¹ Ay, bulos ay kaŋ gonda boŋ kaynandiyaŋ alhaali araŋ game ra, amma waato kaŋ ay si araŋ do ay wo yaaru no ay garaŋ ŋwaaray Almasihu lalabo nda booriyaŋo sabbo ra. ² Oho, ay g'araŋ ŋwaaray, waati kaŋ ay kaa araŋ do araŋ ma say doole ay ma goy da cimi nd'ay yaarutara kan ay miila ay ma daŋ ka gaaba nda boro fooyaŋ kan go g'iri himandi sanda boroyaŋ kan go ga dira Adam-ize alhaalo boŋ. ³ Amma baa kaŋ iri goono ga dira gaaham woone ra, kulu nda yaadin iri si wongu te Adam-ize alhalo boŋ. ⁴ Zama iri wongu jinayey manti ndunnya wo wane yaŋ no, amma dabarikoyyaŋ no Irikoy do. I ga wongu fuwey zeeri. ⁵ Iri go ga borey lasaabey zeeri, da haŋ kaŋ ga beeri kulu kaŋ i na beerandi a ma gaaba nda Irikoy bayra. ⁶ Iri go ga fonguyaŋ kulu daŋ tamtaray ra i ma Almasihu gana. Waato kan araŋ ganayaŋo kubay mo, iri go soolante iri ma bana boray din gaa ngey wangay goyo kulu. ⁷ Araŋ go ga haggoy da hayey kaŋ yaŋ mo ga di hinne. Da boro fo go noodin kaŋ ga naanay nga boŋ gaa kaŋ nga ya Almasihu boro no, a ma faham ka bay kaŋ, mate kaŋ cine nga Almasihu wane no, iri mo yadin no. ⁸ Zama baa d'ay fooma kayna fo ndiri dabaro kaŋ Rabbi n'ay no araŋ jina-koyyaŋo se, manti araŋ halaciyaŋo se, kulu nda yaadin haawi say di. ⁹ I ma say guna danga ay ga ba karaŋ humburandi nday tirey. ¹⁰ Zama boro fooyaŋ ga ne: Oho, a tirey ga tin no, i gonda gaabi. Amma nga bumbo gaahamo, londibuuno no. A me sanney mo manti hay fo no. ¹¹ To Wa naŋ boro wo dumi ma woone lasaabu ka bay: mate kaŋ iri bara iri tirey sanno ra waati kaŋ iri si noodin, yaadin mo no iri ga bara iri te-goyey ra d'iri kaa. ¹² Iri wo binde, iri si yadda k'iri boŋ himandi wala k'iri boŋ deedandi nda boro fooyaŋ kaŋ yaŋ go ga ngey boŋ sifa. Amma ngey wo, kaŋ go ga ngey boŋ neesi nda care ka ngey boŋ deedandi nda care, i jaŋ fahamay. ¹³ Amma iri wo, iri si fooma ka bisa iri hirro me.Amma iri ga fooma nda hirro kaŋ me Irikoy dumbu iri se kaŋ to hala araŋ do. ¹⁴ Zama iri si candi ka bisa iri hirro meyo gaa, danga a mana to araŋ do, zama iri no ka kaa sintina hal araŋ do ka kande Almasihu Baaro Hanna. ¹⁵ Iri si fooma nda boro fo goy kaŋ bisa iri hirro me. Amma iri goono ga bine daŋ araŋ cimbeero ma tonton ka beeri hal iri ma du tontoni araŋ game ra iri hirro me. ¹⁶ Hala mo iri ma koy ka Baaru Hanna waazu laabey kaŋ go araŋ se jina ra. Iri ma si koy ka fooma nda haŋ kaŋ jin ka te boro fo batama ra. ¹⁷ Amma: Boro kaŋ goono ga fooma ma fooma Rabbi ra. ¹⁸ Zama manti boro kaŋ ga nga boŋ sifa no Rabbi ga yadda nd'a bo, amma kala boro kaŋ Rabbi ga sifa.