¹ Sésu a bande unenze va tungu mudibe, piti mbili yi dughe va tunguandi rane nakeme ghu ghare mbunguawu ne wutsaghele. Piti yotsu yi dughe va tu ngu mudibe. ² Anenze yawu mbili mambu kene banongu. vanenze yandi ayambile nawu re : ³ Yuluanu, muvaritsi apula ghuye vara. ⁴ va vara yandi, dine dikabu dilagha munzile, re bagniogni ba sunda ghu yitse doke biotsu bilaghe. ⁵ Dikabu dimosi, dilagha va mbure yi mamagni yigha mutambe mbili, bivaru bise tsinge ne ubende mumbara ghuse bile mutambe umbili mu mamagni mene. ⁶ Te va pule gnangu bivaru biotsu bi yumughu, mumbara mikange mi bivaru biena misi gnonga mbili ghu mureghi mu mamagni. ⁷ Dine dikabu koka dilagha ghu ghane ghare batsende, re bise bangughu buedi mumbra bi bile mbaghe ne batsende bene. ⁸ Kere dina dikabu divaru ghu mureghi ubuedi, bivaru bine bi bende ne bire bangughu ne ubure milunde, bine, bighuarisi maghumi mareru bi mosi maghumi masamune, kere bina mukame. ⁹ Vavena, a yambile nawu re: une maru mawu yulu, ayulu. ¹⁰ Va bile Sesu ya pinza, yane dighumi di bayikitsi ne bayikitsi ba beyi, bane tombe yendi divindughulu di nongu yiyine. ¹¹ A yaghulawu re: mambu ma Nzambi masa disuele ghu yenu. Bane baka yulu ke ghu banongu. ¹² Redibandu nise batse bemine, basake labe, nise batse tsibulu maru basake yulu. mumbara basa kalughe ne boghulu mabi mawu. ¹³ Ane tombe yawu re: dise ghone yulusune nongu yena? Ake yenu dighu yulusune banongu tsegni? ¹⁴ Muvaritsi ake vari mambu ma Nzambi. ¹⁵ Bivaru bilaghe mutungu nzile re musamu Nzambi uka varu. Vake yulu wo, koke sate ne yitse ghu burulu wo. ¹⁶ Re ghu bivaru ghu mumutambe wu mamagni, vake yulu yawu musamu nzambi bare singe wo ne ignunga, yawuba sane miangu misipe mambu ma paghe. ¹⁷ Re mudio, mbili baghu sambule ghitu mu mambu mene. ¹⁸ Bivaru bilaghe mughane ghare batsende re baba ka yulu musamu Nzambi. ¹⁹ Re vane mimbondu mi bulongu, bukiti, magninge ma bivave biotsu, ghu ghane gharawu bika tsimisi musamu Nzambi. ²⁰ Bivaru mu mutambu ubuedi, re batu baba ka yulu mabighu bane kiele ne yawu ubure mibi. ²¹ Sesu a yambile ra: Dine bungudu di u bonge lambi muye sundze ghu tsi tangia? ghu sandi, dighuènde ne yo ghu ndaghu ne ukobighe mu dikuti. ²² Mumbara ghu sake bile ghi suema ghi gha pule ghu kane, koka bighu disuele dighu yabene. ²³ Wune maru mawu yulu, a yulu. ²⁴ Ane bakonde re: rambilanu maka yulu yenu. Dikabu dika yelighe yu, dighu yelughu mu yu, maghe konde. ²⁵ Mumbara uke veghe mbili aghu kondu, usake veghe mbili aghu dumbu nzi yike bi nandi. ²⁶ Ane bayambile re: Bufumu bu Nzambi bunde gha muvaritsi. ²⁷ Mwisi atsiende ghiolu, nisi atse lame irimbe, ne gnangu ne dibati asake yabe naka bendi ne naka bangughe ivaru. ²⁸ Mutamba aka banguse ke yabene, mapange ivaru di mubeyi re batsangu ne mibi ne uvate ghu ghare ba tsangu. ²⁹ Va dikiesi dike yele mibi, diyabe re ubonge budilu nu uye doke. ³⁰ A tombe re: ake dibaghusunu Bufumu bu Nzambi nde ne ghi ? ³¹ Ake nongu ndi yigni irungile bonge yenu mu bufumu buene ? ³² Bufumu bu Nzambi bu baghusunu ne mubi wutsitsu seneve. Vake manu yandi uvaru, anbangughe, ne muri wumunene uvioghilile miri miotsu ghu nungi. Ane vatise mataki maka runge banioni mufu. ³³ Sésu a yambile mbili banongu mu yambile ne mbubiandi va lonzenge yandi musamu Nzambi a rungule yululu yawu. ³⁴ Munenza, a yambilange nawu ke ghu banongu! Te va bile yandi ya pinze ne bayikitsi bandi uyulu, a supule yawu banongu tsiene. ³⁵ Wisi wene ne tsisighe, Sesu a yambile yawu re: disabughi ghu simu yine. ³⁶ Sésu a peke ne ba yikitsi bandi. Ba sise piti ne ghoghule ghu time mubu. Bambungu bare bingenge yawu. ³⁷ Mukunge ne vughe mu mubu. Mingiba miminena ne ghubama mu bambungu, tsiotsu tsi kusughu wubase ne mambe. ³⁸ Sesu abile ghu kodu mbungu malameme muru va yulu ipundeme. Ne yawu, baparmusa yandi: Fumu ise ghone laba re dighu fua ? ³⁹ Sesu a rambughu, arelingise divughe, are yambile ne mubu re: rumbe! Ligme! Divughe dire vioghe, mubu ure lingme. ⁴⁰ Sésu a yambile ne basalitsi bandi re: mughi yénu dine wome? Yénu disa ne ghitua? ⁴¹ Ba base ne woma ne ureghema. Ba yambilenge kere yawu ne yawu: wuwu mutu nde gnie? Wu ghone ghobusu nene divughe ne mingiba!