¹ Tezzar omar Bilates s ad tewegginat tewit n elekkud i yaysa ; itawagg-as awen da awen da. ² Ezdàn sojitan tekebbut tegàt es sennanan-tat eyaf-net, ezzezlagan-tu dey ebernuz zaggayan. ³ Tihazan-t-in gannan-as: ( Oyy-ik ! Emenokal en kel- Elyehud ! ) Taqqasan-as sa ed sa. ⁴ Ilas-du Bilates araday, inna i kel-Elyehud:( Eneyat ! A dawan-t-id-esserdeya, ad tessenam as wer fall-as enaya lahan waliyyan fel iwweddab.) ⁵ Tezzar irday-du yaysa tewàr-tu tekebbut en sennanan, izlàg ebernuz zaggayan, inn-asan Bilates: ( Ales-nawan eddi.) ⁶ As t-oggan muzaran en limaman ed magazan n Ahan wa zewweran n Elyibada, edkalan imaslan-nasan gannin: ( Taytay-tu fel tegettawt ! Taytay-tu fel tegettawt !) Inn-asan Bilates: ( Abezat-tu kawanay iman-nawan tattaytayam-tu, nak wer henneyay eddelil waliyyan a t-issiwaran temattant. ) ⁷ Ennan-as muzaran en kel-Elyehud: (Nakkanay nela echeriya, amaran echeriya wa, ih-ay as ales wa ihor ed temattant, felas a inna enta barar en Mechina a imos.) ⁸ Batu ta tega tasa wellen day Bilates, ⁹ iqqal ehan-net, iggaz edag wa n echeriya, inna i yaysa: ( Menis du-tehe ? ) Michan wer das-iga yaysa aljawab waliyyan. ¹⁰ Amazay wen da das-inna Bilates: ( Nak as tugaya s a di-techiwela ? Wer tessenay as ele ferregat n a kay-sassayya, eley entada ferregat n a kay-attaytaya fel tegettawt ?) ¹¹ Inn-as yaysa : ( Wer fall-i tele tarna waliyyat ar ta ser-ek du-tefalat Mechina. Adi da felas awedan wa di-igan ger fassan-nak, ogar-kay igi n abakkad. ) ¹² Amazay wen da day iggaz Bilates chin agamay n asaway was z ayyu yaysa. Michan enkaran-du kel-Elyehud ad gannin s afalla: ( Ales di as tu-tesassayya, wedi wer temosay emidi en Qaysara, emenokal en kel-Errum, felas awedan wa innan imos emenokal, wedi azangaw en Qaysara a imos ! ) ¹³ As isla Bilates i batu ta, isserday-du yaysa, tezzar iqqim day texawit ta n adag n echeriya. Edag wa esem-net ( Ayaryar ilsàn teselit) itawann-as day telyibrit ( Gabbata ). ¹⁴ Itaggu awen ammasnazal n ezel wa oggan amud wa n Akkay, simutugan aytedan y emud. Inna Bilates i kel-Elyehud: ( Emenokal-nawan eddi ! ) ¹⁵ Iqqal-asan awen as sahhaken imaslan-nasan wellen gannin: ( Ammatet ! Ammatet ! Taytay-tu fel tegettawt ! ) Inn-asan Bilates: ( Day adi ad attaytayay emenokal-nawan fel tegettawt ? ) Ennan-as muzaran en limaman: ( Emenokal-nana wer t-imos ar Qaysara. ) ¹⁶ Tezzar ikf-en Bilates yaysa y ad iteweteytey fel tegettawt. ¹⁷ Igmed ayrem ewày enta iman-net tegettawt ta fel z iteweteytey. Ekkan der-es edag as itawannu (Tekeyya), itawann-as dey day telyibrit ( Golgota ). ¹⁸ Den da ad etteytayan sojitan yaysa fel tegettawt. Tawataytayan echin meddan wiyyad entanay da fel tegettawen degma-net, a day illa yaysa gar-essan. ¹⁹ Omar Bilates s ad ammadkal esellum itewekteb fall-as: ( AwA YAYSA WA N NAZARET, EMENOKAL EN KEL-ELYEHUD ), iteweteytey day afalla en tegettawt. Itawagga awen da. ²⁰ Eyran kel-Elyehud aggotnen esellum wa. Enta edag wa day itawataytay yaysa fel tegettawt ihoz ayrem, amaran esellum wa iktàb day awal wa n telyibrit, ed wa n telatint ed wa n telyunant. ²¹ Ennan limaman win zawwarnen en kel-Elyehud i Bilates: ( Ad wer tayyay esellum wa tesseltaya tegettawt iktàb fall-as às: ( Ales wa emenokal en kel-elyehud ), kalar ekteb fall-as às: ( Ales da wa innan enta a imosan emenokal en kel-Elyehud. ) ²² Inn-asan Bilates: ( Arat wa ektaba, wer-tu-za-semmetteya.) ²³ As etteytayan sojitan yaysa fel tegettawt, edkalan iselsa-net, egan-asan ekkozat tezunen, ekkulluk n iyyan day-san igràw iyyat. Edkalan entada tekadkat-net ta zewwerat, tegàt day tebdoq wer iha a imosan azamay, tosày-du yur afalla har eres. ²⁴ Ennan gar-essan: ( Ad wer nezezzerret tekadkat ta, ofa ad nagu chichayeren fel ad nessen wa tat-z-ilen.) Arat wa ennàn-tu fel ad tandu batu tehàt Elkettaban ta tennat: ( Ezunan tabdoq-in, tezzar egan chichayeren fel tekadkat-in.) Arat wen enta iman-net a egan sojitan win den. ²⁵ Tegettawt ta fel itteytay yaysa, ebdàdnat dagma-net tedoden emosnen anna-net, ed Maryama ta n tamadrayt n anna-net, temosat tayur klobas, ed Maryama Madel. ²⁶ Ogga yaysa anna-net, inay enattib-net wa n emeri-net ibdàd dagma-net, inn-as: ( Anna, barar-nam eddi. ) ²⁷ Tezzar inna y enattalib-net wen: ( Anna-nak eddi. ) Amazay wen da day der-es iddew enattalib wen s ayaywan-net issan day-an. ²⁸ Deffer awen inna yaysa: ( Ih-i fad ), felas issàn as arat kul ikmal, amaran arat wa wer t-inna ar fel ad andu awa ennan Elkettaban. ²⁹ Edag en insa day-as eyezu iha beneger, temmedkal-du teduft tetawattal d emi n agabal n ezzenef n enniynay iyyan idwàlan as itawannu xisof, tetawasalmay-du day beneger wa, tetawazzal-in s emi-net. ³⁰ As izannalmaz yaysa beneger, inna: ( Arat kul ikmal.) Tezzar isseras eyaf-net, egmadan-tu man. ³¹ Ezel wen simutugan aytedan y emud wa n akkay. Wer eren kel-Elyehud ad aqqaminat alzanazaten n aytedan ewàrnat chigettawen day ezel wa n tesanfawt-nasan. Enta ezel wen, wer ogda ed win hadatnen tezzewwert. Ekkan muzaran en kel-Elyehud Bilates ennan-as: (Amer s ad tawarzin daran-nasan, fel a tan-iba tarmad, tessukesa-du alzanazaten-nasan !) ³² Ekkan-du sojitan meddan win tawataytaynen dagma en yaysa. Erzan idaran en wa azzaran, okayan es wa n echin egan-as awen da. ³³ As d-ewadan yaysa enayan as as d-osan da aba-tu. Eqqiman da wer erzen idaran-net, ³⁴ Michan idag iyyan day sojitan win tasaga en yaysa s allay-net, iffay-du day-as ezni d aman. ³⁵ Awedan wa igan isalan win, inay-tan es chittawen-net, amaran tegeyya-net tidet a temos. Issàn as tidet ta tezdarat as ichewal da, fel ad tezzegzenam kawanay da. ³⁶ Enta aratan win kul wer egen ar fel ad tandu batu tehàt Elkettaban ta tennat: ( Eyas-net waliyyan wer z arraz. ) ³⁷ Elkettaban ih-en entada as: ( Ad essedegan isawadan-nasan sa ser wa saxxarabben. ) ³⁸ Deffer adi osa-du yusef wa n eyrem n Arimatay, imosan iyyan day nalkiman en yaysa, eges day essir, felas iksud kel-Elyehud. Ikka Bilates igmay day-as ad ewey tayessa en yaysa. Ikf-ay Bilates turagat n awen, tezzar igla eway-tat. ³⁹ Osa-du Nikodemos enta da, s enta as kala din-osa yaysa ahad iyyan. Eway-du tefarchit day enyàlan alwarditan temosat amadal en karadat temerwen en kilaw. ⁴⁰ Idkal-du yusef ed Nikodemos tayessa en yaysa egan-tat day chifit tegàt day tesewad, esselalan-tat adutan ezodnen win. Arat wa imos alyadat en kel-Elyehud day anabal en nemmettan. ⁴¹ Edag wa day itawataytay yaysa fel tegettawt ih-ay afarag. Amaran afarag wen ih-ay ezekka imosan akazam as wer kala a day-as itawagga enemmetten. ⁴² Ezel wen enta day simutugan kel-Elyehud y ezel-nasan wa n tesanfawt, awen da fel iga yusef ed Nikodemos yaysa day ezekka wa, felas enta a ihozan.