¹ As inna ɣaysa awen, idkal asawad-net iggəzzay ijənnawan, ittar inna Abba, alwaq ewad-du, saknu tanaya ən Barar-nak fəl ad assaknu ənta da ta nak, ² Id təzzozaraq-qu y aytedan kul fəl ad akfu təməddurt ta təɣlalat i win tu-təfe. ³ Amaran təməddurt ta təɣlalat awa tat-imosan, ad inəfiləl y aytedan awa təmosa, kay a imosan Məššina wa n tidət, inəfiləl-asan əntada as ɣaysa Ǝlməsix a du-təzammazala. ⁴ Ǝssikna tanaya-nak fəl amadal s əsəndi wa əge əššəɣəl was di-təssəwaraɣ igi-net. ⁵ Amaran əmərədda kay Abba, akf-i ɣur man-nak tanaya ta ɣur-ək əleɣ harwa dat əxluk n əddənet. ⁶ Sinafâlalaɣ awa təmosa y aytedan win du-təsannafrana təskataq-qan-du daɣ əddənet, təgeq- qan daɣ əfus-in əttafan awal-nak. ⁷ Ǝmərədda əssânan as arat kul wa di-təkfə, kay a ɣur d-igmad. ⁸ fəlas əmâlaɣ asan awa di-tənne, əqbalan-tu, amaran silakanan as kay a ɣur d-əgmada, əzzigzanan deɣ as di-du-təzimazala. ⁹ Wər kay-tinsəya y aytedan win əddənet, kalar aytedan win di-təkfe as kay-tansayaɣ fəlas əntanay a təleɣ. ¹⁰ Awa əle kul i-nak, kay da awa təle kul i-nu, amaran əntanay en da a daɣ tənafalal tanaya-nin. ¹¹ Nak, ab'as aheɣ əddənet, kay a din-əkke, əntanay amaran əhân-tat. Ya Abba di zəddigan, əgəz-tan s esəm-nak ¹² Harwa tan-əhe, ogâzaq-qan s esəm-nak, di-təkfê, wər daɣ-san ixrek waliyyan ar wa ixrakan fəl ad andu awa ənnan Ǝlkəttaban. ¹³ Ǝmərədda kay a din-əkke, gannaɣ awa harwa əheɣ əddənet fəl ad agin təfalawist təndât ta da əgeɣ. ¹⁴ Ǝmâlaɣ-asan awal-nak təgzar-tan əddənet fəlas wər tan-təla zun d as nak iman-in da wər di-təla. ¹⁵ Wər daɣ-ak əgmaya a tan-təkkəssa daɣ əddənet, mišan əgmâya daɣ-ak a tan-tagəza daɣ Iblis. ¹⁶ Wər tan-təla əddənet, zun d as nak iman-in da wər di-təla. ¹⁷ Zəzdəg iwallan-nasan s awal-nak imosan tidət. ¹⁸ Ǝzəmmizəl wa di-du-təge s əddənet, ənta a tan-sər-əs-əge nak da. ¹⁹ Amaran əkfəq-qay iman-in fəl əddəlil-nasan fəl ad akfin win-nasan əntanay da əs tidət. ²⁰ Wərgeɣ inəttulab-in ɣas as kay-tansaya, kalar tansayaq-qay y aytedan win sər-i z'əzzəgzənnen s əssəbab n as əslan y awal-nasan. ²¹ Ǝgmâya daɣ-ak a tan-igan ketnasan arat iyyanda s əmmək was dər-ək t-əmosa; nəqqəl-tu dər-san nakkanay da fəl ad təzzəgzən əddənet as kay a di-d-izammazalan. ²² Ǝkfêq-qan tanaya ta di-təkfe, fəl ad əqqəlan arat iyyanda s əmmək was tu-nəmos nak dər-ək. ²³ Nak ərtâya dər-sa, kay tərtâya dər-i Ǝqqəlanet arat iyyanda es təməwit təndât fəl ad təssən əddənet as kay a di-d-izammazalan təgeɣ-asan deɣ tara ta di-təge. ²⁴ Abba, areɣ as win di-təkfe ad əggəzan əntanay da edag wa ahe fəl ad əhannayan tanaya ta di-təkfe fəlas di-tare harwa dat əxluk n əddənet. ²⁵ Abba, kay a oɣadan, əddənet wər kay-təssen eges nak əššânaq-qay amaran inəttulab-in, əssânan as kay a di-d-izammazalan. ²⁶ Ǝssôsanaq-qan awa təmosa amaran wər z'ammazzaya d igi n adi, fəl a tan-təggəz tara ta di-təgeɣ, ərtəya dər-san.