¹ Dəffər awen igmad Buləs aɤrəm n Atena ,ikka wa n korent . ² Den da ad immənay d aləs ən kəl-Ǝlyəhud igân esəm Akilas n akal ən Fontəs ,a d-osân səket ifâl-du akal wa n Italəya ənta əd hannes Friska ;fəlas əmənokal klawdəyus Qaysara a omatan s ad təwəstəɤan kəl-Ǝlyəhud kul daɤ əɤrəm n Ǝrrum.Osaɤ dər-san Buləs . ³ Amaran dad imos as ola dər-san əššəɤəl-ketnasan əššəɤəl-nasan igi ən həktan-imal ɤur-san Buləs ,išɤal. ⁴ Akk əzəl ən təsanfawt ,itaggu Buləs isaln daɤ ahan ən kəl-Ǝlyəhud wa n əlɤibada ,igammay d ad əzzəgzənan Kəl-Ǝlyəhud əd kəl-Ǝlyunan ⁵ As d-osa silas əd Timotay Buləs əfâlan -du Masedonəya ,igmad Buləs ənta s amel n awal ən Məššina ɤas ,itagayyat i kəl-Ǝlyəhud as ɣaysa a imosan Ǝlməsix ⁶ Mišan ugayan sər-əs kəl-Ǝlyəhud ,a tu-rabbadan. Ibbəkbak Buləs isəlsa-net,almaɤna ab'as dər-san idraw wala.Inn-asan: "Təlmanam iman-nawan ;iwəret alxaq-nawan iɤafawan-nawan,nak ab'as di-iwar alxaq n iba n əlɤillas-nawan.A obazan ɤur əmərədda aytedan win wər nəmos kəl-Ǝlyəhud a z'akkaɤ." ⁷ Təzzar ifal-tan ,iggaz ehan n aləs igân esəm Titəyus yustus imosan əmiksad ən Məššina as illa ahan-net dəhma n ahan wa n əlɤibada ən kəl-Ǝlyəhud ⁸ krisbəs wa n əmuzar n ahan ən kəl-Ǝlyəhud wa n əlɤibada ənta izzigzan s Ǝməli ,ənta harkid aytedan n aɤaywan-net kul .Ǝslan kəl-korent aggotnen i salan win itaggu Buləs,əzzəgzanan əntanay da ,təzzar tawasalmaɤan daɤ aman. ⁹ A s ahad iyyan iga Buləs targət a daɤ das-inna Ǝməli: "A kay wər təggəz tasa ,kalar šawal ad wər taffasta , ¹⁰ əlleq-qu dər-ək ,wər t-illa i z'ifrəgan a dak-ixšəd arat ,fəlas əleɤ aytedan aggotnen daɤ əɤrəm wa ¹¹ Ixsar Buləs daɤ əɤrəm ən korent har iga awatay d aganna, isasaɤru aytedan awal ən Məššina. ¹² Azzaman win daɤ imos Galləyyun ənaxkim n akal wa n Akayya ,ənkaran kəl-Ǝlyəhud əgan eɤaf fəl Buləs ,əbazan-tu,ewayan-tu s adag n əššəriɤa , ¹³ ənnan "Aləs wa , igammay d ad əɤbədan aytedan Məššina əs təməwit təmmizrayat əššəriɤa. ¹⁴ As zam issinta Buləs daɤ awal ,inna Galləyyun i kəl-Ǝlyəhud : "kawanay kəl-Ǝlyəhud ,ənnar assa a di-du-təgam daɤ batu n arat immizrayan əššəriɤa madeɤ ark amazal labasan, iməl-tu əddəlil wa fəl dawan-z-əssəsəmaɤ; ¹⁵ mišan zama awa tamazaq təgât fəl təfir d əsmawan d əššəriɤa-nawan,əšrəɤat-tan kawanay iman-nawan,nak wər areɤ ad əqqəla əmašraɤ n aratan zun win di." ¹⁶ Amaran isassardaq-qan ehan wa n əššəriɤa . ¹⁷ Təzzar ənkaran ketnasan əbazan sustinəs qwa n əmuzar n ahan ən kəl-Ǝlyəhud wa n əlɤibada,ad t-əggatan dad da dat ahan wa n əššəriɤa ; mišan wər izlay Galləyyun daɤ awen ¹⁸ Igla Buləs ixsâr daɤ əɤrəm ən korent har irəw . dəffər adi inamagga əd nalkiman ən ɣaysa šiwatriwen ,iggaz aɤlal n aman ikka Surəya ,iddew əd friska d Akilas .Harwada wər iggez aɤlal n aman daɤ qankrəya inimahanzan əd korent akku surəya ad ilza uɤaf-net y ad assaknu s awen addawal wa iga ¹⁹ As osa aɤrəm n Efez , imməzzay dər-san Bul;əs .Igla ənta iggaz ehan ən kəl-Ǝlyəhud wa n əlɤibada imašawal dər-san. ²⁰ Ǝgmayan daɤ-as a ɤur-san ihag, ugay-asan ²¹ Mišan as tan-iflal inn-asan :"wər imməkkan a di-wər-iga əmud wa d-izayan daɤ Yerusalam . A kawan-d-əqqəla kud Məššina irda" Igmad Efez iha aɤlal n aman . ²² As izzəbbat daɤ əɤrəm wa n qaysarəya ,iggəzzay,ikka yerusalam issəslam Ǝlkənisat,dəffər adi izagaday,ikka aɤrəm n Antəyoxəya ²³ As daɤ-as iga tamert ,igmad-tu,illil akal wa n Galatəya əd wan frijəya ,isisuhit əzəgzan ən nalkiman ən ɣaysa kul. ²⁴ As itaggu awen ,aɤrəm n Efez os-ay-du aləs ən kəl-Ǝlyəhud igân esəm Abbolos n əɤrəm n Alaskandrəya,imosan aləs issânan awal wəllen ,igân masanat tagget y Ǝlkəttaban ²⁵ Itiwasasaɤra tarrayt ta n Ǝməli,amaran ikf-ay Infas wa zəddigan gəlleyat daɤ igi ən təlxutbat, isasaɤru deɤ s əlluɤ daɤ batu ən ɣaysa ;dər iga awen da ya ,isalan n əsəlməɤ wa itaggui Yaxya aytedan daɤ aman ɤas a t-əhanen ²⁶ Ad itaggu awal daq-qu wər təha tasa daɤ ahan ən kəl-Ǝlyəhud wa n əlɤibada .As das-masnat ta iga tarrayt ta n Məššina ²⁷ Dəffər awen isammarkas ta iga tarrayt iki n akal wa n akayya ,təzzar ədhalan-tu mədrayan-net daɤ əzəgzan s awen . Ǝktaban širawt i nalkiman ən ɣaysa win t-əhanen fəl a das-agin təməwit tolâɤat as tan-in-osa.As din-osa,təggaz-tu tənfa zəwwərat a du-təfâllat arraxmat ən Məššina y aytedan win əzzəgzannen ²⁸ Fəlas isabbahaw s assahat dat tamattay iduf wa əgan kəl-Ǝlyəhud.Issəkn-en daɤ Ǝlkəttaban as, ɣaysa a imosan Ǝlməsix