¹ Va lénioni la béta Jesus ghu tsèngè ya leghègi mu diable a tchitse ndè. ² Ndè na mina kughi makumi mana ma tsuhgu : mana a nianga, mana na butsughu, va yule vana ndè na mone nzale. ³ Mubéli na kukele va péd'i andè, na lèlè ndè ndé Ti wè lidi Muaana Nzèmbi wa mbuli sade wo mamani maa ma kaleghe mapè. ⁴ To Jesus na yaghele ndè ndé: Tchavè, mè chisade tchiambe muènè vè, muti Nzèmbi a lèlè ghutso mabighe mèndi: Mutu asa fua moyi ndile a mu mapè penza vè, to mu mabighe motchi ma mapola ghu munio Nzèmbi. ⁵ Vana mubéli na béte ndè ghu musènge a Jerusalem, musènge mua tèndègè na tembe ndè ghu ghili aghili a nzo Nzèmbi, na lelè ndè ndé ⁶ : Ti mumbuli wè lidi muana Nzèmbi, ki pa patghe wè sa ka neme vè muti bakome bo ndè na tome batoma ba ghu yule ni bakèlè wè, bo ni babéta wè mu mioghe miabo. ⁷ Jesus na yaghele ndè ndé: bakoma ghutso mabighe ma Nzèmbi bo wa saka soghe kume a wè Nzèmbi vè. ⁸ Diable na babete ndè ghu yule mukonge wa munéni na muèse ndè bukumu bwa bulonge bwa ghu tote na mabuè motchi ma ghu tsènge. ⁹ Ndè lèlè ndè ndé mè toghe wè vèdè biéle bie biotchi ti wè futu mabonge va busu buème na yimbese mè. ¹⁰ Jesus na lèlèndè " yèndè mubéli muti bakome bo wè ka yimbese ndi Nzèmbi ndè penze, wè salela ndile ndè penze". ¹¹ diable naniaghe ndè. Vana batome baghu yule ni ba salele ndè. ¹² Va Jesus a baade ghutso musènge a Judée, baduki ba Jean Baptiste ni ba yaade ghu lèle Jesus ti Kumu atsènge Herode a tembe Jean ghu tsughu vana Jesus a ghabeghe ghu Nazareth ghu musènge a Galilée. ¹³ Ndè namate ghu Nazareth na yèndè ghu musènge a Capenaum mu yèndè tsaghele ghona. Capernaum ni wa ba va pedia mudiba wa Galilée, ghutso musènge a Zabulon na Nephthali. ¹⁴ Tchiambe muènè layade musopela mabighe ma mubighi Esaie alèlè ndé: ¹⁵ Musènge a Zabulon na Nephthali Ndjile mubu wavè na ngulu, ghu mbise a Jourdain, Galilée tsènge a ba bali ghu tso yifundu. ¹⁶ Baate ba batsaghele ghu tso yifundu bamone yiyalela cha yinéni. To ghu yulu a baate ba batsaghele ghu tso yifundu chia leku yitini yiyalela ni cha yaade. ¹⁷ Bande va lèkèsè muènè Jesus na bande longese mabighe ma Nzémbi ndé: ghèlani mulinga, niaghani mabi ba sade, muti buyumenu bwa yule bona bèlè na yaade. ¹⁸ Va ndè yèndenga mu mubu wa Galiée na mone baane bangu boli Simon wu batède Pierre na André muaana nguèndi ba buaghenge mambusu ghutso mubu wavè na ngulu mubo bade balobi. ¹⁹ Jesus na lèlè bo ndé dukani mè, mè saade béna balobi babaate. ²⁰ Tina a tine ni batémba ma mabusu ni baduke ndè. ²¹ Va Jesus a kukulenge vana, ndè na mone baane bangu boli, Jacques muaana Zébédé na Jean muaana nguèndi. Ghu tso mbungu a Zébédé taat'abo bo babambenge ma mbusu .Ndè na tède bo. ²² Tine tine bo ni ba niaghe taate abo na mbungu niba duku ndè. ²³ Jesus na nangenge kèsè Galilée yotchi na longese baate ghutso manzo ma Nzèmbi mabo, na tosenge ma tsange ma mabuè, na bogha bi bébéda biotchi, naba ngua biku biotchi va pfuèchi'abaate. ²⁴ Ndumu andè ni ya koghele musènge a Syrie wotchi, niba tsualenge ndè botchi ba badenge na mabéda, botchi ba baba na bibéda mia minonge minonge, naba babaade na manioni mamabi, naba ngua tchighe, naba ngua mile mia vole; Jesus na bogha bo botchi. ²⁵ Piti'abaate mvuayovè ya dunkenge ndè bande Galilée, na ghu Décapole, Jerusalem na ghu Judée, na ngulu mubu yéna ya Jourdain.