¹ Va Jesus a badenge ghu musenge a Nazareth,Jean wu batedenge mubetichi na yende ghu yitchigha chia leghengi ghutso yitini chia musenge a Judée. Ndè na longichingi baate ba yadenge vana. ² Ndè na buesenge lèle ndé:béna niaghagni sade mabi,muti Nzembi na muese ndè ndé ni kumu bakumu, ndè na buse béna,muti béna lesa niaghe mabi vè. ³ Va lekese li Jean a longichingi mabighe ma mubighi a mamba Esaie ma masopeghenga,na lèlenge ti:Ba yogha ndagha mutu ghutso yitchigha cha leghengi ya chimena,na lèle baate botchi ndé:Badani ba bakogha mu yaka malumbi va ndè ka yada!Vangagni bikumbe biotchi mu ndè. ⁴ Jean a badenge na lengoyi li ba sade na mikungu mia gname wu ba tède chameau.Ngana bu buabadenge mubighi mambe Elie,ndè luatenge mundjighi yibanda mu lebindi.Biele biendi bia badenge ndila mabanga na levèki.Ni bakesenge bio ghutso yitchighe cha leghengi. ⁵ Ba batsaghelenge ghutso musenge a Jerusalem,bakunu ba bade bichi Judée,bakunu bana ,ba kese a Jourdain,botchi bayadenge ghu mbogha Jean,mu yogha ma ndè longichingi. ⁶ Va yula va bo ba yoghe bu ndè longichi ,bo ni tubunge mabi ma bo; tsovana ndè na tubunge bo ghutso Jourdain. ⁷ Jean na monenge ba Pharisiens bakunu,na ba Saducéens,ba yadenge bona bo mu yibonge batème.Ndè na lèlenge bo ndé:Mulinge ba tèdi ba ngua miangele! Wu libili bene na,mu bate kechia Nzembi yi ya yade na?Yatasani ti béna la toghe bate ndè. ⁸ Ti na mumbuli bena le ma tendeghe ,sadagni mamba ma ma muese ti béna lema ghele mulinga. ⁹ Mè yébi mé Nzembi a sade pengini na yimbese yitsuku chia Abraham.To ya lèlani mu bé muène ti: muti bese lilide bat"ghede ba kagha bése Abraham,Nzembi a sa ka tchise besa bena chighi vè. A ni bo vè,mè lèle bena ,ndè toghe kalese mamani manema ngana yimbisa cha Abraham! ¹⁰ Nzembi tchitsa a kaba mu tchise béna chighi. Ni bone, ngana mutu mumochi wa bande kese mikengi mia muti wu sa bote milonde vè. Ndè na kese miti miotchi ngana bona, tso na vède ndè ghutso mbuagha. ¹¹ Mu mè,mè batese béna ndile mu mamba.Mè sade lo,va baate batubu mabi mabo.To letsughu ka bèle lekade li mutu aka sade bimuile. Ndè ni wa lotele mè bungudi. Mè sa lidi tchitsa mu gniangele matembi mendi vè.Ndè na batese béna ndila na legnugni la buyimbe na mbuagha. ¹² Ndè lidi na pondji mutso makake mendi mu solo-biseghe bia milonda.Ndè tchitsa a lidimu solo milonde miotchi,mia mibue na mia mibi.Ndè na bèghe ba basongene ghu nzo ngana bu muvèdi a sosa mughunughu yula a chianga.To ndè na tsogha ba ngua mamba ma mabi ngana bu ba tsogha biseghe ghutso mbuagha yi isaka dime vè. ¹³ Va lekese muene Jesus na mate ghu Galilée,ghu Jourdain ghu mbogha Jean,mu yi bonge batème. ¹⁴ Va lekese li Jesus a fulu Jean mu batese ndè,Jean na sade bukidi na lèle ndè,ndé:Mè ni wu kibade na nzala ti wè batese mè!To wè ,wè sa lidi mu chidi mabi vè,ka buni wè yade ghu lidi mè? ¹⁵ To Jesus na yaghele ndè ndé:Batese mè ndile na manza,muti besa na wè botchi ni lesade ma malidi tchitsa va busu bua Nzembi.Va kani va Jean a chinga batese ndè. ¹⁶ Va yula a vana Jesus na pola tina tina ghutso mambe.Va yulu vana yulu ni ya dibena.Ndè na mono lenioni la Nzembi la kolena ghu yulu a ndè na ifuegnichi cha lekonda. ¹⁷ A va kagni va Nzembi a yambela ghu yulu,na lèle ndé:Awu ni muana mè,wu mè tondo ghua lotela,mu ndè mè mono bubue.