¹ Idag Buləs Asaggawar s asawad-net ,inna :«Imədrayan-in ,wər di-təha tərək waliyyat n as ill-ay arat wər ira Məššina as kala ad t-əmmozala har awas əbdada da .» ² Mišan omar Ananəyâs wa n Ǝliman wa zəwwəran iyyan daɤ aytedan win əllanen dəgma ən Buləs s a das-infəz . ³ Təzzar inn-as Buləs : «Məššina a dak-z-infəzan ,əlmunafiq! wər təqqimaɤ əddi ar y a di-təšərɤa kay təmməzrayaq-qu ad tesawataɤ imi-nin .» ⁴ Ǝnnan-as aytedan win əllanen dəgma-net : «kay ,Ǝliman wa zəwwəran ən Məššina a tərabbada?» ⁵ Inn-asan Buləs : «wər əssenaɤ imədrayan-in as ənta a imosan Ǝliman wa zəwwəran ; tidət daɤ as iktâb as :'' Ad wər tannaɤa labasan s əmənokal ən tamattay-nak ''» ⁶ Issân Buləs as təzunt n Asaggawar en iyyat sadusaytan a daɤ təga ,ta hadat Farisaytan ;adi a fəl idkal əməsli-net wəllen dat Asaggawar, inna : «Imədrayan-in ,nak Farisay a əmosa ,erâwan wiyyad Farisaytan ,wər d-əmmewaya s adag n əššəriɤa wa, ar fəlas əgəɤ attama daɤ as inəməttan ilkâm a d-ənkəran daɤ tamattant.» ⁷ Inna awen ɤas tənkar tamazaq gər Farisaytan əd Sadusaytan ,təzun tiddawt, ⁸ fəlas Sadusaytan əttâfan as wər tu-əlla tanakra daɤ tamattant ,wala əllâ-tu əngalosan ,wala kələsuf .Farsaytan amaran əntanay əzzigzanan as awen kul ill-ay . ⁹ Təkkus tamazaq wəllen .Inkar arat daɤ musanan win Farisaytan əbbəllananfəl awen, əwaran aganna ən Buləs ,ad gannin : «Aləs wa, wər fall-as nəhənnəy lahan walliyyan! Mijas tidət daɤ as iššêwal-as aggəsuf madeɤ angalos.» ¹⁰ Awa təgə tamazaq-nasan daɤ tuksay, təggaz tasa kumanda n ad agin a Buləs tankət-tankət. Adi a fəl omar sojitan s ad azzabben fəl a daɤ-san d-əxtəsan Buləs, awəyan-tu əs barəki-nasan. ¹¹ As iga ahad inafalal Ǝməli i Buləs ,inn-as: « Buləs, a kay-wər-təggəz tasa ! Ǝmmək wa daɤ as fall-i təggəyyəɤ daɤ əɤrəm ən Yərusalam ,əmmək di da as kay-iwar a fall-i təggəyyəɤ daɤ əɤrəm ən Yərusalam ,əmmək di da as kay-iwar a fall-i taggayyeɤ daɤ wa n Ǝrrum ənta da.» ¹² As affaw ,namaggan kəl-Ǝlyəhud eɤaf ,əhadan as wər z'atšin ,wala ašwin iket wər əgen iman ən Buləs ¹³ Aytedan win əhadnen den, ogaran əkkozat təmərwen. ¹⁴ Ǝkkan imuzaran ən limaman d əmɤaran ən tamattay ,ənnan-asan : «Nəhâd as, wər z'iggəz arat imawan -nana iket wər nəga iman ən Buləs ¹⁵ Daɤ adi əmərədda kawanay d Asaggawar wa zəwwəran əgməyat daɤ kumanda a dat-wan issəbdəd Buləs ,tassaknin as ,a təram ad taššaggaram taɤara-net s əlluɤ.Amaran nakkanay ,nasimatag y igi ən man-net harwa du-wər -ewed da.» ¹⁶ Mišan isla tagazay ən Buləs i taffaw ten ,ikka barəki ən sojitan ,iggaz-tu imal i Buləs. ¹⁷ Təzzar iɤra-du Buləs iyyan daɤ kabtanatan, inn-as: «Ǝlwəy abi di əs kumanda ,ila isalan a das-z-agu» ¹⁸ Iddew dər-əs kabtan ,eway-tu əs kumanda ,inn-as : «Amaskasaw wa igan Buləs a di-d-iɤran ,igmay daɤ-i a sər-ək d-əlwəya abi a ,ilân isalan a dak-z-iməl.» ¹⁹ Ibaz kumanda əfus n əbi ,igmad dər-əs aytedan ,issəstan-tu ,inn-as : «Mas tareɤ a di-tu-təməla ?» ²⁰ Inn-as əbi : «kəl -Ǝlyəhud əgân eɤaf fəl a daɤ-ak əgməyan tufat ad təssəbdəda Buləs dat Asaggawar -nasan wa zəwwəran ,almat ərân ad aššaggaran taɤara-net s əlluɤ. ²¹ A dasan-wər-tarda fəlas wiyyad daɤ-san ogarnen əkkozat təmərwen n aləs a das -za-bəkəmmətnen y ad agin iman-net , Ǝhâdan as wər z'atšin za wər z'ašwin iket wər əgen adi .Simatagan əmərədda ,wər əqqelan ar y at-id-tayya sər-san.» ²² Irɤam kumanda y əbiwen fəl amel y awedan waliyyan isalan win das-iga den ,amaran issəgl-ay x ²³ Dəffər awen iɤra-du kumanda əššin kabtanatan ,inn-asan : «səmmutəgat sanatat təmad ən soji daɤ win əggəsan əd sanatat təmad daɤ win əttafnen allaɤan ;y ad akkin Qaysarəya dəffər təsudəsen ²⁴ Təsəmmutəgam deɤ šisənay šin z'iwən Buləs ,təšəššiwədam-t-in Felikəs wa n ənaxkim daɤ alxer.» ²⁵ Amaran iktab-as-in kumanda širawt inn-as-in : ²⁶ «Awa nak klawdəyus Lusəyas din-ihulan ənaxkim Felikəs əknêɤ saɤmar . ²⁷ Aləs di ,a əbazan kəl-Ǝlyəhud ,as zama əgân iman-net as tan -in -oseɤ əddewaɤ sojitan .As di-əggazan salan n as awedan n Ǝrrum a imos ,əgeq-qu daɤ adag a daq-q-in wər ikka arat . ²⁸ Dəffər awen ewayaq-qu s Asaggawar -nasan wa zəwwəran fəl ad əssənaɤ lahan wa t-əssəwaran ²⁹ Ǝnayaɤ as , arat iqqâlan əššəriɤa wa-nasan ɤas a fəl tu-ɤattasan ,wərgəɤ arat a t-issiwaran tamattant wala iguz ən kasaw. ³⁰ Mišan as əsleɤ as əsleɤ as əgân kəl-Ǝlyəhud eɤaf fəl ad agin iman-net, əssokaɤ-ak-in əddi da, əntanay amaran ənneɤ-asan a sər-ək in-awəyan kay šiɤəttas šin t-əgan. ³¹ Ǝgan sojitan awas tawamaran .Ǝglan ahad wen da ,əddewan əd Buləs har osan aɤrəm n Antifatris . ³² As əzəl wa dəffər wen əqqalan-du sojitan win jawankatnen barəki-nasan ,əglan win əwannen əggəsan əs Buləs. ³³ As din-osan aɤrəm ən Qaysarəya ,əgan širawt tanad daɤ əfus n ənaxkim,əssəbdadan dat-əs deɤ Buləs. ³⁴ Iɤr-et ,amaran issəstan Buləs d akal wa t-ilan .As issan as akal ən kilikəya a t-ilan , ³⁵ inn-as : «As d-osan aytedan win kay -əɤtasnen ,a kay -du -sassaɤra.» Təzzar omar s ad itəwəttəf Buləs daɤ ahan ən təmənukəla was kala t-issəkras əmənokal Herod .