DCS-Mirror-parfait-ayanou_snq_mat_text

Ibuku 24

¹ Sésu nuvate ghu Ndaghu Nzambi, ayende. Bayikitsi bendi baghoghule ghu yendi, nutoghule munongu na rungu ndaghu Nzambi. ² Te ayagule yawu re: Labanu marungise motsu mame? Nughiènze mayèmbile yénu; ghusake sale dimagni mu dimagni disake pènzighe. ³ Ve tsaghèle yèndi ve yulu mukongu wu ba Olivé, bayikitsi bayitse ghu yandi ghu disuèle nutombe yendi re: yembile yétu dikiesi dike pule mambu mène; ne bilimbe bi muitsu waghu, ne mambu make lonze re: tse ngi yimeduke? ⁴ Sésu ayaghule yawu re; rèmbililanu, dikére dungumusu ne bátu. ⁵ Mumbara bambili bake rugha mu ndughami nu mème re: Mare Christi, ne mbili bátu bake dungumusu. ⁶ Yénu dighu lungu batsangu tsi miluani miminène, te diyalabe wome mu mbara mambu mène make labene; te sake nene bile disukusulu. ⁷ Mumbara tséngi na tséngi na tséngi bake teleghène bu fumu ne bufumu bake luane. Ghuke bile banzale tsitsinè̀ne, ne mutambe wu ke regheme. ⁸ Te biotsu bine kebile ke dibandu di maghughe ma munongu umosi gha mughiétu ne misongu mi wubure. ⁹ Ne bake ritsigha yénu maghughe, nu bokayénu malongu motsu bake kola yénu mu diambu di ndughami. ¹⁰ Bambili bake sambule ghitu ghiawu. Bake sambenenge, nu kolenenyawe ne yawu ge. ¹¹ Mbili babighitsi bawufure baghu teleme, ne baghufura mbili ne wu dungimisa yawu. ¹² Ne mumbara dibi dighuraghe, ne dironde di mbili bátu dighu ghabughe manzime. ¹³ Te wotsu uke sindile kuanga ne ghu disukusulu, ake yobulu. ¹⁴ Ne musanu umugni wu ghu lonzu mu tsengi yotsu, mulonze bumuégni ghu malongu motsu, kérevana kebile re disukusulu. ¹⁵ Re dibandu, ve ke labe yénu mukolitsi ame tèleme, ya wu mubighitsi Daniel ayèmbile va ke tèleme yandi ghu ghare ndaghu Nzambi (Wotsi una bange, agnighughulu.) ¹⁶ Botsu babake kiéghulu ghu Judée, bake rina mu mikongu. ¹⁷ Ne wuke kiéghulu ghu yulu muaznu Ndaghu asake sunde ghu ndaghu mu bonge bivave. ¹⁸ Ne wuke kiéghulu ghu nungièndi, asake ghabughu ghu ndaghuéndi mu bonga yilinge ¹⁹ Maghughe ghu baghiètu babake daghusu ne mimi mu dikiési diéne, ne balake nuisenge. ²⁰ Sembilenganu mure wurine wenu ghukore bile mu kikiési di mutubu, kane mu ghusi wu sabba ²¹ Mu mbara maghughe make bile mbili; wuvioghilile motsu ma tsengi yiyi, bande ve dibandu di tsengi ngu menemugni. ²² Mbé́ bawusi bène tsise tabulu, mbe ghusandi mutu uke yobughe. Te mu diâmbu di babasolu, bawusi bè̀ne baghu tabulu. ²³ Bambili baghu yitsinge, nu yambila re: Mare Christi! Bane re: Dire babighitsi baghiènze ba Nzambi. Yawu baghuritsigha mbili bimuile ghu kusughe laghise nisi babasolu, babane ghitu mu Sésu. ²⁴ Mu dikiési diène; gha mutu are yambile yènu re: labanu! Christi ande ghughu. Diyayululu mutu wêne. ²⁵ Yuluanu! Matse mane yambile yé́nu. ²⁶ Gha ba yèmbile yé́́nu re: Labanu! Christi akende ghu tséngi yiyumughe; diyayende, kane re: Atse suème mu birini bi disuèle, diyayulu. ²⁷ Mumbara muane mutu aghuitse nde munongu wumosi gha yivèle ghika tsombusi bande ghu yulu, ne ghutsi, ne mu bitsighe biotsu ²⁸ Yitsighe ghikebile bafumbi, re ghio, ghike basene bagnunge. ²⁹ Veke vu maghughe mana, gniumbi dike tsima, tsungi yisake be tsombuse, bagnetse tsighu laghe ghu yulu, ne, bungudu bu yulu bughu tsuke. Me nupenzighe. ³⁰ Korevana, yilimbe ghi muane mutu ghighu tutughu ghu yulu, ne bibandu biotsu bitséngi baghubila na paghe yimbili. Baghu laba muane mutu aghuitse ghu ghare dibungi di yulu, ne bungudu, ne bundumbe du mbili. ³¹ Mu dufi di pungi yiyinene, aghu sindighe bizane biandi mu ghukighe batu bandi, ne tsèlu, ne tsélu yi bulongu buotsu. ³² Munongu umosi ne muiri; aghame puse maghayi, mamone; dise tsimbu re: mutubu ukoke bêbè̀le; ³³ Munongu umosi, mu dikiési dikide laba mambu mène disake be tsimbu re: Muitsu wandi ghu koke bèle ne, akoke ve mure ndaghu. ³⁴ Ghiènze, mayambile yénu! Dikughu dinemugni disake nene ghude, mambu mène maghu labene ³⁵ Yulu ne tsi bighu vioghe, te mabighu mami maghu simbe mubu ne mubu. ³⁶ Te, mu diambu di wusi wène, ne dighuère diène, ghu sandi mutu uyatsi, nisi bianze ghu yulu, nisi muane, te, vèngu tayi yapinze. ³⁷ Munongu umosi gha mu dikiési di nuè, renane nake bile mu muitsu wu SÉsu muane mutu. ³⁸ Mumbare gnidu ne ghiurughe, batu ba yange, ne, bayange, ba yongungu, ne bayongisenge bane bawu baba ghiétu, ne bababaghele. Kuanga ne mu wusi ghu gningene nuè ghu mbungu. ³⁹ Yawu base yabe dïambu, kuanga ne mu dikiési. Di rughe gnidu mu ghudise yawu. Munongu umosi mu muitsu wu muane mutu. ⁴⁰ Mu dikiési dièna, babaghele babéyi baghu bile ghu nungi; umosi aghu bongu, una, aghu sisu. ⁴¹ Baghiétu babéyi baghu roenge yitsighe ghimosi; umosi aghu bongu, una aghu sisu. ⁴² Diyabile gha bange biolu, mumbara yénu diseyaba dikiési dike rughe fumuénu. ⁴³ Te, yabanu! Mbe ghe ndaghu ayabe dikiési dirugha muyibitsi. Mbe ase lame ghiolu, véngu wu moghe, mure mayibitsi akore gningene mu yibe ghu ndaghu. ⁴⁴ Re dibandu; bilanu batsonzeme, mu mbara muane mutu aghuitsa mu dikiési di gha yabe yènu. ⁴⁵ Ake ndegni wuyi musèlitsi utsonzeme, ne wune buyèdi? Wu silu ne fumuèndi mu bungule yitsuku ghièndi mu makiési mayèlimine? ⁴⁶ Miule ghu musalitsi wène, uke daghusu ne fumuèndi aghone vaghe nane. ⁴⁷ Nughienze! Mayàmbile yénu re: Fumu aghu vêghe yandi bièndi biotsu mu kièle. ⁴⁸ Te, aghabile musalitsi umubi uke tèsi re: «Fumuami asake rughe ne mapape». ⁴⁹ Nu bande dimbe basalitsi bamosi; nuyi, nunu ne bange malangi. ⁵⁰ Fumu aghu rughe mu dikiési disake yabe yandi, ne mu wusi usake yabe yandi. ⁵¹ Fumuèndi aghu kilise yandi, munongu umosi ne bagni bamine, ne ghuke bile bakondu, ne wu ghuèrisa minu.