¹ Emàlay-awan adi fel a kawan-wer-igmed ezegzan-nawan. ² Ad tetewekkesam day eljemayat en nan n elyibada en kel-Elyehud, fadda ilkàm alwaq day-as wa day-wan ikkasan iman, illa yur-es as tara en Mechina a immozal den. ³ Adi a dawan-z-agin aytedan felas wermad a di-ezdayan wala essànan Abba. ⁴ Emàlay-awan aratan di emeredda, fel a tan-du-taktim as d-ewad alwaq wa day z agin aytedan tara-nasan. Aratan win wer dawan-tan-emela day tizarat n echeyel-in yur-wan, felas alwaq wedi harwa da eddewa der-wan.) ⁵ Emeredda ad eqqela wa di-d-izammazalan, michan wer kawan-iha i di-issistanan ed dad ekke. ⁶ Eges eknàn man-nawan aychud fel as dawan-enney adi. ⁷ Der iga adi da ya, a dawan-emela tidet: of-awan ad agla, felas as wer kawan-du-z-asu Emadhal, as egle amaran a dawan-t-id-assagla. ⁸ As d-osa ad issusen aytedan n eddenet as exràkan day batu n awa imosan echeriya-net. ⁹ Issusen-tan as exràkan day batu n awa imos abakkad felas tugeyt a egan a ser-i ezzegzenan. ¹⁰ Issusen-tan as exràkan day batu n awa imosan taqqat felas tewaylay a egey Abba amaran wer z elesay etewenay. ¹¹ Issusen-tan as exràkan day batu n awa imosan echeriya en Mechina felas emenokal n eddenet, a t-imosan Iblis, ibàz-tu echeriya. ¹² Harwada ele batuten aggotnen as are a dawan-tanat-aga eges wer dasnat-tezmeram emeredda. ¹³ As d osa infas wa zeddigan isinifililan tidet, a kawan-isselkem i tidet kul ta du-tefalat Mechina felas batuten-net wergey enta a du-z-egmednat, awa as z aslu yas a day dawan-z-ichiwel ketnet, imel-awan aratan win d -ezaynen, ¹⁴ isseymer-i felas awa z igrew day awa ele a dawan-z-imel. ¹⁵ Awa ila Abba ketnet i-nin nak da ; adi a fel dawan-enne, awa igraw infas wa zeddigan day awa ele a dawan-z-imel.) ¹⁶ ( A dawan-egmeday anay deffer alwaq wer negget, michan a di-telesam anay day adan wer negget deffer adi. ) ¹⁷ Tezzar namannan wiyyad day nettulab-net: ( Ma imos almayna n awa danay-inna da: A dawan-egmeday anay deffer alwaq wer negget, michan a di-telesam anay day adan wer negget deffer adi ? Ma imos dey almayna n ( Abba a ekke ) ? ¹⁸ Ma imos almayna en day alwaq wer negget wa imal da ? Arat wa day ichewal da wer tu-negra. ) ¹⁹ Issan yaysa as eràn ad t-esestanan. Inn-asan: ( Tetinamasestinam felas enne: ( A dawan-egmeday anay deffer alwaq wer negget, michan a di-telesam anay day adan wer negget detter adi.) ²⁰ Eggeyyey silakanay-awan as ad talim, tesekkelelam michan aytedan n eddenet entanay eddewen. Ad eysedan man-nawan eges aysud di a tu-tezrey tedewit. ²¹ Tantut as tetaggaz amadal, ad eychedan man-net fel aggad wa du-tega alwaq-net ; michan as d-ihu bara-net, ad tammazzay d esemmedren day arkanay wa teway, iseddewat-tat as du-tega awedan day eddenet. ²² Kawanay da zun d adi da, emeredda eychadan man-nawan, michan a kawan-elesay anay, ezel wedi ad tagim tedewit as tu-wer-illa i day-wan tat-z-ikkesan. ²³ Wer di-za-tessestanam d arat waliyyan ezel wedi. Eggeyyey silakanay-awan as, a tegmàyam day Abba s esem-in a dawan-t-agu. ²⁴ Harwada wer t-illa a tegmàyam s esem-in. Egmeyat ad tegrewan fel ad tagim tedewit tekmàlat.) ²⁵ Emàlay-awan adi s elmital, michan ilkàm alwaq day awan-wer-z-elasay emel n arat waliyyan iqqàlan Abba s elmital, kalar a dawan-t-emela s awa imos. ²⁶ Alwaq wedi ad tegmeyam day Abba s esem-in. Wer dawan-enne a dawan-t-anseya, ²⁷ felas Abba iman-net ir-iwan fel as di-teram, tezzigzanam dey as yur-es d-egmàda. ²⁸ Abba a yur d-egmada, ose-du eddenet amaran emeredda a tat-egmeda eqqelaq-qu.) ²⁹ Tezzar ennan-as nettulab-net: ( Eney, emeredda temmalay-anay aratan s awa mosan, werge s elmital. ³⁰ Nessàn as tessàna day arat kul, wer t-illa arat a iqqal a dak-iybaran ; adi da a fel nezzegzan as Abba a yur du-tegmada. ) ³¹ Inn-asan yaysa: ( Adis emeredda tezzegzanam ? ³² Eneyat, alwaq ihoz, fadda iga, wa day za tetewezeweziwizam, akkiyyan ikka ayaywan-net, tayyim-i-d yas-in ; michan ya wer emosa yas-in felas illa yur-i Abba. ³³ Emàlay-awan arat wa fel ad tegrewam alxer day terteyt ta der-i tegam. Ad teneyam arkanay day eddanet, ad wer tiksadam wala, felas eddenet erzéq-qat. )