¹ Ill-ay aləs irinan igan esəm lazarəs, ihan təɣrəmt ən Betanəy s ənta a daɣ təɣsar Maryama əd Marta əmosnen šmədrayen. ² Maryama ta da a tənɣalat alwardi fəl Ǝməli ɣaysa, təmas idaran-net əs jəkkad-net. Amaran amadray-net lazarəs a irinan den. ³ Ǝssokanat təmədrayen-net ɣaysa əmazal as Ǝməli, əməri-nak irîn. ⁴ As isla ɣaysa i salan win den, inna Təsəlkamt ən təwərna ten, wər za təqqəl təmattant ən lazarəs, arat a təmos a z'assaknin tanaya ən Məššina, isənnəfiləl-du əntada tanaya ta ila Barar ən Məššina. ⁵ ɣaysa ira Marta wəllen, ənta əd təmadrayt-net, əd Lazarəs. ⁶ Isla təwərna-net, mišan iga dəffər awen əššin adan wər igmed edag wa iha. ⁷ Dəffər adi inna i ənəttulab-net Ǝndawat ad nəqqəl Yahudəyya. ⁸ Ǝnna-as nəttulab-net Ǝššex-nana, imuzaran-nana wərge edes-nasan səket dâ da dã gammayan əd tanaɣay-nak, kay amaran tareɣ tewaɣlay n akal wen. ⁹ Inn-asan ɣaysa Ǝzəl wərgeɣ maraw alwaqan d əššin a imos As ijawankat awədan əzal, wər z'inəgərtəttəf, fəlas ihannay dat-əs. ¹⁰ Mišan as ijawankat awedan ehad, ad inəgərtəttəf, fəlas wər t-iha ənnur. ¹¹ As iga batu ta inna tolas Ǝmidi-nana Lazarəs insâ, ad aglaɣ a t-id-əssənkəra. ¹² Ǝnnan-as nəttulab-net Ǝməli, dad zamas insâ, wədi əngəm ad izzəy. ¹³ Ǝnta ɣaysa təmattant ən Lazarəs as dasan- imməgrad den, mišan əntanay aɣilan etəs wa n alɣadat as igannu. ¹⁴ Adi a fəl d-izalalaɣ ɣaysa inn-asan Lazarəs aba-tu. ¹⁵ Amaran isidawat-i as wər əlle den alwaq wədi, fəlas arat wa ənta sər-wan du-z-awəyan a sər-i təzzəgzənam. Ǝmərədda əndawatanaq-qu. ¹⁶ Inkar Tuma was gannin Eknay, inna i nəttulab win hadatnen Ǝndawat nakkanay da a danaɣ-iba nəddew dər-əs. ¹⁷ As din-osa ɣaysa ittəmal-as Lazarəs iga əkkoz adan daɣ əzəkka. ¹⁸ Betanəy təhoz Yerusalam. Edag ən karad kilawatan ɣas a illan gar-essanat. ¹⁹ Osan-in kəl-Ǝlyəhud aggotnen Marta əd Maryama fəl a dasnat-in-šəwəškənan daɣ adag n amadray-nasnat. ²⁰ As təsla Marta as ɣaysa ihoz-du taɣrəmt, təssəlkad-as Maryama ənta təqqim-in daɣ aɣaywan. ²¹ Tənna Marta iɣaysa Ǝməli, ənnar təlle da, wər z'iba amadray-nin. ²² Mišan əmərədda da əssanaɣ as arat kul wa təgmaya daɣ Məššina a dak-k-agu. ²³ Inn-as ɣaysa Amadray-nam a d-inkər daɣ təmattant. ²⁴ Tənn-as Marta Ǝssânaɣ as amadra-nin a d-inkər ɣur tanakar n aytedan əzəl wa ilkaman. ²⁵ Inn-as ɣaysa Nak a imosan wa d-isankaran daɣ təmattant, əmosa təməddurt. Awedan wa sər-i izzəgzanan, wədi kul t-aba da a d-iddər. ²⁶ Amaran awedan kul wa iddaran izzigzan sər-i, wədi wər ikem ad t-aba. Təzzigzanaɣ adi. ²⁷ Tənn-as Awalla, Ǝməli əzzigzanaɣ as kay a imosan Ǝlməsix, təmosa deɣ Barar ən Məššina, as ittimal as a d-asu əddənet. ²⁸ As təga Marta batu ta, təkka təmadrayt-net Maryama, təwat-tat s ahal tənn-as Ǝššex illa-da, isastan dər-əm. ²⁹ As təgraw Maryama isalan win, təggad-du təssəlkad i ɣaysa. ³⁰ As itaggu awen harwa da wər d-iggez taɣrəmt, wər igmed edag wa daq-q in-tosa Marta. ³¹ Ǝllân kəl-Ǝlyəhud ɣur Maryama a das-du-šiwaškannen. As tat-ənayan as du-təggad tarmad təqqab, əlkaman-as əɣilan əzəkka a təkka y a fall-as. ³² As din-tosa Maryama edag wa iha ɣaysa togg-ay ɣas təfataqqat ɣur daran-net, tənn-as Ǝməli, ənnar təlle da, wər z'iba amadray-nin. ³³ As tat-inay ɣaysa təhallu, inay kəl-Ǝlkyəhud win dər-əs d-əddewnen əntanay da əhallin, ikna tərəmmeq, əɣšadan man-net. ³⁴ Inn-asan Məni tu-təgam Ǝnnan-as Ǝməli, ayawa tənəya. ³⁵ Ad ihallu ɣaysa. ³⁶ Ǝnna aytedan Ǝnawat awa dər togda tara ta iga y aləs wa. ³⁷ Təzzar ənnan wiyyad daɣ-san Aləs wa issəswadan əmədderɣəl, wərgeɣ ifrâg a ad igdəl i Lazarəs təmattant ³⁸ Ilas ɣaysa tərəmmeq, təzzar ikka əzəkka imosan akazam, tədbâɣ təhunt zəwwərat. ³⁹ Inna ɣaysa Ǝkkəsat təhunt Tənn-as Marta ta n tamadrayt n aləs wa aba da Ǝməli, aləs di əmərədda ila adu, fəlas əzəl-net wa n əkkoz d anabal awa. ⁴⁰ Inn-as ɣaysa Wərgeɣ ənnəɣ-an as təzzəgzana ad tənəyaɣ tanaya ən Məššina ⁴¹ Tətawakkas-du təhunt. Iswad ɣaysa daɣ jənnawan inna Abba, əggodayaɣ-ak as di-təqbala təwatray-nin. ⁴² Nak iman-in əssânaɣ as faw da təqqabbala šiwatriwen-in Ǝddəlil ən tamattay ta di-təɣalayɣalayat da a fəl dak-əššewala fəl ad təzzəgzən as kay a di-d-izammazalan. ⁴³ As iga təwatray ta, idkal əməsli-net inna Lazarəs, əgməd-du. ⁴⁴ Igmad-du ənəmmettən wa nad, əttâlan fassan-net əd daran-net əs təsəwad, təlsa deɣ təbdoq udəm-net. Inn-asan ɣaysa Ǝkkəsat-as itul tayyin-tu ad ijəwənkət. ⁴⁵ kəl-Ǝlyəhud aggotnen a d-osânen Maryama, ənayan arat wa, əzzəgzanan əs ɣaysa. ⁴⁶ Wiyyad daɣ-san amaran əkkan Farisaytan əmalan-asan awa iga ɣaysa da. ⁴⁷ Təzzar sassagan limaman win zawwarnen, əd Farisaytan əmənəy ən muzaran ənnan Ma za nagu Aləs wa itaggu alɣalamaten aggotnetn. ⁴⁸ As tu-noyya itaggu aratan win, a sər-əs əzzəgzənan aytedan kul, təzzar asin-du sojitan ən kəl-Ǝrrum a dana-sitaɣmarnen, addagdagan Ehan wa Zəwwəran n Ǝlɣibada, əɣrədan deɣ tenaɣay ən tamattay-nana. ⁴⁹ Inkar-du iyyan daɣ-san igân esəm kayif, imosan Ǝlimam wa zəwwəran daɣ awatay wen inn-asan kawanay wər təgrem wala. ⁵⁰ Wər din-təgrem as ofa ad ammat awedan iyyanda daɣ adag ən tamattay n Israyil ketnet. ⁵¹ Batu y/ta iga da wər tat-iga gar-es əd man-net, kalar tišit-net Ǝlimam wa Zəwwəran daɣ awatay wen, a fəl igraw əlwəlayat n as ɣaysa kundaba immut daɣ adag ən tamattay ketnet. ⁵² Amaran wərge tamattay n Israyil ɣas as tu-z-iba daɣ adag-net, kalar bararan ən Məššina kul win wazawaznen gər kallan du-z-iššidəw əqqəlan təɣəssa iyyadda. ⁵³ Ǝzəl wen da daɣ əgan muzaran ən kəl-Ǝlyəhud tanat ta n tanaɣay-net. ⁵⁴ Awen da fəlas ab'as itallam ɣaysa dad ira daɣ kəl-Ǝlyəhud. Igmad akal wen, ikka əɣrəm igân esəm èfrayim inimahazan əd taneray, iqqim daɣ-as ənta əd ənttulab-net. ⁵⁵ Azzaman en amud ən kəl-Ǝlyəhud wa n Akkay ihoz-du. A du-gammadan aytedan idaggan aggotnen takkin-du Yerusalam, fəl ad əzzəzdəgan dat əmud. ⁵⁶ Saggadan i ɣaysa tinəmənnin gar-essan daɣ Ahan wa Zəwwəran n Ǝlɣibad Kawanay ak ma tənnam, tordâm as a d-asu amud a meɣ. ⁵⁷ Ǝnta ilimaman win zawwarnen əd farisaytan omâran aytedan s âs i issanan edag wa iha ɣaysa isaffagget-tu fə ad attarmas.