¹ ( Eggeyyey esilakanay-awan as : Awedan wa wer neggez afarag n ayfed s emi was itawaggaz, itaraggat-t-idu, wedi abaydag a imos n enarkab. ² Amaran wa d-iggazan s emi n afarag,wedi enta a imosan amadan n ayfed. ³ Enaylif n afarag a das-z-aleman imi, aslinat ayfed y emesli-net, ad iyarru chin-net s esmawan-nasnat isardaq-qanat afarag. ⁴ As d-iyrad ikus en chin-net, a dasnat-izar, elkemnat-as, felas ezdàynat emesli-net. ⁵ As iga awen awedan wa dasnat-imosan enaftay, wer das-z-elkemnat, ewef fadda atu-z-aginat felas wer ezdaynat emesli-net.) ⁶ Elmital wa da, a dasan-iga yaysa, michan wer egren almayna n awa day-san immegrad da. ⁷ Ilas yaysa inn-asan :( Eggeyyey esilakanay-awan as nak a imosan imi was raddaynat ayfed. ⁸ Win dat-i d-osanen kul ibaydagan en narkaban a mosan, amaran wer dasan-essesamnat ayfed. ⁹ Nak a imosan imi n afarag. Wa ser-i d-iggazan ad afsu. Ifràg ad itaggaz iradday, igrew entada imensewan-net. ¹⁰ Abaydag wer d-itisu ar fel chikra, d igi en man d ehluk. Nak amaran ose-du fel ad egrewan aytedan temeddurt, egrewan-tat da za es temewit wer nela eddukad. ¹¹ Nak a imosan amadan wa olayan. Amadan wa olayan iman-net a ihakku fel ayfed-net. ¹² Michan awedan wàs ayfed wergey chin-net, eteweyfar yas a itawagga y a tanat-iden, wedi as ogga eridal izay-tanat-du, ad addaggag ayy-enat-in, abez day-asnat eridal awa ira, izewweziwez-tanat. ¹³ Arat wa itagg-ay ales wa felas eteweyfar yas a iga y echeyel wa, wer izlay a eganat ayfed. ¹⁴ Nak a imosan amadan wa olayan. Ezdàyay ayfed-in, ayfed-in dey ezdaynat-i, ¹⁵ es temewit ta day as di-izday abba-nin, nak dey ezdàyaq-qu. Ekfey iman-in fel ayfed-in. ¹⁶ Eley ayfed chiyyad wer neha afarag wa. Entanatay da kundaba azzaray-asnat, aslinat y emesli-nin. Ayfed-in kul ad erteynat eqqelnat esegen iyyanda, ilàn amadan iyyanda. ¹⁷ Abba ir-i felas iman-in a ekfe fel a tan-elesay agaraw. ¹⁸ Wer t-illa i day-i z abezan iman, kalar iman-in a ekfey es teradawt-in. Eley ferregat en tahakkay-nasan, eley da ferregat n esuyel-nasan. Enta da day arat was di-omar Abba-nin s igi-net.) ¹⁹ Elasan kel-Elyehud emezrey day talya n aratan win igannu yaysa da. ²⁰ A day-san aggen gannin: ( Ales wa aggesuf a t-ihan ! Awa emeske ! Mafel tessisamam-as ?) ²¹ Wiyyad gannin: ( Awedan iha aggesuf wer iteggu awal wa. Tordam as ill-ay aggesuf ifràgan eseswed en medderyal ?) ²² Azzamman en tagrest. Ewad-du emud imosan isaktan n etewezezdag wa iga ahan wa zawwaran n Elyibada day yerusalam. ²³ Itijewenkit yaysa day ahan wa zewweran n Elyibada issiwal ed tarrayt tefàlat as itawannu (ta n suliman.) ²⁴ Yilay yalayan-tu kel-Elyehud win ellanen den gannin-as: ( Kay ak har emmay wer dana-tore day ayaf ? Kud kay Elmesix a temosa, tezeluleya-du da da tannay-anaq-qu.) ²⁵ Inn-asan yaysa: ( Emàlay-awan, michen wer di-tezzegzzanam. Imazalan win ege s esem n Abba-nin, eggeyyen-i, ²⁶ michen wer di-tezzegzanam felas wer tetabaqqem day ayfed-in. ²⁷ Ayfed-in esallinat y emesli-nin, ezdàyaq-qanat, amaran elkàmnat-i. ²⁸ Ekfeq-qanat temeddurt ta teylalat, wer day-asnat telkem temattant, amaran wer t-illa i day-i tanat-z-irkeban. ²⁹ Abba-nin a di-tanat-ikfan, wer t-illa i wer oger. Amaran wer t-illa i tanat-z-irkeban day efus-net. ³⁰ Nak d Abba arat iyyanda a nemos.) ³¹ Elasan-du ser-es adakal en tehun y ad t-anyin. ³² Ilas yaysa inn-asan: ( Essiknaq-qawan imazalan aggotnen olaynen a d-efalnen Abba. Meni day-san wa fel taram a di-tanyim ?) ³³ Ennan-as: ( Nakkanay wer nera tenayay-nak fel as tegey emazal olayan, kalar emadraw wa tegey eddi a fel kay-za-nanyu. Kay wer temosay ar aggadem amaran tarey ad tagay iman-nak Mechina.) ³⁴ Inn-asan yaysa: ( Awak wergey iktàb day Ettawret as inna Mechina: ( kawanay temosan imalan) ? ³⁵ Wer nefreg a din-neger arat wa ihan Elkettaban. Esem wa n malan, iyra ser-es Mechina aytedan win ikka awal-net. ³⁶ Nak Mechina a di-isannafranan izammazal-i du s eddenet. Manemmek day adi as za tannim taggay emadraw felas enne: ( Emosa Barar en Mechina) ? ³⁷ As imos as wer teggay imazalan win as di-d-issegla Abba-nin y a tan-aga, a di-wer-tezzegzanam. ³⁸ Michan dad imos as taggaq-qan, wedi kud ser-i wer tezzegzanam da, zegzenat kuddey es mazalan win tagga, fel ad tessenam, tassantim dey day egerri n as Abba irtày der-i, nak dey aertàyad Abba. ) ³⁹ Elasan agamay d abbaz-net, michan igmad-tan. ⁴⁰ Ilas yaysa iki en tegadamayt ta hadat en yordan, day adag wa day issenta yaxya eselmey n aytedan day aman, iqqim den da. ⁴¹ Osan-t-in aytedan aggotnen, gannin: ( yaxya wer iga alyalamat waliyyat, michan aratan kul win danay-inna s ales wa, tidet a mosan.) ⁴² Den day ad ezzegzanan aytedan aggotnen es yaysa.