tədabert, iwar-tu. ³³ Dat awen wər t-əzdaya, michan Məchchina, s ənta di-d-izammazalan y ad əsalmayay aytedan day aman, inn-i:" Aləs was tənayay Infas wa Zəddigan as fall-as d-izzəbbat, aləs wədi ənta a z'isalmayan aytedan day Infas wa Zəddigan. ³⁴ Ǝmərədda arat wa ənayaq-qu əs chittawen-in; amaran əggəyye silakanay as aləs wa ənta Barar ən Məchchina.» ³⁵ As iga əzəl wa hadan, iha Yaxya edag wa harwa da, ənta əd nəttulab-net əchchin, ³⁶ ogga Yaysa as dagma-nasan d-illam, inna: «Ǝnta den, Ajayol ən Mechchina.» ³⁷ Ǝslan nəttulab win əchchin a i batu ta iga da, təzzar əlkaman i Yaysa. ³⁸ Iswad-in Yaysa dəffer-əs ogg-en əlkâman-as, inn-asan: «Mas təsaggadam?» Ǝnnan-as «Mənid təysara Ǝchchex?» ³⁹ Inn-asan «Agliwat-du a tu-tənəyam». Itaggu awen takəst zagret. Ǝglan əddewan dər-əs, ənayan dad illa, təzzar əssəndan yur-əs əzəl. ⁴⁰ Meddan win əchchin əlkamnen i Yaysa dəffer tasalay ta əgan y awal ən yaxya, esəm n iyyan day-san Andrawəs, amadray ən Simyon Butros. ⁴¹ Immənay Andrawəs dəmaqqar-net Simyon əstizarat, inn-as: «Nakkanay nəmminay d Ǝlmesix.» ( Almayna Kristos.) ⁴² Amaran ilway-tu əs Yaysa. Iswad Yaysa day Simyon yas inn-as: «kay simyon ag yaxya, ad tagay esəm Qayfas.» ( Esəm wa ola əd wa n Butros, almayna-net təhunt.) ⁴³ As affaw ira Yaysa iki n amadal ən Galilaya. Immənay əd Filibus inn-as: «Ǝlkəm-i.» ⁴⁴ ( Filibus d Andrawəs əd Butros ayrəm-nasan iyyanda, esəm-net Betsayda.) ⁴⁵ Immənay Filibus əd Natanəyel inn-as: «Nakkanay nəmminay əd was imməgrad ənnəbi 7Musa day Ǝttawret, əmmigradan sər-əs dey Ǝlkəttaban n ənnəbitan, a t-imosan yaysa wa n ag Yusəf wa n əyrəm ən Nazaret.» ⁴⁶ Təzzar inn-as Natanəyel: «Immikkan ayrəm ən Nazaret a t-id-əgməd arat ihossayan?» Inn-as Filibus: «Ayam tənəya.» ⁴⁷ Ogga Yaysa Natanəyel izay-t-idu, inna: «Ǝnta den awedan n Israyil wa n tidet, wa wər iha a imosan təlmənufeqa.» ⁴⁸ Inn-as Natanəyel : «Məni awas di-təzdaya?» Ijjəwwab-as yaysa inn-as: «Harwa kay du-wər-iyra filibus, assaya wad təlle daw asək wa n fig, da əhannayaq-qay.» ⁴⁹ Inn-as Natanəyel: «Ǝchchex, kay a imosan Barar ən Mechchina, təmosay əmənokal n Israyil.» ⁵⁰ Inn-as yaysa: «Təzzəgzana fel as dak-ənney əhannayaq-qay daw achək ən fig. Ad tənəyay aratan wiyyad zawwarnen ogarnen wədi.» ⁵¹ Inn-as yaysa dey: «Ǝggəyyey əsilakanay-awan as dəffər awa ad tənəyam ijənnawan ənnolaman tagazzayan sər-san angalosan, tazabben-du fall-i nak Ag Aggadəm.»