¹ As dər-san nəmməzzay gərrid,nəggaz aɤlal n aman ,izzal dər-na s akal imosan gərwətlan as itawannu kos.As əzəl wa dəffər wen ,nəgmad-tu s akal imosan gərwətlan as itawannu Rodəs .Nəgmad Rodəs nəkka aɤrəm ən Fatara ² Nogaz-in daɤ-as aɤlal n aman itakkin akal wa n Fenisəya ,təzzar nəggaz-tu ,nəgla. ³ As nogga akal imosan gərwətlan as itawannu Qibrus.nəɤlay-tu fəl aganna wa n agala ,nədag sa sər akal wa n surəya har nəzzəbbat daɤ əɤrəm ən Tir s ənta a daɤ za təwəzəzəbben lalan win eway əɤlal ⁴ Nəgmay inalkiman ən ɣaysa har tan-nəgraw , nəzzəbbat ɤur-san har nəga əssa adan .Nəlla ɤur-san as tan -issosan Infas wa zəddigan daɤ ad annin i Buləs ,ad wər akku Yerusalam . ⁵ Dər iga awen da ya ,as əndan adan win den ,nəmatakway nəgla .Ǝntagan-ana ketnasan, harkid tədoden-nasan əd bararan-nasan har nəgmad aɤrəm ,amaran nəgaraffat daɤ tama n agaraw ,nəttar ⁶ As dər-san nənamagga siwatriwen ,nəggaz aɤlal n aman ; əntanay əqqalan iɤawnatan-nasan ⁷ Nəgla daɤəssikəl-nana, nəgmad Tir nəkka Bətolemayəs .As daɤ-as nəzzəbbat ,nəkka imədrayan-nana win t-əhanen y a tan-nəssəsləm,nəga ɤur-san əzəl. ⁸ As əzəl wa dəffər wen nəkka aɤrəm ən Qaysarəya .As t-in-nosa nəzzəbbat daɤ ahan ən Filibus wa n əməggi ən salan n Ǝlinjil imosan iyyan daɤ meddan win əssa ,win as kala tawasanafranan fəl ad tilalan y Ǝlkənisat ta n Yerusalam ⁹ Ila əkkozat təbararen wər nəzday meddan.Sibararen sin əmosnat tənnəbiten. ¹⁰ As nəga adan aggotnen den ,osa-du ənnəbi iyyan igân esəm Agabus, a d-ifalan akal ən Yahudəyya ¹¹ Os-ana-du ,idkal əsatəb ən Buləs,ikrad sər-əs idaran win-net iman-net əd fassan-net, amaran inna : «Ǝnta da awa inna Infas wa Zəddigan :'' Aləs wa ilan əsatəb wa , əmmək wa da as tu-z-əkrədan kəl-Ǝlyəhud daɤ Yerusalm , agin-tu daɤ fassan n aytedan wər nəmos kəl-Ǝlyəhud''» ¹² As nəsla y awen ,ad nətansay Buləs ,nakkanay əd nalkiman ən ɣaysa win əɤrəm en fəl ad wər aggazzay akku Yerusalam ¹³ Misan inn-ana Buləs : «Ma fel təhallim, təsimələssem əwəl-in ? Nak, wərgeɤ kerrad ghas as sammataga ,kalar tamattant da simatagaɤ-as daɤ əɤrəm ən Yerusalam fəl əddəlil n esəm n Ǝməli ɣaysa.» ¹⁴ As nənay as wər t-idu-za-nəssughəl daɤ awas ira igi-net ,noyy-ay ,nənna: «Aget Ǝməli tara-net !» ¹⁵ Dəffər adan win den ad nasammatag i teklay ,nəgla nəggəzzay əs Yerusalam. ¹⁶ Ǝddewan dər-na arat daɤ nalkiman ən ɣaysa win əɤrəm ən Qaysarəya. Ǝwayan-ana s ahan n aləs igân esəm Mənason n akal imosan gərwətlan as itawannu Qibrus ,irəwan imos analkimanən ɣaysa, nəzzəbbat ɤur-as. ¹⁷ As din-nəggaz Yerusalm ,əgan-ana mədrayan-nana daɤ əzəgzan win əllanen den marxaba,əddəwen. ¹⁸ As affaw iddew dər-na Buləs s ahan ən Yaqub ɤur əddêwan əmɤaran n Ǝlkənisat ketnasan . ¹⁹ Issəslam-tan Buləs ,təzzar iɤrad-asan əsuɤəl n aratan kul win iga Məššina əs tarrayt n əssəɤəl wa itaggu Buləs daɤ aytedan win wər nəmos kəl-Ǝlyəhud . ²⁰ As əslan y aratan win inna ,ad əmmâlan Məššina. Dər iga awen da ya ənnan i Buləs : «Amadray-nana ,ənəy igiman əs giman n aytedan win əzzəgzannen əs ɣaysa daɤ kəl-Ǝlyəhud ketnasan zizawen wəllen daɤ iduf n əssəriɤa wa n Ǝttəwret ²¹ Ǝwâdan-tan-du za salan wizawaznen daɤ batu-nak ,əmosnen as :əsəssəɤri wa tətagga, itaway-du əs kəl-Ǝlyəhud əməzzəy d əssəriɤa wa n Ǝttəwret, təgannaɤ-asan ad ammazzayan d əsəmmənkəd ən bararan -nasan əd ləkkum y alɤadaten ən kəl-Ǝyəhud ²² Daɤ adi ma za nagu? Fəlas igmâd assak as ad aslin as tosêɤ-du ²³ Ǝddəlil wədi a fəl za taga a wa dak-za-nannu da :Ehân-anaɤ əkkoz meddan ədkâlnen addawal ²⁴ Idaw dər-san s adag wa daɤ zazdagan aytedan ,təzzəzdəga iman-nak kay dər-san, tərzəmaɤ fall-asan arat wa tan-ihan, fəl a dasan-təwəlzin ɤafawan-nasan. Ǝddi ad z'əssənana aytedan kul as, awa sər-ək itawannin wər t-iha a igân,kalar kay da təlkâmaɤ y əssəriɤa wa n Ǝttəwret. ²⁵ Amaran aytedan win wər nəmos kəl-Ǝlyəhud win əlkamnen i ɣaysa , nəktâb-asan sirawt əhânat tənaden sin nəga əmosnen as , ad wər atsin isan əmosnen takutay y əssənam , wala aswin azni,wala atsin isan n Ǝmudar yənɤa tarzam, wala agin əzzəna ²⁶ Təzzar iddew Buləs əd meddan win əkkoz en. As əzəl wa dəffər wen izzezdag iman-net ənta dər-san, amaran iggaz Ǝhan wa zəwwəran n Ǝlɤibada, imal i limaman əzəl wa daɤ za tandu tazdak-nasan, əzəl wa daɤ za tətəwəkfu təkutay fəl akk iyyan daɤ-san. ²⁷ As zama daɤ-san əkmâlan əssa adan. tandu, tazdak-nasan ,ənayan kəl-Ǝlyəhud wiyyad n akal n Asəya Buləs daɤ Ahan wa zəwwəran n əlɤibada; təzzar jannajarwayan tamattay ,əgan daɤ-as arak man əs Buləs ,əbazan-tu . ²⁸ Gannin s afalla : «Ya kəl-Israyil,agəzat ! Ǝnta da aləs wa itaggin daɤ təlxutbaten sin itaggu y aytedan kul daɤ adag kul ark awalan fəl tamattay-nana , d əssəriɤa wa n Ǝttəwrət d Ahan wa zəwwəran n Ǝlɤibada wa .Iga har as,iga-du krl-Ǝlyunan daɤ Ahan wa zəwwəran n Ǝlɤibada ,isammadas edag zəddigan wa.» ²⁹ Gannin awen fəlas dat awen ənâyan trofiməs wa n Ǝfez daɤ əɤrəm iddew əd buləs ; təzzar ordan as izzogaz-tu Buləs Ǝhan wa zəwwəran n Ǝlɤibada ³⁰ Inajarway əɤrəm ketnet ,ozalan-du aytedan daɤ təsədag kul . Ǝbazan Buləs ,əlwayan-tu əgmadan dər-əs Ǝhan wa zəwwəran n Ǝlɤibada,təzzar tawaharan mawan-net dəffər-san tamazayt ten da . ³¹ Gammayan ad agin iman ən Buləs as din-ewadan salan kumanda ən sojitan n Ǝrrum n as ,aɤrəm ən Yerusalam ketnet inijarway . ³² Iɤra-du sojitan əd kabtanatan -nasan daɤ tamazayt ten da ,ozalan sər-san .As togga tamattay kumanda əd sojitan ,təraz daɤ təwit ən Buləs . ³³ Təzzar ikka-du kumanda Buləs ,ibaz-tu ,omar s ad itəwəkrəd s əššin sassaran ,amaran issəstan d awa imos , d awa iɤšad ³⁴ Təsaɤarat tamattay ketnet , gannin aratan əmmizraynen.Indar i kumanda ad issən awa imosan tidət daɤ takat ten ,təzzar omar s ad ammaway Buləs əs barəki wa n sojitan . ³⁵ As ewad Buləs šisəffəttan n ahan wa n barəki, awa sər-əs təga tamattay daɤ əwəjjen ,kundaba as t-ədkalan sojitan s afalla . ³⁶ Təlkâm-as tamattay ketnet ,təsiɤarat təgannu : «Ammatet, ammatet!» ³⁷ As zama dər-əs əggâzan sojitan barəki ,inna Buləs i kumanda : «Awak əleɤ tarrayt n adak-anmaɤ arat ?» Inn-as kumanda : «ko! kay təssana təlyunant? ³⁸ Daɤ adi wər təmodaɤ aw Masar was kala isaffallag aytedan ,təzzar iggaz teneray ənta d əkkoz gim n awedan ən maggan ən man ?» ³⁹ Inn-as Buləs : «Nak ,Ag-Ǝlyəhud a əmosaɤ , ihəwan daɤ əɤrəm ən Tarsa daɤ akal ən kilikəya imosan aɤrəm fəl təga masnat .Onsayaq-qay a di-takfa turagat n ad əššiwəla i tamattay ta» ⁴⁰ Ikf-as tat kumanda ,ibdad Buləs fəl təsəfftan ,isaddagan s əfus-net i tamattay ad təssəsəm .Təffəsta tamattay ketnet , təzzar iššewal-asan Buləs daɤ təlɤibrit ,awal wa -da -nasan ,inn-asan: