¹ Vɔ wo yɛ fia nutsi sɔ kú nufiafia kɔkɔɛ. ² To nɔn ameshinshinwó bé, wó nɛ nɔn zanzan woaɔ le ȡoȡo nyui tɔ nu, woa nyi mɛtsiwó yí dje nɔn bubu, mɛtsiwó nɔnɔn agbe ȡó ȡoȡó nyui tɔ mɛ, mɛtsiwó le kɔkɔɛ le xɔséɛ lɔ kúdó lɔnlɔn kúdó vévé dodo nu mɛ. ³ Nɛnɛ ha ké tó nɔn nyɔnushinshinwó bé wó nɛ kplɔ wóȡeki shigbe mɛntsiwó yí nɔnɔn agbe kɔkɔɛ nɛnɛ. Wó ŋgbe nyi amɛnyɔntótɔwó, wó ŋgbe sɔ wóȡeki sɔ ȡo aha nunu mɛ o, vɔ woa nyi nunyuifiatɔwó, ⁴ tsi la wɛ bé nyɔnu tugbedjɛwó woateŋ nɔn agbe shigbe wó tsan nɛnɛ, wóa ȡo ŋsɛnwó nɛ wóa lɔn wó súwó kú wó viwó, ⁵ wó anyi súsúnyuiȡétɔwó, éȡi ŋgbe nɔn wó ŋti o, mɛ tsiwó lénɔn bé nɔn wó xoéwó, woa bɔbɔ wóȡeki nɔn wó suwó. Nɛ wó ŋgbe nu enyɔn baȡa ȡó Mawu nyɔn lɔ ŋtio. ⁶ Nɛnɛ tsan ké, fia nu ȡékádjɛwó nɛ wó anyi súsúnyuiȡétɔ. ⁷ Lé go ȡéshiaȡé mɛ lɔ; wó ŋtɔ ȡé ȡékio fia shigbe kpɔȡo nu nyui tɔ nɛnɛ, le dɔ nyui woawoa mɛ, nɛ na nɔn nufiafia tsi ŋti kɔ, tsi djé bé woa fia lɔ, enyɔn tsi ŋtsi eȡiȡé ŋdé leo, yí tsi ŋtsí ŋmɛ kánkán ȡé ŋdé léo. ⁸ To nyɔn djɔdjɔɛ tsi ŋtsi mɛȡé kpékpi ŋda tenŋ shité ȡoo, nɛ ŋnɛ kpɛn futɔ lɔ tsi ŋda kpɔnyɔn ȡé asɔ ȡo míá ŋtio. ⁹ Amɛ xloexloewó nɛ bɔbɔ wóȡékí nɔn wó xoétɔwó le nushianu mɛ, wó ne woa nutsi yí la djɔdji nɔn wó xoétɔwó, ¹⁰ wó ŋgbe fi ŋȡé kpikpio, vɔ le gaxoxo ȡéshiaȡé mɛa wó nɛȡé nŋtéxoé woawoa tsi dé blibo fia, nɛ wóa do bubu Mawu tsi nyi mian xɔla yo nu fiafia ŋti. ¹¹ Mawu yió ménuvévé tsi ȡéȡé kpɔkpɔ yo djosoxoé nɛ amɛshiamɛ lɔ wó ȡi fia, ¹² yí le nu fiakɔ mi bé mian gbe nu le Mawu mavɔnmavɔn kúdo xixeɛ mɛ yo nudjodjrowó gbɔ, yí mian nɔn agbe le xixe yɛ mɛ kúdo nunyan, kú djɔdjɔnyínyí, kú Mawu vɔnvɔn. ¹³ Yí mian anɔn ténɔn kpɔ mɔnkpɔkpɔ tsi wó yra, kú Mawugan lɔ yo ŋtikɔkɔɛ kúdó mian xoétɔ Yesu Kristo yió ȡéȡéfia. ¹⁴ Yesu sɔ yéȡéki na ȡo mian ta nɛ ya tu nuvɔn ȡéshiaȡé yo fɛntu, nɛ dukɔn ȡé nɛ sun shi dukɔn tsi ŋti yi ȡé ȡi déshiaȡé le, dukɔn tsi bí nɔn dɔnyuiwó woawoa. ¹⁵ To nyɔn tsɛwó, xotoȡo nɔn amɛ, gbe nyɔn nɔn amɛ, kúdo atsɛ kpakpa blibo. ŋgbe na nɛ amɛ nɛ ȡigbɔ wo.