¹ Pɔlu, Mawu yió subɔla, Yesu Kristo yió aposolo, bé ya ȡo Mawu yió amɛtiantianwó xɔsewó anyi, bé ya ȡo nunyan yió nyɔntexoé anyi le kɔkɔɛnyínyí mɛ, ² tsiwó ȡo gɔmé anyi ȡo ŋȡoȡo ȡo agbémavɔ lɔ dji, tsiwó ŋgbé Mawu tsi ŋdé ȡanɔn adjeo, nu to ameganxoxowó dji. ³ tsi ȡe yió nyɔn fia le yió gamé to gbéfan ȡéȡé, tsi wó do ashi nu le Mawu mian xoétɔ yió ȡoȡo nu. ⁴ Nɔn Tito miavi, ŋtɔŋtɔ le mian xɔsé mé. Ne aménuvévé, ŋshishi kúkú kúdo ŋtifafa woa nawo le Mawu étɔ, le mia xoétɔ Yesu Kristo mé. ⁵ ŋgbewo ȡo Kreti bé na teŋ ȡo nu tsiwó kpɔtɔ mi ŋdé kpɔ djraȡo, yi na ȡo tsɔtsiɛ wó meganwó ȡo du shia du mɛn, shigbe le tsi yí ŋȡui nɛnɛn. ⁶ Ameganwó ȡo la nyi ŋmékánkán manɔ ŋti tɔwó, aȡé nyɔnu ȡéká, wó viwó ȡo la nyi vi ȡotowó, nutéxoéwoatɔwó, wó ŋda sɔ enyɔn ȡo wóŋti bé wó nyi nubaȡa woatɔwó alo tomaȡotɔwó. ⁷ Elé vévéȡé nɔn tsɔtsi kplɔtɔ shigbe Mawu yió nuwó dji kpɔtɔ, bé yiá nyi amɛ ŋmɛn kánkán manɔ ŋti tɔ, ŋda nyi dɔmezitɔ, ahanumúnɔn, ekɔndatɔ, amɛȡekí nudjitɔ. ⁸ Vɔ eȡola nyi amɛdjroxɔla, alɔn nɔn nunyui woawoa, anyi ŋshishi kúna amɛtɔ, amedjɔdjɔɛ, ȡékídjiȡútɔ. ⁹ Eȡo la le yéȡéki ȡo nyɔntexoé ŋtsi, shigbe letsi wó fiɛ ȡo, bé yatéŋ agbényɔn nɔn amɛwó le núȡoanyi kɔkɔɛ lɔ dji, bé yatéŋ agbényɔn nɔn amɛmasénugɔmɛnwó. ¹⁰ Fifiɛ lɔ, enu masɔmasɔ woawoa sugbɔ le, kúdo enyɔn gbalo, le ametsiwó nyi evomasomasotɔwó domé, wó blé amɛwó, lé wó kplɔwɔ to nugbégblé woawoa yió mɔndji. ¹¹ Elé véviȡé bé woa tɔwó té, wó le tame gblewɔ nɔn xomé blibowó, wó le nutsi ŋdé lé bé woa fia fiaɔ, le viȡe woa ŋkpɛn ŋti. ¹² Amé ȡéwo le wódomɛ, ŋsu nyanu ȡe to bé; Krétio nyi adjé ȡatɔ, amevuin, elan wadan, adɔwuinɔn, kúfiɔtɔ. ¹³ Nukafuȡéȡé tsɛ lɔ, le yió texoé. Eyiɛ ŋti lɔ, gbe nyɔn nɔnwó nyuiȡe, bé né woa tenŋ ȡo xɔse kɔkɔɛ ¹⁴ ŋgbe gu game le yudatɔwó kɔnu kúdo amegbetɔwó sewó tsiwo trɔ le nyawo totowɔ gbɔ. ¹⁵ Ne ametsiwó kɔ lɔ, nuwó kpata le kɔkɔɛ nɔn wó, vɔ nuȡé ŋdé le kɔkɔɛ ne ametsiwó nyi ame makɔmakɔ kúdo djimɛnsɛntɔwó ȡo wó gbɔngbɔn kúȡo wó djidjinyɔn xɔȡi. ¹⁶ Wó nɔnɔn wawaɔ bé yewó djeshi mawu, vɔ wó nu woawoa le kpé ȡowɔdji bé wó ŋdé djeshio. Ame masɔgbewó, tomaȡotɔwó tsiwó ŋda tɛnŋ awoa nyui.