1 Hannantey gaakasina cine ra,manti tilas no ay ma hantum araŋ se, zama ay garaŋ anniya bay. 2 A se no ay ga fooma ndaraŋ masidoniya borey jine ka ne: Akaya waney na ngey soola te za manaŋ. Araŋ anniya mo ni borey baayaŋ no kookari. 3 Amma ay ga nya-izey din donton hal a ma si koy te iri fooma kaŋ iri te araŋ boŋ, i ma gar yaamo sanno wo ra, hala mo mate kaŋ cine ay na ci da araŋ ma bara soolante. 4 A ma si ciya, da masidoniya boro fooyaŋ kaa ay banda i m'araŋ gar araŋ mana soola jina. 5 Yaadin gaa haawi giri di naanayo wo sabbay se, sanku fa araŋ binde Ay di mo kaŋ a ga hagu ay ma nya-izey yaamar i ma gana ka koy araŋ do jina, i ma nooyaŋ yulwante margu kaŋ araŋ jin ka alkawlo sambu. Yaadin gaa a ga bara soolante, gomni hari no, manti tilas wane no. 6 Wa fongu woone gaa: Boro kan ga duma nda kamba sanday, kayna no a ga wi. Boro kaŋ ga duma nda albarka, a ga wi mo da albarka. 7 Boro kulu ma te mate kaŋ cine a miila nda bina ra, manti nda bine saray, manti mo da tilas. Zama Irikoy ga ba nooko kan ga te da bine kaani. 8 Irikoy gonda dabari mo kaŋ ga naŋ gomni kulu ma yulwa araŋ se, hal alwaati kulu hay kulu ra araŋ ma bara nda haŋ kaŋ ga wasa karaŋ muraaday feeri, hala mo araŋ ma yulwa ka tonton goy hanno kulu teeyaŋ ra. 9 Mate kaŋ i na hantum ka ne: A zaban ka no alfukaarey se, a adilitara ga dumi hal abada. 10 Nga kan ga dumi no dumako se, ŋwaari mo kan a ga ŋwa, yaadin no a ga dumi no araŋ se, ka naŋ a ma baa dumayaŋ se, a garan adilitara tonton mo. 11 Araŋ ga goro nda arzaka hay kulu ra hal araŋ ma du ka nooyaŋ kulu dumi no da bine folloŋ. Woodin mo ga naŋ i ma Irikoy saabu iri do. 12 Zama gaakasino wo teeyaŋo, manti hanantey jaŋa hinne no a ga kaa bo, amma a ga tonton ka naŋ boro boobo ma Irikoy saabu gumo. 13 gakasino wo teeyaŋo garan alhaalo cabe kan ga naŋ borey ma Irikoy beerandi araŋ ganayaŋo seeda se kaŋ araŋ te Almasihu baaru Hanna se. I ga Irikoy beerandi mo da nooyaŋey kaŋ araŋ te da bine folloŋ i se da boro kulu se mo. 14 I ŋwaarayey mo kaŋ i ga te araŋ se ra, i ga faaji ndaraŋ Irikoy gomni beero sabbay se kaŋ go aran se. 15 Iri ma Irikoy saabu a nooyaŋo se kan sinda cine.