¹ Azzaman en da a daɤ issenta emenokal Herod ezeɤɤezzeb n arat daɤ aytedan n Elkenisat. ² Isassanɤa es takoba yaqub wa n amadray en yaxya ³ As inay as oggaman kel-Elyehud awen ,isattarmas Butros. Itaggu awen adan n emud wa daɤ tattin aytedan sigelwen sin wer iha xamira. ⁴ Isassag-ay daɤ kasaw, isseweq-qu i maraw sijitan ed sedis a tu-tinemezreynen s ekkoz ekkoz. Otâs a das-isreɤ dat awedan kul deffer emud wa n Akkay . ⁵ A iha Butros kasaw den ,Elkenisat enta tedgâz wellen tetansay-as Messina . ⁶ As ahad wad z'ifaw isreɤ-as Herod ,insâ butros ger essin sojitan a t-ettâfnen s essin sassaran ,ebdâdan deɤ magazan wiyyad dat emi en kasaw . ⁷ Walla a ihogan inafalal-du angalos iyyan n Emeli ,imalawlaw adag wa daɤinsa Butros daɤ ammas en kasaw .tezzar idas angalos tasaga en butros,issenkar-tu inn-as :Ebded tarmâd !» Ertakan sassaran win as ekradan fassan-net daɤ tamazayt ten . ⁸ Harwa inn-as: «Ezleg iselsa-nak ,teselaɤ iɤateman-nak.» Iga Butros awqen da «Emeredda ezleg ebernuz-nak ,telkemaɤ-i-du» ⁹ Igmad-tu Butros ilkâm y angalos ,wer issen as awa itaggu angalos den tidet a imos ,iɤil target awen ¹⁰ Okayan fel magazan win azzarnen ed win ellanen denneg-san ,amaran osan-du tesehert en tezoli teswâdat sa ser eɤrem.Tennolam dat-san sin man-net ,erdaɤan .Essewalan ed tarrayt iyyyat, wala a ihogan ifal-tu angalos. ¹¹ Tezzar iggaz Butros annawalat n aɤaf-net,inna: «Emeredda ekkasaɤ assak daɤ-as ,Emeli Messina a d-izammazalan angalos-net, ikkas-i-du daɤ fassan n emenokal Herod ed talbast kul tas eran kel-Elyehud a di-tegrew.» ¹² Amaran igra taɤara-net ,ikka ehan en maryama ta n anna Yaxya was itawannu Markus .Emminayan ɤur-es aytedan aggotnen tansayan Messina. ¹³ Ikawkaw imi n aɤalla tegla-du tamassaɤalt tegât esem ɤoda y ad tessen awa imos awedan. ¹⁴ As tezday emesli en Butros ,awa tega tedewit,edag n a das-talem ,tozal teqqal ammas n ahan ,temal as Butros illa dat emi n aɤalla ¹⁵ Ennan-as : «kam,emmeskel a tegeɤ!» Misan tezazzayyar-asan daɤ-as enta daɤ awen. Amaran ennan-as : «Daɤ adi angalos-net adi.» ¹⁶ A egannin awen ,Butros enta b itakawkaw-asan imi n aɤalla .As olaman ,enayan-tu ,iga ser-san awen esemmeklel labasan ¹⁷ Isaddagan-asan s efus-net ad affastin, tezzar imal-asan temewit kul tas t-id-ikkas Emelui Messina daɤ kasaw, inn-asan deɤ: «Emelet adi i yaqub ed medrayan-nana win hadatnen.» Amaran ifal-tan ,ikka edag iyyan . ¹⁹ As t-id-aba y aytedan win as t-isseswad Herod ,issestan sojitan win t-ogaznen ,amaran omar s ad tawanɤin kerez .Deffer awen igmad Herod akal wa n yahudeyya,izagaday ikka aɤrem en Qaysareya y a daɤ-as agu tamert ²⁰ Awen as itaggu,Herod ih-ay alham labasan n aytadan n eɤrem wa n tir ed wa n sidon .Idhal-tan Blastus wa n emessewwer en Herod , namannakan zammazalan es Herod almawakkilan -nasan ,fel a der-es aknin,felas akal-net a du-gammadan sudar-nasan . ²¹ As d-osa ezel wa itawasanafranan,izlag Herod iselsa-net win taɤmar tezzar iqqim fel texawit-net ta n taɤmar,amaran issewal i tamattay ²² Ad saɤaren aytedan,gannin : «Emesli wa in emeli iyyan ,wergeɤ in awedan!» ²³ wala a ihoagan iwat-tu angalos n Emeli felas igi a iga iman-net daɤ adag en Messina ,wer iga y Emeli adkul wa der ihor ;tezzar atsanat-tu tewakkawen ,aba-tu ²⁴ Awal en Messina enta ,igla itiwezewiz ,itagatan aytedan win ser ezzegzennen. ²⁵ Amaran Barnabas ed Talut as eɤradan esseɤel wa tan-d-ewayan s eyrem en yerusalam ,eqqalan s as d-ehan ,eddewan ed yaxya was itawannu Markus.