¹ Soho nya-izey, iri ga ba aran ma bay gomno ga kan irikoy na Masidoniya Almasihu margay no. ² kankami boobo kan n'i si ra i na ngey farha booba cabe. Oho, ba alfukaarutaray ra i na ngey nooyaŋey no da baayan. ³ Zama ay goono g'i seeda: i no ŋgay hina boŋ, hal a bisa mo wo kan i ga hin, i bine yadda boŋ. ⁴ I n'iri ŋwaaray gumo ngey ma du gomni ka furo gaakasinay marguyaŋo ra hananyey se. ⁵ I mana te mo mate kaŋ cine iri tammaha hinne, amma i jin ka ngey boŋ no Rabbi se, d'iri mo se irikoy miila boŋ. ⁶ A se no, iri na Titos yaamar ka ne, za kaŋ nga no ka ne gomni goyo sintin a m'a toonandi mo araŋ do. ⁷ Mate kaŋ araŋ gonda hay kulu yulwante cimbeeri, da sanni, da bayray, da kookari kulu, da bakasinay iri se kala araŋ ma baa ka tonton gomno wo ra mo. ⁸ Manti lordi no ay go no ga te araŋ se bo, amma zama araŋ baakasinay cimi-cimo ma neesi nda boro fooyaŋ kookaro. ⁹ Zama araŋ giri Rabbi Yesu Almasihu gomno bay, kaŋ ba kaŋ arzakakoy no, kulu nda yaadin a ciya talka araŋ sabbey se, hal a talkatara do aran ma ciya arzakanteyaŋ. ¹⁰ Woone ra ay gay saawara no kaŋ gonda nafa araŋ se ay diyaŋ gaa. Za manaŋ araŋ no jin ka sintin ka nooyaŋey no. ¹¹ Araŋ mo no jin ka miila. Soho kal araŋ ma teeyaŋo toonandi, zamate kaŋ bine yadda go, yaadin mo no a toonandiyaŋo ma bara, araŋ hina boŋ. ¹² Zama nda anniya go no, Irikoy ga yadda haya kaŋ boro gonda boŋ, manti a sinoyaŋo boŋ. ¹³ Manti sanda i ma dogonandi boro fooyaŋ se,araŋ mo ma taabi bo, amma zama sabayaŋ ma te. ¹⁴ Soho kaŋ araŋ duura ga baa, a ma ciya gaakasinay, ngey kaŋ go jaŋay ra se, hal mo han fo i duura m'araŋ jaŋa bana. Yaadin gaa no sabayaŋ ga te. ¹⁵ Mate kaŋ i na huntum ka ne: Boro kaŋ margu iboobo, a mana to ka daaru a se, boro kaŋ magu i kayna mo, a mana gaze a se. ¹⁶ Amma iri ma Irikoy saabu kaŋ na anniya wo daŋ titos kaŋ ga saba nd'ay wano araŋ se. ¹⁷ Hacika a niri yaamaryaŋo ta, koyne zama nga bumbo gonda annya hanno, a ga tun ne ka koy araŋ do da nga boŋ miila. ¹⁸ Iri ga nya-ize fo da titos donton araŋ do care banda. Nya-izo din saabuuyaŋ go Almasihu margey kulu ra a baaru hanna goyo se. ¹⁹ Manti woodin hinne se mo no, amma Almasihu margey no ka suuban a ma naaru iri banda gomno din ciine ra. Iri go ga goyo wo te Rabbi bumbo darza se da mo iri ma iri himma cabe se. ²⁰ Iri go ga haggoy mo hala boro kulu ma si taali dake iri boŋ da haŋ kaŋ iri go ga te nooyaŋo wo ciine ra. ²¹ Zama iri ga ba iri ma te haŋ kaŋ ga boori, manti Irikoy jine hinne bo, amma baa borey jine mo. ²² I banda mo iri giri nya-ize fo donton koyne kaŋ iri gosi sorro boobo hari boobo ra. Iri na gar mo anniyakoy. Soho binde a anniya tonton naanay beero kaŋ a gonda araŋ se sabbay se. ²³ Haŋ kaŋ ga ti titos cine ra, nga wo ay hangasin day goykasin mo no araŋ se. Iri nya-izey cine ra mo, ngey wo Almasihu margey diyayaŋ no, Almasihu darza mo no. ²⁴ Yaadin gaa araŋ m'araŋ baakasinay seeda cabe i se Almasihu margey jine. Araŋ mi cabe mo haŋ kaŋ iri fooma nd'a araŋ boŋ.