¹ Inna ɣayas inəttub-net Nak a imosan esab n alɣanab wa olaɣan, Abba-nin imos məššis. ² Alədlid-n kul wa wər nətirəw ad t-ixtəs, wa itarawan ad t-ifnəz fəl ad d-inzər agu ara aggen. ³ zun d adi da, kawanay da eway-du sər-wan awal-in tazdak,. ⁴ agiwat dər-itartəyt šilat ən ta dər-wan əge, azəl wər z'arəw ɣas-net as d-iqqətas daɣ ašək; kawanay da əlmital di da a təham as dər-i wər tərtayam. ⁵ Nak a imosan esab n alɣanab, kawanay i lədlad-net. wa dər-i-igan tartəy ta dər-əs əge, a t-idu-təgməd tenfa tagget fəlas as daɣ-i in-təqqətasam wər təfregam wala. ⁶ Wa dər-i wər nərtay, a din-itəwəgər šilat n ələdlid iqqitasan, aqqar, itəwəkəmməd-du, itəwəgər daɣ təmsay, ibələgləg. ⁷ As dər-i tərtayam, təttafam batuten-in, əgməyat daɣ Məššina di n Abba arat kul wa təram, a tu-təgrawam. ⁸ Ǝnta da awas tətâwanay tanaya n Abba-nin a du-tarəwam tənfa tagget, assaknu adi as təmosam inəttulab-in. ⁹ Tara ta di-iga Abba, ənta a dawan-əge; əttəfat-tat. ¹⁰ As imos as təttâfam alwajiban-in, wədi təhâm tara-ni zund əmmək as nak da əttafa win Abba, əhe tara-net. ¹¹ Ǝnneɣ-awan adi fəl ad tagim təfawist zun ta əgeɣ, tagim deɣ təfalawist təkmâat. ¹² Ǝnta da alwajib wa-in Namariwat s əmmək was kawan-are. ¹³ wər tu-təlla tara togarat ad akfu awedan iman-net fəl midawan-net. ¹⁴ 4 As imos as tətaggim awas kawan-omara, wədi kawanay imidawan-in. ¹⁵ wər dawan-gannaɣ eklan, fəlas akli wər itəssən arat wa itag məššis. kalar a dawan-gannaɣ imidawan-in, fəlas awas əslɣ ɣur Abba-nin kul əssosanaɣ-awan-tu. ¹⁶ Wər di-təsannafranam, kawanay amaran, nak a kawan-isannafranan; əssiwaraq-qawan ad taglim, tammazalam awa təha təha tənfa tagget ɣur Məššina. Tənafa di da ta za tahagit. A təgmayam deɣ daɣ Abba s əsəm-in a dawan-t-agu. ¹⁷ Omâraq-qawan s ad tənəmərim. ¹⁸ kud gezzar a kawan-təga əddənet, əssənat as təgzâr-i dat-wan. ¹⁹ kud kawanay əddənet kawan-təlat, wədi əddənet tərâ wa təla; mišan wər kawan-təla, fəlas nak kawan daɣ-as d-isannafranan, adi a fəl kawan-təgzar. ²⁰ Aktiwat-du awa dawan-ənneɣ, as Akli wər oger məššis kud əsəkni a di-əgan alɣazab, a dawan-t-assaknin kawanay da; kud tərəddawt a əgan s awal-in, wədi kawanay da, ad ardin əs wa-nawan. ²¹ Adi kul, əddəlil-in a fəl dawan-tu-z-agin, fəlas wər əssenan wa di-d-izammazalan. ²² Ǝnnar du-wər-ose, əššewalaɣ-asan, wər z'attarmasan əs bakkadan-nasan, eges əmərədda wər t-illa əsaru waliyyan a dasan-z-igdəlan a sər-san attarmasan. ²³ Wa di-igzaran, igzâr Abba-nin ənta da. ²⁴ Ǝnnar wər əge gar-essan imazalan əs wər t-illa awedan as kala tan-iga, wər z'attarmasan əs bakkadan-nasan. Ǝnayan-tan eges əglan əgzâran-ana nak d Abba-nin. ²⁵ Mišan adi igâ fəl ad tandu batu ta tətawaktabat daɣ Ǝttawret, tənnât Ǝgzaran-i bannan. ²⁶ As d-osa əmadhal wa dawan-du-z-assagla ɣur Abba, imosa Infas wa isinəfililan tidət a sər-wan du-z-igmədan Abba, a fall-i aggayyat. ²⁷ kawanay da, fall-i taggayyem, fəlas təddewan dər-i harwa ɣur tizarat.