¹ Osan-du meddan wiyyad a d-əgmadnen akal ən Yahudəyya aghrəm n Antəyoxəya ad sasaghrin inalkiman ən ghaysa ,gannin-asan : "As wər təlkkeman y alghadat n əmənkəd ta d-oyya ənnəbi Musa , wər za təgrəwam əlghillas." ² Wər irda Buləs əd Barnabas əd batu ten ,eway-du awen tamazaq labasat gar-essan əd Buləs əd Barnabas əd Barnabas .Tezzar tətawagga tanat n ad aggazzay Buləs əd Barnabas əd nalkiman ən ghaysa wiyyad əs Yerusalam fəl ad ənəyan inəmmuzal əd muzaran n Elkənisat dagh batu ten. ³ Təkf-en Elkənisat ta n Antəyoxəya arat kul was əddəraran ,amaran əglan .Erzagan akal wa n Fəniseya əd wa n Samarəya sughulan isalan kul ən təhubt ta d-əganat təmattiwen sin wər nəmkos kəl-Elyəhud əs Messina .Isifilawas awen wəllen inalkiman kul win kallan en ⁴ As osan Yerusalam təg-asan Elkənisat ketnet marxaba əd nəmmuzal əd muzaran .Təzzar əgan dagh-san isaln n arat kul was tan-ikfa Messina igi-net ⁵ Misan əggadan-du meddan wiyyad ən nalkiman ən ghaysa əhanen taggay ta n Fearisaytan ənnan : "Emənkəd əd ləkkum y əlqanun wa n ənnəbi Musa fərəd a imos fəl aytedan win wər nəmos kəl-Elyəhud" ⁶ Tezzar əmmənayan nəmmuzal əd muzaran n Elkənisat fəl ad əssənan awa z'agin dagh batu ten. ⁷ As ərəwan əmmizaghan ,ibdad Butros inn-asan : "Imedrayan-in ,tessânam as irəw as di-isannafran dagh-wan Messina fəl adaslin aytedan win wər nəmos kəl-Elyəhud isalan n Elinjil dagh imi-nin ,əzzəgzənan əs Messina. ⁸ Messina issânan awa ihan əwəl n awedan kul,issikna tərəddawt ta sər-san iga əs təhakkay ta tan-iga Infas wa zeddigan əs təməwit tas dana-t-ikfa nakkanay win kəl-Elyəhud. ⁹ wər danagh-izannamazlay dər-san fəlas Messina a izazdagan iwallan s əzəgzan sər-əs ¹⁰ Dagh adi əmərədda ma fəl tətaggim tənagmayt i Messina s igi wa tətaggim fəl rawan ən nalkiman əzuk əs wəərmag əfrâgan marawan -nana adakal-net wala degh nəfrâk-ku nakkanay? ¹¹ wərgegh arraxmat n Eməli ghaysa as nəzzəgzan ,təssəfs-ana ? Entanayda za ,əntanay win wər nəmos kəl-Elyəhud,təməwit ta da as əfsan!" ¹² Tezzar təffəsta tamattay ketnet , əssəsaman aytedan i Branabas əd Buləs sughulan isalan kul ən təlməghjujaten əmosnen alghalamaten d aratan simaklalnen win as tan-ikfa Messina igi-nasan dagh təmattiwen sin wər nəmos kəl-Elyəhud. ¹³ As iffəsta Barnabas ed Buləs ,issewal Yaqub ,inna : "Imedrayan-in, səsəmat-i. ¹⁴ simghon Butros issôghal-ana təməweit tas issənta Messina harwa dagh tizarat əsəkni ən tara ta iga i təmattiwen sin wər nəmos kəl-Elyəhud s əsənnəfrən wa dagh-asnat iga aytedan as z'eqqlnen tamattay-net. ¹⁵ Amaran inimannak awen d awa ənnan ənnəbitan dagh Elkettaban as ənnan : ¹⁶ '' Ad d-əqqəla dəffər awa ,ələsagh i Dawəd akaras n ahan-net inirajjen,krəsagh iməggulaz-net ,əssəbdədaq -qu , ¹⁷ fəl ad əgmməyan aytedan win d-əqqimnen Eməli .Awalla simattiwen kul sin wər nəmos kəl-Elyəhud,ad əqqəlnat tamattay-nin,əghbadnat-i adi a inna Eməli wa igan aratan di kul '' ¹⁸ fəl təga masnat harwa irəw. ¹⁹ Awen da fəlas nak Yaqub,ərdêgh s ad nayyu əsəmməghitər n aytedan win wər nəmos kəl-Elyəhud win di-tutabnen əs Messina ²⁰ Misan əktəbatana y-asan sirawt,nann-asan ad ammazzayan d igi n əzzəna əd tattay ən san n əmudar təngha tarzam əd təssay n əzni. ²¹ Fəlas irəw ad t-əmalan əlfəqqitan sasaghrinen Ettawret dagh əkkulluk n əghrəm ,itawaghru degh akkəzəl ən təsanfawt dagh nan ən kəl-elyəhud win əlghibada." ²² Təzzar ərdan nəmmuzal əd muzaran d Elkənisat ketnet s ad sənnəfrənan wiyyad dagh-san,zəmmizəlan-tan s əghrəm n Antəyoxəya, idawan əd Buləs əd Barnabas . Sannafranan Yahuza was itawannu Barsabbas əd silas ,əmosnen imuzaran dagh məzzəgzan əs ghaysa . ²³ Essəwaran-tan ad awəyan sirawt s ənta da awa dagh-as əntaban: "Awa nakkanay inəmmuzal əd muzaran ən nalkiman ən ghaysa win mədrayan-nawan.nəhul-in imədrayan-nana win wər nəmos kəl-Elyəud ,win əhanen aghrəm n Antəyoxəya əd win əhanen akal ən Surəya əd wa n kilihəya ²⁴ Nəsla assa wa kawan-in-əgan məddan danagh-in-əfalnen si wala turagat-nana ,əghsadan iman-nawan,əssəwasan-kawan a awa gannin ²⁵ Adi a fəl nənamannak ketnana ,nəgatanat ad nəsənnəfrən meddan ,nəzzəmmizəl-tan-in sər-wan,idawan-in əd maran-nana Barnabas əd Buləs. ²⁶ əmosnen meddan əgânen iman-nasan dagh algharar fəl əddəlil n əsəm n Eməli-nana ghaysa Elmesix. ²⁷ Adi da fəl din-nəmmazal Yahuza əd silas fəl a dawan -ələsan əsughəl ən salan win imi s imi ²⁸ fəlas issibdad Infas wa zəddigan əd tattay n amensay itiwakfan y əssənəman əd tassay n əzni əd tattay ən san n əmudar təngha tarzam d igi n əzzəna , ²⁹ As tettafan iman-nawan fəl igi n aratan win di, ad tagim a olâghan.Nəhul-kawan-in wəllen ." ³⁰ Dəffər awen tawasallaman ,əzagadayyan,əqqalan Antəyoxəya ,ewâyan sirawt . As din-ewadan-du inalkiman ən ghaysa ,əkfan-tan sirawt ten. ³¹ Tətawaghra,təzzar saddawen-tan salan talamnen fəl man win əgrawen den. ³² Amaran issewal Yahuza əd silas əmosnen əntanay iman-nasan ənnəbitan ad taggin ənnəsixa aggen i mədrayan talaman-asan fəl man, sisuhen əzəgzan-nasan. ³³ As iga Yahuza əd silas tamert den,əssəllaman-tan mədrayan win Anteyoxetya fəl ad əqqəlan Elkənisat ta tan-du-təzamazalat . ³⁴ Misan issof Silas ad aqqam den da ,iqqal âs Yahuza ghas a iqqalan Yerusalm ³⁵ Ixsar Buləs əd Barnabas dagh Antəyoxəya ,xattaban əntanay əd wiyyad imədrayan aggotnen y aytedan Elinjil n Eməli ,sasaghrin-asan-tu degh. ³⁷ Ira Barnabas ad idawan əd Yaxya was itawannu Markus. ³⁸ Misan inna Buləs wər ihor ad idawan d aləs as dat awen a dagh-san ixtas iman-net dagh Banfileya ,wər ghur-san iqqim har səkkəsəwan əssəghəl-nasan. ³⁹ Təkkus talga gar-essan har d-eway awen as əmməzzayan.Iddew Barnabas Ed Markus əggazan aghlal n aman əkkan Qibrus. ⁴⁰ Buləs ənta isannafran Silas,iddew dər-əs .As t-əgan mədrayan dagh təghlift ən Məssina ,igla. ⁴¹ Illil Biləs akal wa n Surəya əd wa n Kilikəya isisuhit əzəgzan n Elkənisaten.