¹ As itawannu ad nəggəz aɤlal n aman nakku akal n Italəya ,itawagga Buləs ənta əd wiyyad iməskəsa daɤ ən kabtan iyyan igân esəm Yuləyus ihân egan ən sojitan as itawannu «wa n Qaysara». ² Təzzar nəggaz aɤlal n aman n əɤrəm n Adramutenəs ikkân ikallan n Asəya win əwarnen efay n agaraw , Ih-âna Aristarxus imosan awedan n əɤrəm ən Tesalonik n akal wa n Masedonəya. ³ As əzəl wa dəffər wen ,nəzzəbbat daɤ əɤrəm ən sojitan ,Yuləyus imosan awedan išaknin a Buləs əlluɤ ,ikf-ay turagat n ad akku imidawan-net win əhanen aɤrəm wen fəl a daɤ -as əssənan . ⁴ As dər-naɤ igmad əɤlal n aman sidon ,nəllil əsəlim n agaraw daɤ nəha ifin n akal imosan gərwətlan as itawannu Qibrus fəlas adu dər nəmməqqas. ⁵ Dəffər awen ,nəššokal fəl agaraw was iwar akal wa n Lukəya , nəzzəbbat daɤ-as . ⁶ Igraw daɤ-as kabtan wa dər nəddew iyyan aɤlal n əɤrəm n Alaskandrəya ,itakkin akal n Italəya ,ig-ana daɤ-as . ⁷ Nəga adan aggotnen nəsilalam fəl aman sollan ,gərrid as din-nəhoz aɤrəm ən kənidos .Təgdal-ana assahat n adu ad naglu daɤ anamod wen ,təzzar nənnamad akal imosan gerwətlan as itawannu karet .As nokay fəl Salmone ,nəmmodaɤ i kəret ,nəggaz ifi-net . ⁸ Gərrid as nəllil əsəlim n agaraw har newad edag igân esəm «Izəzzəbba win Hossaynen əɤlalan» inimahazan d əɤrəm ən Lasaya. ⁹ Isilalat-ana əšikəl wen wəllen ,əšikel daɤ əɤlal n aman deɤ əmərəda iggaz-tu alɤarar ,fəlas wala əzum ən kəl-Ǝlyəhud wa n ɣarat okay .Adi a fəl iga Buləs y aytedan win ənnodanen daɤ əɤlal n aman ənnəsixa ,inn-asan : ¹⁰ «Meddan ,hannayaɤ as əšikəln-nana ad t-iggəz iba ən taɤra d əɤšud zəwwəran .Wərgeɤ aɤlal n aman ɤas əd lalan-net a z'əhləknen ,kalar nakkanay da , ad nəggəz tazak ten.» ¹¹ Mišan issof kabtan, iduf ən batu ta dasan-iga aləs wa ewayan aɤlal n aman əd wa t-ilan,iduf ən batu ta dasan-iga aləs wa ewayan aɤlal n aman əd wa t-ilan ,iduf n ənnəsixa wa dasan-iga Buləs . ¹² Dad imos as azazzabbaw n əɤlalan n aman wen wər daɤ-as oleɤ ikus ən təgrəst , tənkar taššam n aytedan win maššaɤalan n əɤlal əgan tanat ad aglim , əgməyan d aggad n iyyan aɤrəm imosan azazzabbaw n əɤlalan n aman igân esəm Fenikəs ihân akal imosan gərwətlan as itawnnu kəret , əkkəsan tagrəst daɤ ɤayanɤayan-net s iyyan iswâd sa sər agala daɤ ataram ,wa hadan sa sər tamasna daɤ ataram . ¹³ Ǝllan den da as d-igar arat n adu wa n agala , təzzar əkkasan y əɣlal anaday,əglan ,sammadaɤan y akal imosan gərwətlan ən kəret daɤ əhozan təšəšwit-net ,əɤilan ad əfrəgan əmərədda igi n awa əran . ¹⁴ Mišan wər əhogan əd teklay as fall-asan du-təgar tazafa təssohet as itawannu ta n tasmasna daɤ dənnəg ,təgât esəm Yurakilon ,a dasan-du-təgât iguz wa n akal ən kəret . ¹⁵ təzzar ibat adu aɤlal n aman , indar-ana iduf-net ,igla dər-naɤ ibât-tu adu. ¹⁶ As nəggaz ifi n arat imosan gəewərlan ,igân esəm kawda , nəga y arat ən təɤlalt n aman ilwây əɤlal wa nəha ,təməwit ta nəra gərrid . ¹⁷ Ǝdkalan-tat-du maššaɤalan n əɤlal ,əgan-tat daɤ ammas n əɤlal ,təzzar əssəɤlayan-du aɤlal n aman ketnet iɤunan zawwarnen otaban-as sər-san fəl a tu-wər-zəmməzzəyan aman. Ǝssərasan afər wa isakaf adu isəluləm fəl ad agu sollan ,fəlas əksudan ad istəb əɤlal y amadal daɤ adag igân esəm surtis a daɤ gəzzul agaraw ,igla əɤlal ibât-tu dər-naɤ adu . ¹⁸ Awa təga tazafa en daɤ assahat ,as əzəl wa hadan a din-əggaran maššaɤalan n əɤlal ilalan daɤ agaraw fəl ad ifsas əɤlal. ¹⁹ As əzəl wa n karad ,əgaran-in daɤ aman əs fassan win-da-nasan isəssəskna n əɤlal . ²⁰ Təfuk wala etran nəgâ adan aggotnen wər tan-nənay.Awa təga tazafa en daɤ assahat ,nəkkas fadda attama ən man-nana. ²¹ Adan en nəg-en wər t-illa i itšan arat ,təzzar ibdad Buləs daɤ ammas n aytedan ,inna : «Meddan ,ənnar təttâfam ənnəsixa wa dawan-əgeɤ ,taqqmim da wər du-təgmedam akal wa n kəret ; əddin wər kawan-z-igrəw iba n taɤara wa d əhluk wa . ²² Amaran əmərədda əgmâya daɤ -wan ad wər təkkesan attama ,fəlas wər kawan-iha i z'əgmədan man-net ,mišan ya aɤlal n aman ənta a danaɤ-igməd . ²³ Ǝndod a di-inafalal angalos ən Məššina wa di-ilan ,əheɤ əššəɤəl-net , ²⁴ inn-i :''Buləs ,a kay-wər-təggəz tasa, Qaysara wa n əmənokal wa zəwwəran , kundaba təbdəba dat-əs išrəɤ -ak . Amaran ənəy ,Məššina ig-ak arraxmat təmosat aggaz n aytedan kul win dər tənamaha aɤlal n aman da '' ²⁵ Daɤ adi meddan ad wər təkkəsam attama ,fəlas əzzigzanaɤ əs Məššina .Awa di-inna den ,ad agu s əmmək en da. ²⁶ Amaran kundaba istab dər-naɤ əɤlal n aman i təšəšwit n akal iyyan imosan gərwətlan.» ²⁷ As iga adawannay n ahad n əzəl-nana wa n maraw d əkkoz təgâr fall-ana tazafa ,ibât dər-naɤ adu aɤlal fəl agaraw igân esəm Adrəyatik ,ənnəfrayan maššaɤalan n əɤlal n aman d as amadal wər iggug . ²⁸ Təzzar əgaran daɤ aman aɤan y sər-əs əkətan təzzəgrət n agaraw .Təqqal təzzəgrə n aman daɤ adag wen əssayat təmərwen n əɤil d əkkoz.As əgan amazay ,əlasan takkot ,osan-in edag wen təmos təzzəgrət-net səmmosat təmərwen n əɤil əd sədis . ²⁹ .Təggaz-tan tasa n ad inf`l əɤlal n aman i təhun,təzzar əgaran daɤ aman daɤ ələqqam n əɤlal əkkozat təzoliyawen šin as tu-naddayan ,amaran ad tattaran a tan-issəknan ezal. ³⁰ Ad gammayan maššaɤalan n əɤlal n aman ad addaggagan .təzzar əssərasan taɤlalt n aman ta ənderrat daɤ agaraw ,əgan əsaru âs a əran ad əndəyan eɤaf n əɤlal əs šiyyad šizoliyawen . ³¹ Mišan inna Buləs i kabtan əd sojitan : «Meddan en , as əgmadan aɤlal wa,wədi wər dawan-t-illa agamad əd man-nawa» ³² Təzzar olayan sojitan iɤunan win əqqannen taɤlalt ,əglan dər-əs aman. ³³ As ibuk azal y igi,igmay Buləs daɤ awedan kul ad atšu ,inn-asan : «Azalada ,əzəl-nawan wa n maraw d əkkoz d aššawaša labasan ,wər t-illa arat as tərâm tettay-net ,wala iyyan iggâzan imawan-nawan ³⁴ Daɤ adi əgmâya daɤ-wan ad tatšim fəl ad tərəgam ,fəlas wər kawan -iha i daɤ in-z-iba wala anzad iyyanda n aɤaf-net.» ³⁵ As inna Buləs awen ,idkal-du tagəlla iga igodan i Məššina dat-san ketnasan ,amaran ikarammat daɤ-as ,ad itattu . ³⁶ Təgmad-tan tasa ketnasan, ətšan əntanay da . ³⁷ Awa nəmos daɤ əɤlal en ketnana ,sanatat təmad n awedan d əssayat təmərwen əd sədis . ³⁸ As əyyəwanan a din-naqqalan alkama daɤ agaraw fəl ad əssəfsəsan aɤlal n aman. ³⁹ As iga azal,ənayan maššaɤalan n əɤlal as akal wa din-əhozan den wər t-əzdayan.Oggan əzazəl daɤ təšəšwit ,ənnan ad əgməyan d a sər-əs awəyan aɤlal har das-t-əssəstəban kud ad əfrəgan awen . ⁴⁰ Ǝkkasan šizoliyawen šin əndaynen aɤlal ,oyyan-tanat-in s aman , oran deɤ iɤunan ən katakawtan win sanamadnen aɤlal .Dəffər adi əkkasan adda y əfər wa ihan dat əɤlal fəl ad t-issəkəf adu ,amaran sannamawalan-tu əd təgadamayt iha əzazəl . ⁴¹ Mišan ənfalan i tageft n əzaz təhât agaraw ,ittitay daɤ-as aɤaf n əɤlal ,iməzzay d əmətəkwəy ; təzzar ad tərazzu assahat (n tənazzamaren ) ələqqam-net ⁴² Ǝnayan sojitan awen ɤas ,namannakan fəl ad əkkəsan iman daɤ məskəsa fəl ad wər iššəf waliyyan daɤ-san ,addaggag . ⁴³ Mišan igdal-asan kabtan -nasan igi n awen ,fəlas a ira ad agəz Buləs .Təzzar omar kabtan aytedan win əsannen ewet n aman ,ad tərəggen daɤ agaraw izaran-in əs təgadamayt. ⁴⁴ Amaran aytedan win hadatnen ,əntanay omar-tan s ad əwəran katakawtan əd gannatan n əɤlal win du-nassarnen .Ǝmmək en da as ewadan ketnasan tagadamayt n agaraw əragan-du.