¹ Azzaman win daɤ iha Abbolos korent,ad irgaz Buləs akal n ədɤaɤan har iras fəl aɤrəm n Efez .Inay daɤ-as inalkiman ən ɣaysa wiyyad, ² inn-asan : "Awak kawanay ,as təzzəgzanam təgrâwam Infas wa zəddigan?" Ǝnnan-as: "wər nəsla fadda as t-illa Infas wa zəddigan." ³ Inn-asan Buləs : "Daɤ adi ma imos əzzənəf n əsəlməɤ wa tətawaggam daɤ aman?" Ǝnnan-as: "Ǝsəlməɤ wa ɣaysa" ⁴ Amaran inn-asan Buləs: "Yaxya , aytedan win ətubnen daɤ bakkadan a isalmaɤ daɤ aman,assaknu adi tətubit-nasan ,immâl-asan ad əzzəgzənan əs wa du-z-asin dəffər-əs ,almaghna ɣaysa" ⁵ As əslan y awen,tawasalmaɤan daɤ aman daɤ esəm n Ǝməli ɣaysa. ⁶ Təzzar issəwar Buləs akk iyyan daɤ-san ifassan-net,əgrawan deɤ Infas wa zəddigan ,əššewalan daɤ awalan wər nətawazday ,əgrawan emel ən salan a d-izizabbat Məššina. ⁷ Meddan en, marawessan d əššin ⁸ Amaran ad itakku Buləs ehan wa n əlɤibada ən kəl-Ǝlyəhud ,itaggu daɤ-as təlxutbat wər t-illa is tu-təha tasa-net har iga karadat təlil.Igammay d ad isəttəddu i kəl-Ǝlyəhud isalan win itaggu daɤ batu ən taɤmar tan Məššina ⁹ Mišan saggarmaman wiyyad iwallan-nasan ,ugayan s ad əzzəgzənan s awa igannu,fadda ad gannin dat tiddawat aratan wər noleɤ əs tarrayt ta n Ǝməli. Imməzzay dər-san Buləs ,iddew əd nalkiman ən ɣaysa; a tan-isasaɤru akk əzəl daɤ ahan ən taɤaray n aləs iyyan igâ esəm turanus, ¹⁰ har iga əšsin elan ; har as aytedan win akal n Asəya ,gər za win kəl-Ǝlyəhud wala win kəl-Ǝlyunan,ketnasan əslan y awal n Ǝməli. ¹¹ Isisugu Məššina Buləs təlməɤjujaten wər nətawazday, ¹² har as, tamawayan əlkəšifatan əd təsəwad ən təbdoq ədasnen Buləs fəl asər-san təwədəsan miranan .Tazzayan aytedan ən daɤ təwərnawen-nasan;win daɤ-san əhan kələsuf deɤ gammadan-tan. ¹³ Ǝnkaran kəl-Ǝlyəhud wiyyad əllâmnen gər kallan ,takkasan kələsuf daɤ aytedan ,ad gammayan əntanay da d-ikus ən kələsuf daɤ aytedan s esəm ən ɣaysa ,gannin daɤ təməgraw-nasan: "Ǝhâdaɤ-awan əs ɣaysa ,was itaggu Buləs isalan-net ar, ad təgmədam awedan a!" ¹⁴ Essa meddan ən mədrayan əmosnen maddanəs n əmuzar iyyan n əlimam igân esəm Sewa a tagginen awen. ¹⁵ As ənnan awen y aggəsuf , a dasan-annu : "Ǝzdâyaɤ ɣaysa ,Buləs deɤ əššânaɤ awa imos ,kawanay amaran ,ma təmosam? ¹⁶ Təzzar ifətəqqət daɤ-san awedan wa əhan kələsuf da ,əggəznat-tu təɤurad a tu-sisarnanen meddan en ketnasan,iɤləb-tan əs təwit ,har as ,as gammadan ehan wen ,ozâlan,əzzâfan,əbbôsan ¹⁷ Ǝslan aytedan n Efez kul awen ,gər za win kəl-Ǝlyəhud wala win kəl-Ǝlyunan .Təggaz-tan tasa ketnasan,təzzar əzzəzwaran wəllen esəm n Ǝməli ɣaysa. ¹⁸ A du-tasin aytedan aggotnen əzzigzannen əs Məššina ,suɤulan ark mazalan win as kala tan-taggin ¹⁹ Ewayan-du massaxaran aggotnen əlkəttaban-nasan, əsəqqadan-tan dat awedan kul.Itawaxsab awa d-ənzan , iqqal səmmosat təmərwen n əgim ən tamma n əzrəf ²⁰ Ǝmmək en da as təzawwazawaz tarna n Ǝməli awal ən Məššina , təssəkna assahat ta təhat awal ən Məššina. ²¹ Dəffər awen,isammarkas Buləs daɤ man-net iki ən Yerusalam , immər akal wa n Masedonəya əd wa n Akayya.Igannu daɤ man-net:" Dəffər as oseɤ Yerusalam,kundaba əkkəɤ aɤrəm wa n Ǝrrum ənta da" ²² Təzzar izammazal Timotay d Erastus win madhalan-net s akal ən Masedoməya ,mišan ənta iman-net igla iha akal wa n Asəya har daɤ-as ihog. ²³ Azzaman en inijarway daɤ-san aɤrəm n Efez wəllen fəl əddəlil ən tarrayt ta n Ǝməli ²⁴ Ill-ay anad iyyan igân esəm Demetrəyəs,itaggin daɤ əzrəf fototan n ahan n əssənəm iyyan imosan tantut təgât esəm Artemis .Igarraw daɤ awen tənfa təknât igət i nadan win midawan-net. ²⁵ Iššedaw-tan-du ketnasan,əntanay əd nadan wiyyad win əddarnen daɤ awen,inn-asan: "Ya meddan,təssânam as təgərgist-nana,təqqân daɤ əššəɤəl wa da. ²⁶ Mišan təhannayam kawanay iman-nawan ,təslâm deɤ awa itaggu aləs wədi as itawannu əddi Buləs . Aigannu :''Imalan win əgan fassan n aytedan aggotnen ,wərge da da daɤ Efez ɤas ad issəxrak aytedan ,kalar harkid taššam n aytedan win akal n Asəya kul. ²⁷ Arat wa ,wərgeɤ əššəɤəl-nana ɤas as du-z-awəy iguz ən tazak n ad itəwəlku, kalar ehan n əlɤibada wa n Artemis di maqqarat,ta təmosat təməlit-nana ənta da ad irtək almaqam-net ,tammazzay fadda d ətəwəsəɤmar, ənta əɤbâdan aytedan kul win akal n Asəya, d əddənət ketnet ." ²⁸ As əslan aytedan win das-əssəsamnen y awen ,iggaz-tan alham labasan,əssokan imaslan-nasan ijənnawan gannin: "Artemis ta n kəl-Efez di maqqarat !" ²⁹ Təga tənajarwayat daɤ əɤrəm ketnet .Tənkar tamattay təggag s ahan zəwwəran wa n əmənəy ,təlwây Gayəs d Aristarxus win akal ən Masedonəya əmosnen imidawan ən Buləs dər iddew daɤ əsikəl. ³⁰ Təzzar ira Buləs ad akku tamattay ten ,mišan əgdalan-as-tu nalkiman ən ɣaysa ³¹ Wala arat daɤ muzaran n akal n Asəya ən midawan-net da,zammazalan sər-əs aytedan y a daɤ-as əgməyan ad wər nola, ³² fəlas taššam -nasan wər əssenan fadda əddəlil wa fəl əddewan den. ³³ Ǝsdaɤan-in kəl-Ǝlyəhud aləs igân esəm Alaskandər əs tiddawat ,ittəmal-as awa igan den. Təzzar ad isidugin s əfus -net i tamatayy təfastit ,y a dasan-iššiwel s esəm ən kəl-Ǝlyəhud. ³⁴ Misan as əgran as awedan ən kəl-Ǝlyəhud a imos əssokan imaslan-nasan ijənnawan jajjayen gannin : "Artemis ta n kəl-Efez di maqqarat !" Har din-əkkan edag ən sanatat assaɤaten gannin awen ³⁵ Aləs wa imosan ənaktab n əɤrəm en , ənta a isahhadarren tamattay en ,inn-as : "Ya meddan n Efez ,awak ill-ay awedan wər nəssen as, aɤrəm wa n Efez ənta a imosan əmagaz n ahan wa daɤ tətawaɤbad Artemis di maqqarat əd šaššelan-net igân daɤ təhunt as jənnawan a daɤ du-tərtak ? ³⁶ zama wər t-illa awedan as ijhâl awen ,wədi ihôr ad təhədərrem ,ad wər tagim arat waliyyan daɤ tararada , ³⁷ fəlas meddan win du-təlwayam da , wərmâd əmôsan ibaydagan ən nan win əlɤibada ,wala deɤ ənnan a labasan əs təməlit-nana. ³⁸ Amaran kud Demetrəyəs əd nadan win midawan-net ill-ay a dasan-iɤsad awedan, wədi əllân-tu jilan win daɤ itaggu əššəriɤa ,əllân-tu deɤ naxkiman win tu-tagginen .Akkinet-tan ³⁹ kud deɤ wiyyad aratan a dər təssəstanam , ad tətəwəknu taɤawšay tədi daɤ asaggawar wa iskatan s awen . ⁴⁰ Nakkanay da əmərədda tazak n ad itiwənnu əfəlləg a nega fel əddəlil n awa igan azalada;fəlas wər t-illa əsaru nəga as nənna ənta a fəl təga tənajarwayat ta. ⁴¹ Iɤrad ənaktab n əɤrəm awal wen ɤas ,inna i tamattay ad təwəziwəz.